တၢ်မၤလိ ၁
လံာ်စီဆှံ မၤစၢၤနၤ သ့ဒ်လဲၣ်
ပဝဲကိးဂၤဒဲး ပအဲၣ်ဒိး သ့ၣ်ညါအါထီၣ် ဘၣ်ဃးဒီး ပတၢ်အိၣ်မူအဂ့ၢ်, ဘၣ်မနုၤအဃိ ပထံၣ်ဘၣ် တၢ်ကီတၢ်ခဲလဲၣ်, ပမ့ၢ်သံန့ၣ် တၢ်ကကဲထီၣ်အသးဒီးပှၤဒ်လဲၣ် ဒီးခါဆူညါ တၢ်ကမၤအသးဒ်လဲၣ်. ပအိၣ်ဒီး တၢ်သူၣ်ကိၢ်သးဂီၤ ဘၣ်ဃးဒီး တနံၤဘၣ်တနံၤ အတၢ်ကီတၢ်ခဲတဖၣ် ဒ်သိးဒီး ပကအီၣ်ဘၣ်အီဘၣ်ဒ်လဲၣ် ဒီးပကအိၣ်ဒီး ဟံၣ်မုာ်ဃီပၢၤဒ်လဲၣ်. တၢ်သံကွၢ် လၢအရ့ဒိၣ်တဖၣ်အံၤ အတၢ်စံးဆၢန့ၣ် ပှၤအါဂၤထံၣ်န့ၢ်ဝဲ လၢလံာ်စီဆှံအပူၤ. တကးဒံးဘၣ် လၢလံာ်စီဆှံအပူၤန့ၣ် အိၣ်ဒီးတၢ်ဟ့ၣ်ကူၣ် လၢအကဲဘျုး လၢတနံၤဘၣ်တနံၤအဂီၢ် ဒီးလံာ်စီဆှံန့ၣ် ကဲဘျုးလၢ ပှၤကိးဂၤဒဲးအဂီၢ်လီၤ.
၁. တၢ်သံကွၢ်တနီၤလၢ ပထံၣ်န့ၢ်အတၢ်စံးဆၢ လၢလံာ်စီဆှံအပူၤန့ၣ် မ့ၢ်မနုၤလဲၣ်.
တၢ်သံကွၢ်အရ့ဒိၣ် လၢလာ်တဖၣ်အံၤ အတၢ်စံးဆၢန့ၣ် အိၣ်လၢလံာ်စီဆှံအပူၤ. တၢ်သံကွၢ်တဖၣ်အံၤမ့ၢ်ဝဲ ပှၤဟီၣ်ခိၣ်ဖိ ဟဲကဲထီၣ်ဒ်လဲၣ်. ဘၣ်မနုၤအဃိ ပဘၣ်ဟဲအိၣ်မူလၢ ဟီၣ်ခိၣ်ချၢလဲၣ်. ဘၣ်မနုၤအဃိ ပှၤဟီၣ်ခိၣ်ဖိ တူၢ်ဘၣ်တၢ်နးတၢ်ဖှီၣ်လဲၣ်. ပမ့ၢ်သံန့ၣ် တၢ်ကကဲထီၣ်အသးဒီးပှၤ ဒ်လဲၣ်. ပှၤကိးဂၤဒဲး မ့ၢ်လီကီတၢ်ဃူတၢ်ဖိးန့ၣ် ဘၣ်မနုၤအဃိ တၢ်ဒုးတၢ်ယၤအါ ထဲအံၤညါလဲၣ်. ခါဆူညါန့ၣ် ဟီၣ်ခိၣ်ကဟးဂီၤဧါ. လံာ်စီဆှံ ဟ့ၣ်ဂံၢ်ဟ့ၣ်ဘါပှၤ လၢပကဃုသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢ. ပှၤလၢအကကွဲၢ်တဖၣ် ထံၣ်န့ၢ်ဝဲ တၢ်သံကွၢ်တဖၣ်အံၤ အတၢ်စံးဆၢ လၢလံာ်စီဆှံအပူၤ ဒီးအသူၣ်မံသးမုာ်ဝဲလံ.
၂. တနံၤဘၣ်တနံၤန့ၣ် ဒ်သိး ပကအိၣ်ဒီးတၢ်သးခုအဂီၢ် လံာ်စီဆှံ မၤစၢၤပှၤသ့ဒ်လဲၣ်.
