ယ့ၣ်ၡူးန့ၣ် မ့ၢ်ခရံာ်ဖိ တၢ်အိၣ်ဖှိၣ်အခိၣ်. (အ့းဖ့းစူး ၅:၂၃) ခဲအံၤ ယ့ၣ်ၡူးအိၣ်လၢမူခိၣ်လံ သနာ်က့ အဝဲတီခိၣ်ရိၤမဲ အပျဲၢ်အဘီၣ်တဖၣ် လၢဟီၣ်ခိၣ်ချၢ ခီဖျိ “ကုၢ်လၢအတီ ဒီးအကူၣ်တၢ်သ့.” (ဖး မးသဲ ၂၄:၄၅.) ယ့ၣ်ၡူး ဃုထၢထီၣ်ကုၢ်အံၤ ဒီးဟ့ၣ်အီၤတၢ်ခွဲးတၢ်ယာ် လၢကဆၢတဲာ်တၢ် ဘၣ်ဃးဒီး တၢ်ဂ့ၢ်တနီၤ. ဘၣ်ဆၣ် “ကုၢ်” အံၤကဘၣ်ဒိကနၣ် ခရံာ်အကလုၢ် ဒီးမၤန့ၢ်တၢ်လၢ ခရံာ်အဒီပုၢ်ဝဲၢ်တဖၣ်အဂီၢ်. ကုၢ်အံၤ မ့ၢ်မတၤလဲၣ်. ဒီးအကွၢ်ထွဲ မၤစၢၤပှၤဒ်လဲၣ်.

၁. “ကုၢ်လၢအတီ ဒီးအကူၣ်တၢ်သ့” န့ၣ်မ့ၢ်မတၤလဲၣ်.

စးထီၣ်လၢအခီၣ်ထံး တုၤခဲအံၤန့ၣ် ယဟိဝၤယွၤသူဝဲ ပှၤပိာ်ခွါတဂၤ မ့တမ့ၢ် ပှၤပိာ်ခွါတဒူၣ်လၢ အအိၣ်စှၤကိးဂၤ ဒ်သိးကတီခိၣ်ရိၤမဲ အပှၤဂီၢ်မုၢ်. (မၤလကံ ၂:၇; ဧ့ၤဘြံၤ ၁:၁) အဒိ ဖဲယ့ၣ်ၡူးသံဝံၤအလီၢ်ခံ တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ် လၢဝ့ၢ်ယရူၤၡလ့ၣ်အပူၤန့ၣ် တီခိၣ်ရိၤမဲတၢ်လီၤ. (မၤတၢ် ၁၅:၂) ဒ်န့ၣ်အသိး မုၢ်မဆါတနံၤအံၤ တၢ်အိၣ်ဖှိၣ်သးပှၢ်တဒူၣ် လၢအအိၣ်စှၤကိးဂၤ လၢအမ့ၢ် ယဟိဝၤပှၤအုၣ်အသး အပှၤပၢဆှၢတၢ်ကမံးတံာ်န့ၣ် ဟ့ၣ်လီၤဝဲ နီၢ်သးတၢ်အီၣ် ဒီးဟံးစုနဲၣ်ကျဲဝဲ တၢ်စံၣ်တဲၤတဲလီၤတၢ်မၤ. တၢ်အိၣ်ဖှိၣ်သးပှၢ်တဒူၣ် လၢအအိၣ်စှၤကိးဂၤအံၤ မ့ၢ်ဝဲ “ကုၢ်လၢအတီ ဒီးအကူၣ်တၢ်သ့လၢ [ယ့ၣ်ၡူး] ပာ်ထီၣ်အီၤ.” (မးသဲ ၂၄:၄၅) ပှၤပၢဆှၢတၢ်ကမံးတံာ် ကိးဂၤဒဲးန့ၣ် မ့ၢ်ဝဲ ခရံာ်ဖိလၢ အဘၣ်တၢ်ဒိးဖှူအီၤ လၢသးစီဆှံ ဒီးအဝဲသ့ၣ် ခိးကွၢ်လၢ် တၢ်ဆၢကတီၢ်ဖဲ အဝဲသ့ၣ် သံဝံၤအလီၢ်ခံ အဝဲသ့ၣ် ကပၢဃုာ်တၢ်ဒီးခရံာ် လၢမူခိၣ်.

