ဆူဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်–

လၢညါန့ၣ် ဝံယဃ့းစက့လး ထံၣ်ဘၣ်ဝဲ တၢ်ထံၣ်လၢညါခီတခါလီၤ. အဝဲထံၣ်ဝဲ မူခိၣ်အလ့ၣ်ကဟၣ်ဖးဒိၣ်တခိၣ် လၢတၢ်ပၢကစၢ် အဒိၣ်ကတၢၢ်တဂၤ ပၢဆှၢဝဲလီၤ. ဒီးလ့ၣ်ကဟၣ် သုးအသးန့ၣ် လီၤကမၢကမၣ်ဒိၣ်မးလီၤ. သုးအသးသ့ ကိးကပၤဒဲး ဒီးချ့ဒ်လီဝၢ်ဒံးအသိးလီၤ. ဖဲအလဲၤတၢ် တကပၤဂ့ၤတကပၤဂ့ၤ တကဘှၢလီၤဘၣ်.​—ဃ့း. ၁:၄, ၉, ၁၂, ၁၄, ၁၆-၂၇.

တၢ်ထံၣ်လၢညါခီအံၤ ဒုးသ့ၣ်နီၣ်ထီၣ်ပှၤလၢ ယဟိဝၤယွၤ အတၢ်ကရၢကရိလၢ မူခိၣ်န့ၣ် မၤတၢ်မၤထီဘိလီၤ. မ့မ့ၢ်လၢ ဟီၣ်ခိၣ်တခီမီၤ. လၢအပူၤကွံာ်တၢ်မၤအနံၣ်အတီၢ်ပူၤ ပာ်ဖျါထီၣ်န့ၢ်ပှၤလၢ ကစၢ်ယွၤသုးဝဲ အခ့အပှၤလၢဟီၣ်ခိၣ်တဖၣ် ချ့မးလီၤ.

အမဲရကၤ ဘရိးကလ့ၣ် (Brooklyn) ဘ့ၤသ့လးဖိတနီၤန့ၣ် ဘၣ်သုးအသးဆူ ပတၢ်ကရၢကရိ အဝဲၤလီၢ်ခိၣ်သ့ၣ်အသီလၢ ဝီဝံး (Warwick), နူယီး ဒီးတနီၤနီၤန့ၣ် ဘၣ်လဲၤအိၣ်လၢတၢ်လီၢ်အဂၤ ဒီးတနီၤန့ၣ်က့ၤမၤ ကဒါက့ၤတၢ်လၢ တၢ်စံၣ်တဲၤတဲလီၤတၢ်မၤအပူၤ အဃိအတၢ်မၤအါဝဲလီၤ. ပှၤဘ့ၤသ့လးဖိလၢ ဟီၣ်ခိၣ်ဒီဘ့ၣ်န့ၣ် အဝဲသ့ၣ် အတၢ်ဖံးတၢ်မၤအါ လၢတၢ်သူၣ်ထီၣ်ဘှီထီၣ်, တၢ်ဘှီဂ့ၤထီၣ်က့ၤတၢ် ဒီးတၢ်သုးလီၢ်သုးကျဲဆူ တၢ်လီၢ်အဂၤန့ၣ်လီၤ. မ့မ့ၢ်နၤမီၤ, နမ့ၢ်တသုးလီၢ်သုးကျဲဆူ တၢ်လီၢ်အဂၤသနာ်က့ နတၢ်မၤကအါလၢ ကျဲအဂၤတဖၣ်စ့ၢ်ကီးလီၤ.

