တၢ်မၤလိ ၅၅
ဆီၣ်ထွဲမၤစၢၤ တၢ်အိၣ်ဖှိၣ်
လၢဟီၣ်ခိၣ်ဒီဘ့ၣ်န့ၣ် တၢ်အိၣ်ဖှိၣ်အိၣ်ဝဲ အဖျၢၣ်လၢအကထိညါ. ဒီးယဟိဝၤယွၤ အခ့အပှၤတဖၣ် ဘူၣ်ထီၣ်ဘါထီၣ်အီၤလၢ တၢ်သးခုအပူၤဖဲန့ၣ်လီၤ. အဝဲသ့ၣ် ပာ်လုၢ်ပာ်ပှ့ၤ တၢ်ဟံးစုနဲၣ်ကျဲ လၢအဝဲသ့ၣ် ဒိးန့ၢ်ဘၣ်ဝဲ ဒီးအဝဲသ့ၣ် သးအိၣ်ဆီၣ်ထွဲမၤစၢၤ တၢ်အိၣ်ဖှိၣ်လၢကျဲအါဘိ. နၤမီၤ နသးအိၣ်ဆီၣ်ထွဲမၤစၢၤ နတၢ်အိၣ်ဖှိၣ်ဒ်န့ၣ်ဧါ.
၁. နသူနတၢ်ဆၢကတီၢ် ဒီးနဂံၢ်နဘါ လၢကဆီၣ်ထွဲမၤစၢၤ တၢ်အိၣ်ဖှိၣ်ကသ့ဒ်လဲၣ်.
ပဝဲခဲလၢာ် ပမၤစၢၤပတၢ်အိၣ်ဖှိၣ်သ့. အဒိ လၢနတၢ်အိၣ်ဖှိၣ်အပူၤန့ၣ် ပှၤသးပှၢ် မ့တမ့ၢ် ပှၤလၢအနီၢ်ခိဂံၢ်စၢ်ဘါစၢ်တဖၣ် အိၣ်ဧါ. မ့ၢ်အိၣ်န့ၣ် ဒ်သိးအဝဲသ့ၣ် ကလဲၤထီၣ်တၢ်အိၣ်ဖှိၣ်အဂီၢ် နမၤစၢၤအဝဲသ့ၣ်သ့ဧါ. မ့တမ့ၢ်ဘၣ်န့ၣ် နမၤစၢၤအဝဲသ့ၣ်လၢ တၢ်အဂၤတဖၣ် ဒ်သိးဒီး နလဲၤပှ့ၤတၢ်လၢ အဝဲသ့ၣ်အဂီၢ် မ့တမ့ၢ် မၤကဆှဲကဆှီန့ၢ် အဝဲသ့ၣ်အဟံၣ် ကသ့ဧါ. (ဖး ယၤကိာ် ၁:၂၇.) တကးဒံးဘၣ် ပမၤကဆှီစၢၤ ဒီးကွၢ်ထွဲကတီၤစၢၤ ပတၢ်အိၣ်ဖှိၣ်အလီၢ်သ့. ဒီးပကမၤဒ်န့ၣ်အဂီၢ် ပှၤတမၢဆူၣ်ပှၤ နီတဂၤဘၣ်. ပ ‘ဟ့ၣ်လီၤပသးလၢ တၢ်သးအိၣ်အပူၤ’ ဒ်န့ၣ် ခီဖျိလၢ ပအဲၣ်ကစၢ်ယွၤ ဒီးပဒီပုၢ်ဝဲၢ်တဖၣ်အဃိလီၤ.—စံးထီၣ်ပတြၢၤ ၁၁၀:၃.
ယဟိဝၤပှၤအုၣ်အသး လၢအဒိးဘျၢထံဝံၤတဖၣ် ဆီၣ်ထွဲမၤစၢၤ တၢ်အိၣ်ဖှိၣ် လၢကျဲအဂၤတဖၣ်သ့ဝဲ. အဒိ ဒီပုၢ်ဝဲၢ်ခွါလၢ အတုၤထီၣ်ထီၣ်ဘး လၢနီၢ်သးတခီန့ၣ် အဝဲသ့ၣ် ကဲထီၣ် တၢ်အိၣ်ဖှိၣ်အပှၤမၤစၢၤတၢ်သ့ ဒီးလၢခံ အဝဲသ့ၣ်ကဲထီၣ် တၢ်အိၣ်ဖှိၣ်သးပှၢ်သ့စ့ၢ်ကီး. ဒီပုၢ်ဝဲၢ်မုၣ်မ့ၢ်ဂ့ၤ ဒီပုၢ်ဝဲၢ်ခွါမ့ၢ်ဂ့ၤ ကဲထီၣ် ပှၤလဲၤလၢညါ ဒီးဆီၣ်ထွဲမၤစၢၤ တၢ်စံၣ်တဲၤတဲလီၤတၢ်မၤသ့ဝဲ. တကးဒံးဘၣ် ယဟိဝၤပှၤအုၣ်အသးတနီၤ မၤစၢၤတၢ်ခီဖျိလၢ အဝဲသ့ၣ်တ့ထီၣ် တၢ်အိၣ်ဖှိၣ်အလီၢ်တဖၣ် ဒီးလဲၤသုးလီၢ်သုးကျဲ လၢတၢ်လီၢ်လၢ ပှၤလိၣ်ဘၣ် တၢ်မၤစၢၤလီၤ.