၂. ကုၢ်လၢအတီ ကတဲာ်ကတီၤဝဲ နီၢ်သးတၢ်အီၣ် မနုၤတဖၣ်လဲၣ်.

ယ့ၣ်ၡူးတဲဝဲလၢ ကုၢ်လၢအတီက “ဒုးအီၣ် [အဒီပုၢ်ဝဲၢ် ခရံာ်ဖိတဖၣ်] တၢ်အီၣ် ဖဲအဆၢကတီၢ်လၢ အကြၢးဝဲဘၣ်ဝဲ.” (မးသဲ ၂၄:၄၅) တၢ်အီၣ်တၢ်အီန့ၣ် မၤစၢၤပှၤလၢ ပကအိၣ်ဒီး တၢ်ဂံၢ်တၢ်ဘါ ဒီးပကအိၣ်ဆူၣ်အိၣ်ချ့. ဒ်န့ၣ်အသိး နီၢ်သးတၢ်အီၣ် လၢအမ့ၢ် တၢ်သိၣ်လိသီလိ လၢအဟဲလၢ ကစၢ်ယွၤ အကလုၢ်ကထါန့ၣ် မၤစၢၤပှၤလၢ ပကအိၣ်ဒီး တၢ်ဂံၢ်တၢ်ဘါ ဒ်သိး ကပဆဲးတီဒီး ယဟိဝၤယွၤ ဒီးဆဲးမၤတၢ်မၤလၢ ယ့ၣ်ၡူးမၢပမၤတဖၣ်လီၤ. (၁ တံၤမသ့း ၄:၆) ပဒိးန့ၢ်ဘၣ် နီၢ်သးတၢ်အီၣ် ခီဖျိလၢ တၢ်အိၣ်ဖှိၣ်, ကဝီၤတၢ်အိၣ်ဖှိၣ်, တၢ်အိၣ်ဖှိၣ်ဖးဒိၣ် ဒီးလံာ်လဲၢ် ဒီးတၢ်ဂီၤမူတဖၣ် လၢအဒိးသန့ၤထီၣ်အသး လၢလံာ်စီဆှံလီၤ. နီၢ်သးတၢ်အီၣ်တဖၣ်အံၤ မၤစၢၤပှၤဒ်သိး ပကနၢ်ပၢၢ် ကစၢ်ယွၤအတၢ်ဘၣ်သး ဒီးမၤဂၢၢ်ကျၢၤထီၣ် ပတၢ်ရ့လိာ်သးဒီးကစၢ်ယွၤ.

 ဃုသ့ၣ်ညါအါထီၣ်

၃. ယဟိဝၤယွၤ အပှၤဂီၢ်မုၢ်တဖၣ် ကဘၣ်အိၣ်ဒီး အတၢ်ကရၢကရိ

ပှၤပၢဆှၢတၢ်ကမံးတံာ်န့ၣ် အိၣ်လၢ ယ့ၣ်ၡူးအတၢ်ဟံးစုနဲၣ်ကျဲ အဖီလာ် ဒီးအဝဲသ့ၣ် ရဲၣ်လီၤကျဲၤလီၤဝဲ ယဟိဝၤပှၤအုၣ်အသးတဖၣ် အတၢ်မၤ. ဒီးယ့ၣ်ၡူးဟံးစုနဲၣ်ကျဲဝဲ ခရံာ်ဖိလၢညါတဖၣ် ဒ်န့ၣ်စ့ၢ်ကီးလီၤ. ကွၢ်တၢ်ဂီၤမူ.

ဖး ၁ ကရံၣ်သူး ၁၄:​၃၃, ၄၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ယဟိဝၤယွၤ အဲၣ်ဒိးလၢ အပှၤအုၣ်အသးတဖၣ် ကအိၣ်ဒီး တၢ်ရဲၣ်တၢ်ကျဲၤ လီၤတံၢ်လီၤဆဲးန့ၣ် လံာ်စီဆှံအဆၢတဖၣ်အံၤ ပာ်ဖျါထီၣ်ဝဲဒ်လဲၣ်.