ပှၤပၢဆှၢတၢ်ကမံးတံာ်န့ၣ် အသူၣ်ခုသးခုဒီး န့ၢ်ဂံၢ်န့ၢ်ဘါ ခီဖျိထံၣ်ဘၣ်ဝဲ ကစၢ်ယွၤအခ့အပှၤလၢ ဟီၣ်ခိၣ်ဒီဘ့ၣ်န့ၣ် အတၢ်မၤအါလၢ မၤသကိးတၢ်ဒီး  ယဟိဝၤယွၤအတၢ်ကရၢကရိအဃိလီၤ. ပှၤအါဂၤန့ၣ် သုးလီၢ်သုးကျဲလၢ တၢ်လီၢ်လၢအလိၣ်ဘၣ်တၢ်မၤစၢၤ ဒီးပှၤတနီၤနီၤန့ၣ် မၤတၢ်သးခုကစီၣ် တၢ်မၤလၢကျဲအဂၤ ဒ်သိးဒီးကလဲၤစံၣ်တဲၤတဲလီၤတၢ်လၢ ကျိာ်အဂၤလီၤ. ပှၤအါဂၤန့ၣ် မၤကွၢ်ဝဲတၢ်စံၣ်တဲၤတဲလီၤတၢ် အကျိၤအကျဲလၢ တမၤညီနုၢ်ဝဲန့ၣ်လီၤ. ဒီးပှၤတနီၤနီၤန့ၣ် ပၣ်ဃုာ်အါထီၣ်လၢ တၢ်စံၣ်တဲၤတဲလီၤတၢ်မၤအပူၤ လၢကျဲအဂၤတဖၣ်လီၤ. ပှၤသူၣ်က့သးပှၢ်တဖၣ်မ့ၢ်ဂ့ၤ ပှၤလၢအတၢ်အိၣ်ဆူၣ်အိၣ်ချ့ တဂ့ၤတဖၣ်မ့ၢ်ဂ့ၤ, ခရံာ်ဖိခဲလၢာ်လၢ အအိၣ်ဒီးတၢ်သးတီတဖၣ်န့ၣ် ဃ့ၢ်ပြၢတၢ်လၢ သးသမူတၢ်ဃ့ၢ်ပြၢတၢ်အပူၤလီၤ. ပမ့ၢ်ဆဲးမၤယဟိဝၤယွၤအတၢ်မၤန့ၣ် မ့ၢ်ပပၣ်ဃုာ်လၢ တၢ်မၤလၢအပာ်ဖျါထီၣ်ဝဲ မုၣ်ကီၤလံၢ်မ့ၢ်ပှၤလီတၢ်န့ၣ်လီၤ.​—⁠၁ ကရံၣ်. ၉:၂၄.

ပနာ်သ့သပှၢ်ကတၢၢ်လၢ နီၢ်သးအတၢ်ဖံးတၢ်မၤ လၢပမၤအီၤတဖၣ်န့ၣ် ယဟိဝၤယွၤပာ်သူၣ်ပာ်သးဝဲလီၤ. (ဧ့ၤ. ၆:၁၀) နမၤယွၤအတၢ်မၤလၢ  တၢ်သူၣ်အိၣ်သးအိၣ်အပူၤန့ၣ် ဒုးသ့ၣ်နီၣ်ထီၣ်ပှၤလၢ စီၤအၤဘြၤဟၣ်ဒီး နီၢ်စၤရါအဂ့ၢ်လီၤ. ဖဲစီၤအၤဘြၤဟၣ် အသးအိၣ် ၇၀ ဘျဲၣ်န့ၣ် အဝဲဟးထီၣ်လၢပှၤက့ၤစ့းဖိ အိၣ်ဝဲဆိးဝဲအလီၢ်ဝ့ၢ်အူၢ် ဒီးလဲၤဝဲဆူ ကီၢ်ကနၤဧၣ်ဒီး အဟံၣ်ဖိဃီဖိတဖၣ်လီၤ. ဖဲန့ၣ်န့ၣ် ဘၣ်အိၣ်ဝဲလၢဒဲ အနံၣ်တကယၤတုၤအသံတစုလီၤ. အဝဲသ့ၣ် ဒီမိဝၤခံဂၤလၢာ် ပာ်ဖျါထီၣ်ဝဲ တၢ်သးအိၣ်ဟ့ၣ်လီၤသး သပှၢ်တၢၢ်လီၤ.​—⁠၁ မိၤ. ၁၁:၃၁; မၤတၢ်. ၇:​၂, ၃.

မ့မ့ၢ်နၤမီၤ, မ့ၢ်နပာ်ဖျါထီၣ် တၢ်ပာ်သူၣ်ပာ်သးဒ်အံၤဧါ. သုဝဲခဲလၢာ်န့ၣ် ဖဲဆၢကတီၢ်ကီခဲအံၤအတီၢ်ပူၤ သုအိၣ်ဒီးတၢ်သးတီဒီး သုမၤတၢ်မၤလၢ ယ့ၣ်ၡူးမၢပမၤန့ၣ်လီၤ. ယ့ၣ်ၡူးစံးဝဲလၢ– “မၤသးဒ်န့ၣ်ဒီး, လဲၤဒုးကဲထီၣ်ပှၤအကလုာ်တဖၣ် ခဲလၢာ်လၢယပျဲၢ်ယဘီၣ်တက့ၢ်. ဒီးဘျၢအီၤလၢပၢ်, ဒီးဖိခွါ, ဒီးသးစီဆှံအမံၤအပူၤတက့ၢ်.”​—⁠မး. ၂၈:⁠၁၉.