၂. ပကျိၣ်စ့ ဒီးတၢ်လၢအိၣ်ဒီးပှၤန့ၣ် ပသူအီၤလၢ ပကဆီၣ်ထွဲမၤစၢၤ တၢ်အိၣ်ဖှိၣ် ကသ့ဒ်လဲၣ်.
ပအဲၣ်ဒိး ‘မၤလၤကပီၤ ယဟိဝၤယွၤ ခီဖျိဟ့ၣ်အီၤ တၢ်လၢအဂ့ၤကတၢၢ် လၢအအိၣ်ဒီးပှၤ.’ (ကတိၤဒိ ၃:၉) ဒီးပမ့ၢ်ဟ့ၣ်တၢ်မၤဘူၣ် ဒီးတၢ်အဂၤတဖၣ် လၢကဆီၣ်ထွဲမၤစၢၤ တၢ်အိၣ်ဖှိၣ် ဒီးတၢ်စံၣ်တဲၤတဲလီၤတၢ်မၤ လၢဟီၣ်ခိၣ်ဒီဘ့ၣ်န့ၣ် ပကသးခုဖးဒိၣ်ညါ. (ဖး ၂ ကရံၣ်သူး ၉:၇.) တၢ်မၤဘူၣ်လၢ ပဟ့ၣ်လီၤတဖၣ်အံၤ ပှၤသူစ့ၢ်ကီးအီၤ လၢကဆီၣ်ထွဲမၤစၢၤ ဒီပုၢ်ဝဲၢ်လၢအအိၣ်လၢ ကလံၤမုၢ်ဒီးဟီၣ်ခိၣ်ဟူး အိၣ်ထီၣ်ဝဲအလီၢ်. ယဟိဝၤယွၤ ဟ့ၣ်ပှၤတၢ်ခွဲးတၢ်ယာ် လၢပကပာ်ဖျါထီၣ် ပတၢ်အဲၣ်လၢအဖီခိၣ် ခီဖျိ ပဟ့ၣ်အီၤ တၢ်လၢအအိၣ်ဒီးပှၤလီၤ. ပှၤအါဂၤ ဆၢတဲာ်လီၤအသးလၢက “ပာ်လီၤဆီဃာ်” ကျိၣ်စ့တနီၤ ဒ်သိး ကဟ့ၣ်တၢ်မၤဘူၣ် ထီဘိအဂီၢ်. (ဖး ၁ ကရံၣ်သူး ၁၆:၂.) ပပၢနုာ်တၢ်မၤဘူၣ် လၢတၢ်မၤဘူၣ်အတလါပူၤ လၢပတၢ်အိၣ်ဖှိၣ်အလီၢ်သ့ မ့တမ့ၢ် ပဟ့ၣ်တၢ်မၤဘူၣ်လၢ online အဖီခိၣ်လၢ donate.pr418.com အပူၤသ့.
ဃုသ့ၣ်ညါအါထီၣ်
ခဲအံၤ ပကတဲသကိး ဘၣ်ဃးဒီး နဆီၣ်ထွဲမၤစၢၤ တၢ်အိၣ်ဖှိၣ် ကသ့လၢကျဲဒ်လဲၣ်.
၃. ပဟ့ၣ်လီၤ ပကျိၣ်စ့ ဒီးတၢ်လၢအိၣ်ဒီးပှၤသ့
ယဟိဝၤယွၤ ဒီးယ့ၣ်ၡူး အဲၣ်ဝဲပှၤလၢ အဟ့ၣ်တၢ်လၢ တၢ်သူၣ်ဖှံသးညီအပူၤ. အဒိ မုၣ်ကမဲလၢ အဖှီၣ်တဂၤ အစ့အိၣ်ထဲတစဲး သနာ်က့ အဟ့ၣ်ဒံး တၢ်မၤဘူၣ်အဃိ ယ့ၣ်ၡူး ပတြၢၤအီၤ. ဖး လူၤကၣ် ၂၁:၁-၄ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
ဒ်သိး ယဟိဝၤယွၤ ကသးခုအဂီၢ် ပကဘၣ်ဟ့ၣ် တၢ်မၤဘူၣ် အါအါဧါ.