လၢလံာ်စီဆှံအပူၤန့ၣ် တၢ်ဟ့ၣ်ကူၣ်လၢအဂ့ၤ အိၣ်ဝဲအါမး. အဒိ လံာ်စီဆှံ သိၣ်လိဝဲလၢ ဒ်သိးပဟံၣ်ဖိဃီဖိ ကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်. ဖဲပသူၣ်ကိၢ်သးဂီၤတၢ်အခါ လံာ်စီဆှံ ဟ့ၣ်ကူၣ်ပှၤလၢ ပကဘၣ်မၤဒ်လဲၣ် ဒီးဒ်သိး ပကအိၣ်ဒီး တၢ်သးခုလၢ ပတၢ်ဖံးတၢ်မၤအပူၤန့ၣ် လံာ်စီဆှံ ဟ့ၣ်ကူၣ်ပှၤလၢ ပကဘၣ်မၤဒ်လဲၣ်. ဖဲပတဲသကိး တၢ်ဂ့ၢ်လၢ လံာ်တဘ့ၣ်အံၤအပူၤအခါ နကသ့ၣ်ညါဘၣ် လံာ်စီဆှံ သိၣ်လိဝဲ ဘၣ်ဃးဒီး တၢ်ဂ့ၢ်တဖၣ်အံၤ တကးဒံးဘၣ် နကသ့ၣ်ညါဘၣ် တၢ်ဂ့ၢ်အဂၤအါမး. ဒီးခီဖျိလၢ ပတဲသကိး တၢ်ဂ့ၢ်လၢ လံာ်တဘ့ၣ်အံၤအပူၤအဃိ ပမုၢ်လၢ်လၢ နကနာ်သပှၢ်တၢၢ်လၢ “တၢ်ကွဲးအသးခဲလၢာ် [တၢ်ခဲလၢာ်လၢ အအိၣ်လၢ လံာ်စီဆှံအပူၤ] န့ၣ် . . . ကဲဘျုးဝဲ” လီၤ.—၂ တံၤမသ့း ၃:၁၆.
လံာ်တဘ့ၣ်အံၤ တမ့ၢ်လံာ်စီဆှံဘၣ်. လံာ်တဘ့ၣ်အံၤ ကဟ့ၣ်ဂံၢ်ဟ့ၣ်ဘါနၤလၢ နကဃုသ့ၣ်ညါ လံာ်စီဆှံ. အဃိ ပဟ့ၣ်ဂံၢ်ဟ့ၣ်ဘါနၤလၢ နကအိးထီၣ်ဖး လံာ်စီဆှံအဆၢတဖၣ် လၢအအိၣ်လၢ လံာ်တၢ်မၤလိတဘ့ၣ်အံၤအပူၤ ဒီးထိၣ်သတြီၤအီၤဒီး တၢ်လၢနမၤလိဘၣ်တဖၣ်.
ဃုသ့ၣ်ညါအါထီၣ်
ပကတဲသကိး ဘၣ်ဃးဒီး လံာ်စီဆှံမၤစၢၤပှၤဂၤဒ်လဲၣ်, ဒ်သိးနဖးလံာ်စီဆှံ ကမုာ်အဂီၢ် နကဘၣ်မၤဒ်လဲၣ် ဒီးဒ်သိး နကနၢ်ပၢၢ်လံာ်စီဆှံအဂီၢ် ဘၣ်မနုၤအဃိ နကြၢးဃ့ ပှၤဂၤအတၢ်မၤစၢၤလဲၣ်.
၃. လံာ်စီဆှံ ဟံးစုနဲၣ်ကျဲပှၤသ့
လံာ်စီဆှံန့ၣ် လီၤဂာ်ဒ်သိးဒီး တၢ်ကပီၤဖးဒိၣ်တခါ. တကးဒံးဘၣ် လံာ်စီဆှံန့ၣ် မၤစၢၤပှၤလၢ ပကဆၢတဲာ်တၢ်လၢအဘၣ် ဒီးအဒုးသ့ၣ်ညါပှၤ ဘၣ်ဃးဒီး တၢ်လၢအကကဲထီၣ်အသး လၢခါဆူညါ.
ဖး စံးထီၣ်ပတြၢၤ ၁၁၉:၁၀၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
လံာ်စီဆှံန့ၣ် ပှၤကွဲးထါစံးထီၣ်ပတြၢၤ တဂၤအံၤ ထံၣ်ဝဲဒ်လဲၣ်.