၄. ကုၢ်လၢအတီ ရဲၣ်လီၤကျဲၤလီၤဝဲ တၢ်စံၣ်တဲၤတဲလီၤတၢ်မၤ

တၢ်စံၣ်တဲၤတဲလီၤတၢ်မၤန့ၣ် မ့ၢ်ဝဲတၢ်မၤ လၢအရ့ဒိၣ်ကတၢၢ်တခါ လၢခရံာ်ဖိလၢညါတဖၣ်အဂီၢ်. ဖး မၤတၢ် ၈:​၁၄, ၂၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• မတၤတဖၣ် ဟံးစုနဲၣ်ကျဲ ခရံာ်ဖိလၢညါတဖၣ် အတၢ်စံၣ်တဲၤတဲလီၤတၢ်မၤလဲၣ်.

• ဖဲစီၤပ့းတရူး ဒီးစီၤယိၤဟၣ် ဒိးန့ၢ်ဘၣ် တၢ်ဟံးစုနဲၣ်ကျဲလၢ တၢ်မၢဖိအဂၤတဖၣ် အအိၣ်အခါ အဝဲသ့ၣ်မၤဝဲဒ်လဲၣ်.

တၢ်စံၣ်တဲၤတဲလီၤတၢ်မၤ မ့ၢ်တၢ်မၤလၢ အရ့ဒိၣ်ကတၢၢ်တခါ လၢပှၤပၢဆှၢတၢ်ကမံးတံာ် ရဲၣ်လီၤကျဲၤလီၤဝဲ. ကွၢ်တၢ်ဂီၤမူ.

 ယ့ၣ်ၡူး ပာ်ဖျါထီၣ်ဝဲလၢ တၢ်စံၣ်တဲၤတဲလီၤတၢ်မၤန့ၣ် မ့ၢ်တၢ်မၤလၢ အရ့ဒိၣ်ဒိၣ်မး. ဖး မၢ်ကူး ၁၃:၁၀ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဘၣ်မနုၤအဃိ ပှၤပၢဆှၢတၢ်ကမံးတံာ် ထံၣ်ဝဲ တၢ်စံၣ်တဲၤတဲလီၤတၢ်မၤ လၢအရ့ဒိၣ်ဒိၣ်မးလဲၣ်.

• ဘၣ်မနုၤအဃိ ပလိၣ်ဘၣ် “ကုၢ်လၢအတီ ဒီးအကူၣ်တၢ်သ့” ဒ်သိး ကရဲၣ်လီၤကျဲၤလီၤဝဲ တၢ်စံၣ်တဲၤတဲလီၤတၢ်မၤ လၢဟီၣ်ခိၣ်ဒီဘ့ၣ်အဂီၢ်လဲၣ်.

၅. ကုၢ်လၢအတီ ဟ့ၣ်လီၤဝဲ တၢ်ဟံးစုနဲၣ်ကျဲ

ပှၤပၢဆှၢတၢ်ကမံးတံာ် ဟ့ၣ်လီၤဝဲ တၢ်ဟံးစုနဲၣ်ကျဲ လၢခရံာ်ဖိတဖၣ် လၢဟီၣ်ခိၣ်ဒီဘ့ၣ်အဂီၢ်. တချုးလၢ အဝဲသ့ၣ်ဆၢတဲာ်ဝဲလၢ ကဟ့ၣ်လီၤ တၢ်ဟံးစုနဲၣ်ကျဲဒံးဘၣ်န့ၣ် အဝဲသ့ၣ်မၤဝဲဒ်လဲၣ်. ပကကွၢ်သကိး ဘၣ်ဃးဒီး ပှၤပၢဆှၢတၢ်ကမံးတံာ် လၢခရံာ်ဖိလၢညါအစိၤန့ၣ် မၤတ့ၢ်ဝဲဒ်လဲၣ်. ဖး မၤတၢ် ၁၅:​၁, ၂ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• တၢ်ကီတၢ်ခဲ ဟဲအိၣ်ထီၣ် လၢခရံာ်ဖိလၢညါတဖၣ် အကျါဒ်လဲၣ်.

