လံာ်ပရၢတဘ့ၣ်အံၤ ဟဲလၢပှၤပၢဆှၢတၢ်ကမံးတံာ်အအိၣ်
ပှၤစူၢ်တၢ်နာ်တၢ်ကဒဲကဒဲသ့ၣ်ဧၢ
ဒ်ပသ့ၣ်ညါဘၣ်အသိး လံာ်စီဆှံတဘ့ၣ်အံၤ တဲတၢ်ဂ့ၢ်အါတက့ၢ်န့ၣ် ဘၣ်ဃးဒီးပှၤဟီၣ်ခိၣ်ဖိလီၤ. ပှၤတီပှၤလိၤပိာ်မုၣ်ဒီးပိာ်ခွါတနီၤန့ၣ် အဝဲသ့ၣ်အတၢ်နာ်ဘၣ်တၢ်မၤကွၢ်အီၤ ဒ်သိးဒီးပှၤလီၤ. အဝဲသ့ၣ် “မ့ၢ်ပှၤကညီ, ဒ်ပဝဲအသိး” လီၤ. (ယၤကိာ် ၅:၁၇) တနီၤန့ၣ် အတၢ်ကီတၢ်ခဲဒီး တၢ်သူၣ်ကိၢ်သးဂီၤ ကဲထီၣ်တၢ်ဃၢတၢ်စံာ်လၢ အဝဲသ့ၣ်အဂီၢ်လီၤ. ပှၤတနီၤနီၤန့ၣ် အဝဲသ့ၣ်အသးဘၣ်ဒိဒိၣ်မး ခီဖျိလၢအဟံၣ်ဖိဃီဖိ မ့တမ့ၢ် ပှၤလၢအစူၢ်တၢ်နာ်တၢ်ကဒဲကဒဲအဃိလီၤ. ဒီးအဂၤတနီၤန့ၣ် အသးဘၣ်တံာ်တာ်နးနးကလဲာ်လၢ အနီၢ်ကစၢ်အတၢ်ကမၣ်အဃိလီၤ.
ပှၤသ့ၣ်တဖၣ်အံၤ မ့ၢ်အဝဲသ့ၣ်လဲၤသဒၣ်ကွံာ် ယဟိဝၤယွၤဧါ. တမ့ၢ်ဘၣ်. ပှၤအါဂၤန့ၣ်တူၢ်ဘၣ်ဝဲဒ်သိးဒီး ပှၤကွဲးထါစံးထီၣ်ပတြၢၤ အတၢ်ထုကဖၣ်လၢအမ့ၢ်– “ယဟးဖျိးကျဲဒ်သိလၢအဟါမၢ် တဒုအသိးလီၤ. ဃုန့ၢ်နခ့နပှၤတက့ၢ်. အဂ့ၢ်ဒ်အံၤ, ယတသးပ့ၤနီၣ်ဘၣ် နတၢ်မၤလိာ်တဖၣ်ဘၣ်လီၤ.” (စံးထီၣ်ပတြၢၤ ၁၁၉:၁၇၆) နၤစ့ၢ်ကီး မ့ၢ်နတူၢ်ဘၣ်ဒ်န့ၣ် တဘျီဘျီဧါ.