-
ပမ့ၢ်ဟ့ၣ်တၢ်လၢ တၢ်သူၣ်အိၣ်သးအိၣ်အပူၤန့ၣ် ယဟိဝၤယွၤ ဒီးယ့ၣ်ၡူး ကသးခုဧါ.
တၢ်မၤဘူၣ်လၢ ပဟ့ၣ်လီၤန့ၣ် ပှၤသူဝဲဒ်လဲၣ်. ဒ်သိးနကသ့ၣ်ညါဘၣ်အဂီၢ် ကွၢ်တၢ်ဂီၤမူ. ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
-
တၢ်မၤဘူၣ်လၢ ပဟ့ၣ်လီၤန့ၣ် ပှၤသူဝဲလၢ ကမၤစၢၤ တၢ်အိၣ်ဖှိၣ် လၢဟီၣ်ခိၣ်ဒီဘ့ၣ်ဒ်လဲၣ်.
၄. ပလဲၤမၤစၢၤတၢ်လၢ ပနီၢ်ကစၢ်သ့
လၢလံာ်စီဆှံပူၤန့ၣ် ပထံၣ်ဘၣ်လၢ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ဟ့ၣ်လီၤတၢ်မၤဘူၣ် တကးဒံးဘၣ် အဝဲသ့ၣ် ကွၢ်ထွဲကတီၤဝဲ အဝဲသ့ၣ် အတၢ်ဘူၣ်ထီၣ်ဘါထီၣ်ဘါထီၣ်အလီၢ် လၢတၢ်သူၣ်ဆူၣ်သးဆူၣ်အပူၤ. ဖး ၂ ကွဲးနီၣ်တၢ် ၃၄:၉-၁၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ပှၤအံၣ်စရ့လးဖိ ကိးဂၤဒဲး ကွၢ်ထွဲကတီၤစၢၤ ယဟိဝၤယွၤ အဟံၣ်ဒ်လဲၣ်.
ဒ်သိး နကထံၣ်ဘၣ်လၢ ယဟိဝၤပှၤအုၣ်အသးတဖၣ် မၤထွဲဝဲ ပှၤအံၣ်စရ့လးဖိ အဒိအတဲာ်ဒ်လဲၣ်အဂီၢ် ကွၢ်တၢ်ဂီၤမူ. ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
-
ဘၣ်မနုၤအဃိ အရ့ဒိၣ်လၢ ပကဘၣ်မၤကဆှဲကဆှီ ပတၢ်အိၣ်ဖှိၣ်အလီၢ်ထီဘိ ဒီးကွၢ်ကတီၤအီၤ ဂ့ၤဂ့ၤလဲၣ်.
-
နမၤစၢၤ ကသ့ဒ်လဲၣ်.
၅. ဒီပုၢ်ဝဲၢ်ခွါတဖၣ် ဂုာ်ကျဲးစၢးဒ်သိး ကဒိးန့ၢ်ဘၣ်အါထီၣ်မူဒါ လၢတၢ်အိၣ်ဖှိၣ်အပူၤသ့
လံာ်စီဆှံ ဟ့ၣ်ဂံၢ်ဟ့ၣ်ဘါ ခရံာ်ဖိပိာ်ခွါတဖၣ် ဒ်သိး ကဂုာ်ကျဲးစၢး လၢအဂ့ၤကတၢၢ် လၢကဆီၣ်ထွဲ တၢ်အိၣ်ဖှိၣ်အဂီၢ်. ဒ်သိး နကထံၣ်ဘၣ် တၢ်အဒိအဂီၢ် ကွၢ်တၢ်ဂီၤမူ. ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
-
လၢတၢ်ဂီၤမူအပူၤ ဒီပုၢ်ဝဲၢ်ခွါ ရါယၢၤ ဂုာ်ကျဲးစၢး ဆီၣ်ထွဲအါထီၣ် တၢ်အိၣ်ဖှိၣ်ဒ်လဲၣ်.
ဒီပုၢ်ဝဲၢ်ခွါတဖၣ် လၢအကဲ တၢ်အိၣ်ဖှိၣ်အပှၤမၤစၢၤတၢ် ဒီးတၢ်အိၣ်ဖှိၣ်သးပှၢ်တဖၣ် ကဘၣ်အိၣ်ဒီး တၢ်ဂ့ၤတၢ်ဝါဒ်လဲၣ်န့ၣ် လံာ်စီဆှံ ပာ်ဖျါထီၣ်န့ၢ်ပှၤ. ဖး ၁ တံၤမသ့း ၃:၁-၁၃ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ပှၤတနီၤ သံကွၢ်ဝဲလၢ– “ကျိၣ်စ့လၢ ယဟိဝၤပှၤအုၣ်အသးတဖၣ် သူဝဲလၢအတၢ်မၤအဂီၢ်န့ၣ် အဝဲသ့ၣ် ဒိးန့ၢ်ဘၣ်ဝဲဖဲလဲၣ်.”