-
နၤမီၤ လံာ်စီဆှံန့ၣ် နထံၣ်အီၤဒ်လဲၣ်.
၄. ပဃုထံၣ်န့ၢ် ပတၢ်သံကွၢ်တဖၣ် အတၢ်စံးဆၢ လၢလံာ်စီဆှံအပူၤသ့
ပိာ်မုၣ်တဂၤ အိၣ်ဒီးတၢ်သံကွၢ်တနီၤ ဒီးအအဲၣ်ဒိးသ့ၣ်ညါဝဲ တၢ်စံးဆၢဖးယံာ်လံ. အတၢ်သံကွၢ်တဖၣ်အံၤ အတၢ်စံးဆၢန့ၣ် အထံၣ်န့ၢ်ဝဲလၢ လံာ်စီဆှံအပူၤ. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
-
လၢတၢ်ဂီၤမူအပူၤန့ၣ် ပိာ်မုၣ်တဂၤ အိၣ်ဒီးတၢ်သံကွၢ် မနုၤတဖၣ်လဲၣ်.
-
ပိာ်မုၣ်တဂၤအံၤ မၤလိလံာ်စီဆှံအဃိ ကဲဘျုးလၢအဂီၢ်ဒ်လဲၣ်.
လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကသံကွၢ်တၢ်. ဖး မးသဲ ၇:၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တၢ်သံကွၢ်တဖၣ်လၢ နအဲၣ်ဒိးသ့ၣ်ညါ အတၢ်စံးဆၢ လၢလံာ်စီဆှံအပူၤန့ၣ် အိၣ်ဧါ.
၅. ဖးလံာ်စီဆှံ ဒီးဃုကျဲဒ်သိး နဖးအီၤကမုာ်အဂီၢ်
ပှၤအါဂၤန့ၣ် ဖးလံာ်စီဆှံမုာ်မး ဒီးအဝဲသ့ၣ် ဒိးန့ၢ်ဘၣ်အဘျုး. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
-
လၢတၢ်ဂီၤမူအပူၤ ဘၣ်ဃးဒီး တၢ်ဖးလံာ်ဖးလဲၢ်န့ၣ် ပှၤသးစၢ်တဖၣ် အတၢ်ထံၣ်အိၣ်ဒ်လဲၣ်.
-
ဘၣ်မနုၤအဃိ အဝဲသ့ၣ် ဖးလံာ်စီဆှံမုာ်လဲၣ်.
လံာ်စီဆှံ အတၢ်ဟံးစုနဲၣ်ကျဲတဖၣ်န့ၣ် မၤမုာ်ထီၣ်ပသး ဒီးဟ့ၣ်ပှၤတၢ်မုၢ်လၢ်. ဖး ရိမ့ၤ ၁၅:၄ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တၢ်မုၢ်လၢ် ဒီးတၢ်မၤမုာ်ထီၣ်က့ၤ လၢလံာ်စီဆှံတဆၢအံၤ အၢၣ်လီၤဝဲန့ၣ် နအဲၣ်ဒိး ဒိးန့ၢ်ဘၣ်ဧါ.
၆. ဒ်သိး နကနၢ်ပၢၢ် လံာ်စီဆှံအဂီၢ် ပှၤဂၤမၤစၢၤနၤသ့
ပှၤအါဂၤ ဖးလံာ်စီဆှံလၢအနီၢ်ကစၢ် တကးဒံးဘၣ် အဝဲသ့ၣ် တဲသကိးဝဲဒီးပှၤဂၤ အဃိ ကဲဘျုးလၢ အဝဲသ့ၣ်အဂီၢ်ဒိၣ်မး. ဖး မၤတၢ် ၈:၂၆-၃၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဒ်သိး ပကနၢ်ပၢၢ်လံာ်စီဆှံအဂီၢ် ပကဘၣ်မၤမနုၤလဲၣ်.—ကွၢ် အဆၢဖိ ၃၀ ဒီး ၃၁.
ဒ်သိး ပှၤအဲၤသံအီးပးဖိတဂၤအံၤ ကနၢ်ပၢၢ် တၢ်လၢအဖးဝဲအဂီၢ် အလိၣ်ဘၣ် ပှၤဂၤ အတၢ်မၤစၢၤ. မုၢ်မဆါတနံၤအံၤ ပှၤအါဂၤ တဲသကိး လံာ်စီဆှံဒီးပှၤဂၤ အဃိ ကဲထီၣ်တၢ်မၤစၢၤ လၢအဝဲသ့ၣ်အဂီၢ် ဒိၣ်မး
ပှၤတနီၤတဲဝဲလၢ– “တၢ်မၤလိလံာ်စီဆှံန့ၣ် လၢာ်ဂီၤတၢ်ဆၢကတီၢ်လီၤ.”