ယဟိဝၤယွၤ တသးပ့ၤနီၣ်ပှၤလၢ အဘူၣ်ထီၣ်ဘါထီၣ်အီၤလၢ အဟးဖျိးကျဲဘၣ်. လၢတၢ်န့ၣ်အလီၢ် ယဟိဝၤယွၤဂုာ်ကျဲးစၢး ဝံၣ်ဆၢထၢၣ်က့ၤ ပှၤလၢအလီၤဃံၤတဖၣ် ခီဖျိလၢ ပှၤစူၢ်တၢ်နာ်တၢ်ကဒဲကဒဲလီၤ. ပကဆိကမိၣ်ကွၢ်တၢ်အဒိတခါလၢ ယဟိဝၤယွၤမၤစၢၤအခ့အပှၤ စီၤယိၤဘး လၢကျဲဒ်လဲၣ်န့ၣ်တက့ၢ်. စီၤယိၤဘးတူၢ်ဘၣ်ဝဲ တၢ်ကီတၢ်ခဲအကလုာ်ကလုာ်ဒ်သိးဒီး—ကျိၣ်စ့တၢ်ကီတၢ်ခဲ, ဘၣ်ပျဲလီၤမၢ်ကွံာ် ပှၤလၢအအဲၣ်ဘၣ်ဝဲ ဒီးတၢ်အိၣ်ဆူၣ်အိၣ်ချ့လၢအတဂ့ၤန့ၣ်လီၤ. တကးဒံးဘၣ် ပှၤလၢအကြၢးဟ့ၣ်ဂံၢ်ဟ့ၣ်ဘါစီၤယိၤဘးန့ၣ် တဟ့ၣ်ဂံၢ်ဟ့ၣ်ဘါဝဲအမဲာ်ညါ အဝဲသ့ၣ်တဲဟးဂီၤအသးလီၤ. စီၤယိၤဘးအတၢ်ဆိကမိၣ် လဲၤတပျာ်ဝဲဘၣ်ဆၣ် အဝဲတလဲၤသဒၣ်ယဟိဝၤယွၤနီတဘျီဘၣ်. (ယိၤဘး ၁:၂၂; ၂:၁၀) ဒ်သိးစီၤယိၤဘး အတၢ်ဆိကမိၣ်ကလိၤထီၣ်က့ၤအဂီၢ် ယဟိဝၤယွၤမၤစၢၤအီၤဒ်လဲၣ်.
ယဟိဝၤယွၤမၤစၢၤစီၤယိၤဘး ခီဖျိလၢပှၤစူၢ်တၢ်နာ်တၢ်ကဒဲကဒဲ စီၤအလံဟူၤန့ၣ်လီၤ. ဖဲစီၤယိၤဘးတဲဖျါထီၣ် အတၢ်ဘၣ်ယိၣ်ဘၣ်ဘှီအခါ စီၤအလံဟူၤဒိကနၣ်ဝဲဒီး အသးအိၣ်ကတိၤတၢ်စ့ၢ်ကီးလီၤ. မ့ၢ်အဝဲကတဲဝဲတၢ်မနုၤလဲၣ်. မ့ၢ်အဝဲကဒူးကဒ့ၣ်စီၤယိၤဘး ဒ်သိးစီၤယိၤဘးကဆီတလဲ အတၢ်ဆိကမိၣ်အဂီၢ်ဧါ. မ့ၢ်အဝဲပာ်တၢ်ကမၣ်လၢ စီၤယိၤဘးအလိၤဧါ. မ့တမ့ၢ်အဝဲမၤမဲာ်ဆှးအီၤဧါ. မ့ၢ်စီၤအလံဟူၤဆိကမိၣ်လီၤအသးလၢ အဂ့ၤန့ၢ်ဒံး စီၤယိၤဘးဧါ. တမ့ၢ်လ့ၤတက့ၤဘၣ်. ဒ်ယွၤအသးစီဆှံ ထိၣ်ဟူးထိၣ်ဂဲၤထီၣ်အသးအသိးန့ၣ် စီၤအလံဟူၤစံးဝဲလၢ– “လၢကစၢ်ယွၤအမဲာ်ညါန့ၣ်, နၤဒီးယၤပမ့ၢ်တၢ်ဒ်သိးသိးလီၤ. ပဘၣ်တၢ်တ့ပှၤလၢကပံာ်ခံဂၤလိာ်လီၤ.” ဒီးအဝဲဟ့ၣ်ဆူၣ်ထီၣ်စီၤယိၤဘးအသးလၢ– “အလီၢ်တအိၣ်လၢ နကပျံၤယၤန့ၣ်ဘၣ်. ယတမၤနၢၤမၤပ့ၤနၤန့ၣ်ဘၣ်.” (ယိၤဘး ၃၃:၆, ၇, ခ့ခါစှီၤကျိာ်) စီၤအလံဟူၤတမၤဃၢထီၣ် စီၤယိၤဘးအတၢ်ဝံတၢ်ယိးဘၣ်. လၢတၢ်န့ၣ်အလီၢ် အဝဲဟ့ၣ်ဂံၢ်ဟ့ၣ်ဘါ ဒီးဟ့ၣ်ကူၣ်ဟ့ၣ်ဖးအီၤလၢ တၢ်အဲၣ်တၢ်ကွံအပူၤလီၤ.