-
ပှၤမ့ၢ်သံကွၢ်နၤ ဒ်န့ၣ်န့ၣ် နကစံးဆၢက့ၤအီၤဒ်လဲၣ်.
တၢ်ဂ့ၢ်လၢအရ့ဒိၣ်
ပမ့ၢ်ဆီၣ်ထွဲတၢ်အိၣ်ဖှိၣ် ခီဖျိ ပကျိၣ်ပစ့မ့ၢ်ဂ့ၤ, ပတၢ်ဆၢကတီၢ်မ့ၢ်ဂ့ၤ ဒီးပဂံၢ်ပဘါမ့ၢ်ဂ့ၤ ယဟိဝၤယွၤ ပာ်လုၢ်ပာ်ပှ့ၤဝဲ ပတၢ်ဂုာ်ကျဲးစၢးဖးဒိၣ်ညါ.
တၢ်ကွၢ်ကဒါက့ၤ
-
ဒ်သိးပကဆီၣ်ထွဲ တၢ်အိၣ်ဖှိၣ်အဂီၢ် ပသူတၢ်ဆၢကတီၢ် ဒီးပဂံၢ်ပဘါ ကသ့ဒ်လဲၣ်.
-
ဒ်သိးပကဆီၣ်ထွဲ တၢ်အိၣ်ဖှိၣ်အဂီၢ် ပသူပကျိၣ် ပစ့ ဒီးတၢ်လၢအိၣ်ဒီးပှၤ ကသ့ဒ်လဲၣ်.
-
နအဲၣ်ဒိး ဆီၣ်ထွဲတၢ်အိၣ်ဖှိၣ် လၢကျဲဒ်လဲၣ်.
ဃုသ့ၣ်ညါ
ဖးဘၣ်ဃးဒီး ဘၣ်မနုၤအဃိ ကစၢ်ယွၤ တဃ့ တၢ်ဆံဆဲၣ်ပူတပူ လၢၤဘၣ်လဲၣ်.
“ဘၣ်ဃးဒီး တၢ်ဆံဆဲၣ်ပူန့ၣ် လံာ်စီဆှံတဲဝဲဒ်လဲၣ်” (တၢ်မၤလိလၢ အအိၣ်လၢ online အဖီခိၣ်)
လံာ်စီဆှံပာ်ဖျါထီၣ်ဝဲလၢ မူဒါတနီၤန့ၣ် ထဲဒၣ်ပိာ်ခွါလၢအဒိးဘျၢထံဝံၤတဖၣ် ကဘၣ်မၤဝဲ. ဘၣ်ဆၣ် ပိာ်မုၣ်လၢအဒိးဘျၢထံဝံၤတဖၣ် မ့ၢ်ဘၣ်မၤဝဲ မူဒါအံၤန့ၣ် အကဘၣ်မၤဝဲဒ်လဲၣ်.
ကွၢ်တၢ်ဂီၤမူ လၢအပာ်ဖျါထီၣ် ယဟိဝၤပှၤအုၣ်အသးတနီၤ တူၢ်ဆါအသး ဒီးပာ်ဖျါထီၣ်တၢ်သးဒူ ဒ်သိး ကလဲၤဆှၢလံာ်လဲၢ်တဖၣ်လၢ အဒီပုၢ်ဝဲၢ်ခရံာ်ဖိတဖၣ်အအိၣ်.
ပတၢ်ကရၢကရိ ဒိးန့ၢ်ဘၣ် ကျိၣ်စ့တၢ်မၤစၢၤ လၢပတၢ်မၤအဂီၢ် ဒီးတၢ်ဘူၣ်တၢ်ဘါလၢအဂၤတဖၣ် ဒိးန့ၢ်ဘၣ်ကျိၣ်စ့တၢ်မၤစၢၤန့ၣ် တဒ်သိးလိာ်အသးဘၣ်.
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် မၤလိလံာ်စီဆှံဒီးပှၤဂၤန့ၣ် မ့ၢ်မနုၤလဲၣ်
ယဟိဝၤပှၤအုၣ်အသးတဖၣ် ကွဲးမုာ်ပှၤဂၤလၢ ကမၤလိလံာ်စီဆှံ အတၢ်ရဲၣ်တၢ်ကျဲၤလၢ တလိၣ်ဟ့ၣ်အပှ့ၤဘၣ်န့ၣ် နသူ လံာ်စီဆှံလၢ နဘၣ်သးအီၤ တဘ့ၣ်ဘ့ၣ်သ့လီၤ. နကွဲမုာ် နဟံၣ်ဖိဃီဖိ ဒီးနတံၤသကိးတဖၣ်သ့လီၤ.