-
မ့မ့ၢ်နၤမီၤ နဆိကမိၣ်ဒ်လဲၣ်. ဘၣ်မနုၤအဃိ နဆိကမိၣ် ဒ်န့ၣ်လဲၣ်.
တၢ်ဂ့ၢ်လၢအရ့ဒိၣ်
လံာ်စီဆှံန့ၣ် အိၣ်ဒီးတၢ်ဟ့ၣ်ကူၣ် လၢပတၢ်အိၣ်မူ တနံၤဘၣ်တနံၤအဂီၢ်, အိၣ်ဒီး တၢ်သံကွၢ် လၢအရ့ဒိၣ်တဖၣ် အတၢ်စံးဆၢ, မၤမုာ်ထီၣ်က့ၤပသး ဒီးဟ့ၣ်ပှၤတၢ်မုၢ်လၢ်.
တၢ်ကွၢ်ကဒါက့ၤ
-
လၢလံာ်စီဆှံအပူၤန့ၣ် အိၣ်ဒီးတၢ်ဟ့ၣ်ကူၣ် မနုၤတဖၣ်လဲၣ်.
-
လံာ်စီဆှံ စံးဆၢဝဲ တၢ်သံကွၢ်မနုၤတဖၣ်လဲၣ်.
-
လၢလံာ်စီဆှံအပူၤန့ၣ် နအဲၣ်ဒိးသ့ၣ်ညါ တၢ်ဂ့ၢ်မနုၤတဖၣ်လဲၣ်.
ဃုသ့ၣ်ညါ
လံာ်စီဆှံန့ၣ် အိၣ်ဒီးတၢ်ဟ့ၣ်ကူၣ်လၢ အကဲဘျုးလၢပဂီၢ် လၢမုၢ်မဆါတနံၤအံၤ.
“လံာ်စီဆှံအတၢ်ဟံးစုနဲၣ်ကျဲန့ၣ် ကဲဘျုးဝဲထီဘိ” (တၢးထီခိးတၢ် နီၣ်ဂံၢ် ၁ ၂၀၁၈)
ပိာ်ခွါတဂၤအံၤ အကဲပှၤလၢအမဲာ်ဆှးသ့ စးထီၣ်လၢအနီၢ်ဆံးခါလံ ဘၣ်ဆၣ် လံာ်စီဆှံမၤစၢၤအီၤဒ်လဲၣ်.
ဃုကွၢ် လံာ်စီဆှံ အတၢ်ဟ့ၣ်ကူၣ် လၢအဘျုးအိၣ် လၢဟံၣ်ဖိဃီဖိအဂီၢ်.
“တၢ်ခူသူၣ် ၁၂ ခါလၢ ကမၤစၢၤနၤဒ်သိး နကအိၣ်ဒီး ဟံၣ်မုာ်ဃီပၢၤ” (ပၢၢ်ထီၣ်! နီၣ်ဂံၢ် ၂ ၂၀၁၈)
တၢ်နၢ်ပၢၢ်ကမၣ် ဘၣ်ဃးဒီး မတဂၤပၢဟီၣ်ခိၣ်လဲၣ်န့ၣ် လံာ်စီဆှံ ပာ်ဖျါထီၣ်ဝဲ အတၢ်စံးဆၢဒ်လဲၣ်, ဃုသ့ၣ်ညါကွၢ်.
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် မၤလိလံာ်စီဆှံဒီးပှၤဂၤန့ၣ် မ့ၢ်မနုၤလဲၣ်
ယဟိဝၤပှၤအုၣ်အသးတဖၣ် ကွဲးမုာ်ပှၤဂၤလၢ ကမၤလိလံာ်စီဆှံ အတၢ်ရဲၣ်တၢ်ကျဲၤလၢ တလိၣ်ဟ့ၣ်အပှ့ၤဘၣ်န့ၣ် နသူ လံာ်စီဆှံလၢ နဘၣ်သးအီၤ တဘ့ၣ်ဘ့ၣ်သ့လီၤ. နကွဲမုာ် နဟံၣ်ဖိဃီဖိ ဒီးနတံၤသကိးတဖၣ်သ့လီၤ.