• ဒ်သိးကမၤဘၣ်ဂီၢ်က့ၤ တၢ်ကီတၢ်ခဲတခါအံၤအဂီၢ် စီၤပီလူး, စီၤဘၢ်နါဘၤ ဒီးပှၤဂၤတဖၣ် လဲၤဃ့တၢ်ဟံးစုနဲၣ်ကျဲ လၢမတၤတဖၣ်အအိၣ်လဲၣ်.

ဖး မၤတၢ် ၁၅:​၁၂-၁၈, ၂၃-၂၉ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပှၤပၢဆှၢတၢ်ကမံးတံာ် လၢအအိၣ်လၢ ခရံာ်ဖိလၢညါအစိၤန့ၣ် ဒ်သိး အဝဲသ့ၣ် ကဒိးန့ၢ်ဘၣ် ကစၢ်ယွၤအတၢ်ဟံးစုနဲၣ်ကျဲအဂီၢ် တချုးလၢ အဝဲသ့ၣ်ဆၢတဲာ်တၢ်ဒံးဘၣ်န့ၣ် အဝဲသ့ၣ်မၤဝဲဒ်လဲၣ်.​—ကွၢ် အဆၢဖိ ၁၂, ၁၅ ဒီး ၂၈.

ဖး မၤတၢ် ၁၅:​၃၀, ၃၁ ဒီး ၁၆:​၄, ၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ခရံာ်ဖိလၢညါတဖၣ်န့ၣ် ဖဲအဝဲသ့ၣ် ဒိးန့ၢ်ဘၣ် တၢ်ဟံးစုနဲၣ်ကျဲလၢ ပှၤပၢဆှၢတၢ်ကမံးတံာ်အအိၣ်အခါ အဝဲသ့ၣ်မၤဝဲဒ်လဲၣ်.

• ခီဖျိလၢ အဝဲသ့ၣ် မၤထွဲ ပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲအဃိ ယဟိဝၤယွၤ ဆိၣ်ဂ့ၤအဝဲသ့ၣ်ဒ်လဲၣ်.

ဖး ၂ တံၤမသ့း ၃:၁၆ ဒီး ယၤကိာ် ၁:၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• မုၢ်မဆါတနံၤအံၤ ဖဲပှၤပၢဆှၢတၢ်ကမံးတံာ် ဆၢတဲာ်တၢ်အခါ အဝဲသ့ၣ် ဃုတၢ်ဟံးစုနဲၣ်ကျဲဖဲလဲၣ်.

 တၢ်ဂ့ၢ်လၢအရ့ဒိၣ်

ပှၤပၢဆှၢတၢ်ကမံးတံာ် မ့ၢ်ဝဲ “ကုၢ်လၢအတီ ဒီးအကူၣ်တၢ်သ့” လၢခရံာ်ဃုထၢထီၣ်ဝဲ. ဒီးကုၢ်အံၤ ဟ့ၣ်လီၤဝဲ တၢ်ဟံးစုနဲၣ်ကျဲ ဒီးနီၢ်သးတၢ်အီၣ်လၢ ခရံာ်ဖိလၢ ဟီၣ်ခိၣ်ဒီဘ့ၣ်အဂီၢ်.

တၢ်ကွၢ်ကဒါက့ၤ

• မတဂၤ ဃုထၢထီၣ် “ကုၢ်လၢအတီ ဒီးအကူၣ်တၢ်သ့” လဲၣ်.

• ပှၤပၢဆှၢတၢ်ကမံးတံာ် ကွၢ်ထွဲမၤစၢၤပှၤဒ်လဲၣ်.

• နနာ်လၢ ပှၤပၢဆှၢတၢ်ကမံးတံာ် မ့ၢ်ဝဲ “ကုၢ်လၢအတီ ဒီးအကူၣ်တၢ်သ့” ဧါ.