ပဝဲဒၣ်ပှၤပၢဆှၢတၢ်ကမံးတံာ်န့ၣ် ပကတဲာ်ကတီၤဘရိၣ်ခၠၣ်တဘ့ၣ်အံၤလၢ တၢ်အဲၣ်တၢ်ကွံအပူၤစ့ၢ်ကီးလီၤ. အဆိကတၢၢ်န့ၣ် ပဒိကနၣ်ပဒီပုၢ်ဝဲၢ်လၢ အဟးဖျိးကျဲတနီၤအဂ့ၢ် လီၤတံၢ်လီၤဆဲးဒီး ဆိကမိၣ်ထံအဝဲသ့ၣ် အတၢ်အိၣ်သးထံထံဆးဆးန့ၣ်လီၤ. (ကတိၤဒိ ၁၈:၁၃) ပဃ့ဘါထုကဖၣ်ဒ်သိးသိးဝံၤဒီး ပကွၢ်ကဒါက့ၤလံာ်စီဆှံအဆၢတဖၣ် လၢအဘၣ်ဃးဒီး ယဟိဝၤယွၤ အပှၤဂီၢ်မုၢ်လၢပျၢၤတဖၣ်အဂ့ၢ်လီၤ. ဖဲအဝဲသ့ၣ်တူၢ်ဘၣ်ဝဲ တၢ်ကိၢ်တၢ်ဂီၤဒ်အံၤအဆၢကတီၢ် ကစၢ်မၤစၢၤအီၤဒ်လဲၣ်အဂ့ၢ်န့ၣ် ပသမံသမိးကွၢ်အီၤလီၤတံၢ်လီၤဆဲးန့ၣ်လီၤ. လၢခံကတၢၢ်န့ၣ် ပပာ်ဖှိၣ်ထီၣ်ယဟိဝၤယွၤအခ့အပှၤ လၢပျၢၤတဖၣ်အဂ့ၢ်အကျိၤဃုာ်ဒီး ပဒီပုၢ်ဝဲၢ်လၢမုၢ်မဆါတနံၤညါအံၤအဂ့ၢ် ဒီးပထုးထီၣ်ဘရိၣ်ခၠၣ်တဘ့ၣ်အံၤလီၤ. ပကွဲမုာ်ဘၣ်နၤလၢ နကသမံသမိးကွၢ် တၢ်ဂ့ၢ်တၢ်ကျိၤသ့ၣ်တဖၣ်အံၤလီၤ. တကးဒံးဘၣ် ပအဲၣ်ဒိးဒုးသ့ၣ်ညါနၤလၢ ပအဲၣ်ဘၣ်နၤနီၢ်နီၢ်လီၤ.
ယဟိဝၤပှၤအုၣ်အသး အပှၤပၢဆှၢတၢ်ကမံးတံာ်
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသး အပှၤပၢဆှၢတၢ်ကမံးတံာ်န့ၣ် မ့ၢ်မနုၤလဲၣ်
ပှၤတဖုအံၤမ့ၢ် ပတၢ်ကရၢကရိ အခိၣ်အနၢ်ဧါ.