ယ့ၣ်ၡူးတဲဝဲတၢ်ကတိၤလၢ “လဲၤ” န့ၣ်အဲၣ်ဒိးစံးဝဲ ပကဘၣ်လဲၤ ဒီးမၤအတၢ်မၤလီၤ. လၢအပူၤကွံာ်တနံၣ်န့ၣ် ပထံၣ်ဘၣ် ခရံာ်အပျဲၢ်အဘီၣ်လၢ အသူၣ်ဆူၣ်သးဆူၣ်တဖၣ် မၤကဲထီၣ်လိၣ်ထီၣ်တၢ်အါမးအဃိ လီၤသူၣ်ခုသးခုဒိၣ်မးလီၤ. ပထံၣ်ဘၣ်လၢ ယဟိဝၤယွၤ ဆိၣ်ဂ့ၤဝဲ ပတၢ်စံၣ်တဲၤတဲလီၤတၢ်မၤလၢ ဟီၣ်ခိၣ်ဒီဘ့ၣ်န့ၣ်လီၤ.​—⁠မၢ်ကူး ၁၃:⁠၁၀.

ပှၤအါဂၤန့ၣ် တူၢ်လိာ်ဝဲ တၢ်သးခုကစီၣ်လီၤ. လၢအပူၤကွံာ်တနံၣ်န့ၣ် ပှၤစံၣ်တဲၤတဲလီၤတၢ်ဖိ အနီၣ်ဂံၢ်အိၣ်ဝဲ ၈,၃၄၀,၈၄၇ ဒီးတလါအတီၢ်ပူၤ ပှၤမၤလိလံာ်စီဆှံနီၣ်ဂံၢ်အိၣ်ဝဲ ၁၀,၁၁၅,၂၆၄ လီၤ. အဃိပသ့ၣ်ညါဘၣ်လၢ ယဟိဝၤယွၤ အလ့ၣ်ကဟၣ်န့ၣ် သုးအသးချ့မးလီၤ. ဒီးနၤစ့ၢ်ကီးနဂုာ်ကျဲးစၢးလီၤ. တချုးလၢ ယဟိဝၤယွၤ ကးတံာ် တၢ်အုၣ်က့ၤခီၣ်က့ၤ အတြဲၤဒံးဘၣ် ဖဲတၢ်ဆၢကတီၢ်အိၣ်တ့ၢ်ထဲ တစိၢ်ဖိအတီၢ်ပူၤန့ၣ် ဂုာ်ကျဲးစၢးဆူၣ်ဆူၣ်လၢ ကစၢ်ယွၤအတၢ်မၤအပူၤတက့ၢ်.

၂၀၁၇, လံာ်စီဆှံအဆၢလၢ တနံၣ်အဂီၢ်န့ၣ် မ့ၢ်ဝဲ “သတံၢ်သန့ၤနသးလၢယွၤ, ဒီးမၤဂ့ၤတၢ်တက့ၢ်” (စံး. ၃၇:⁠၃) ခီဖျိနဒိကနၣ် တၢ်ကတိၤဝဲအံၤ  ဒီးမၤတၢ်ဂ့ၤလၢအမ့ၢ် တၢ်မၤယဟိဝၤယွၤအတၢ်မၤအဃိ မ့ၢ်နပာ်ဖျါထီၣ်လၢ နသန့ၤနသးလၢအီၤလီၤ. ထီဘိန့ၣ် သ့ၣ်နီၣ်ထီၣ်လၢ နတအိၣ်ထဲတဂၤဧိၤဘၣ်. ယ့ၣ်ၡူးတဲဝဲလၢ “ကွၢ်ကွၢ်, ယအိၣ်ဒီးသုကိးမုၢ်နံၤမုၢ်နၤဒဲး, တုၤတၢ်အစိၤကတၢၢ်” န့ၣ်လီၤ.​—⁠မး. ၂၈:⁠၂၀.

နမ့ၢ်မၤယဟိဝၤယွၤအတၢ်မၤလၢ တၢ်သးတီအပူၤန့ၣ် နနာ်သ့သပှၢ်ကတၢၢ်လၢ အဝဲကဆိၣ်ဂ့ၤနၤထီဘိလီၤ. နမၤကစၢ်ယွၤအတၢ်မၤ အါမ့ၢ်ဂ့ၤ, စှၤမ့ၢ်ဂ့ၤ နမ့ၢ်မၤလၢအဂ့ၤကတၢၢ် ဒီးနမ့ၢ်မၤအီၤ ခီဖျိလၢနအဲၣ်အီၤအဃိန့ၣ် ယဟိဝၤယွၤပာ်လုၢ်ပာ်ပှ့ၤဝဲလီၤ. ဖဲယဟိဝၤယွၤထံၣ်ဝဲလၢ နဟ့ၣ်အီၤအဂ့ၤကတၢၢ်အခါ အဝဲကသးခုဒီး ကဘၣ်အသးလီၤ. (၂ ကရံၣ်. ၉:​၆, ၇) အဃိဂုာ်ကျဲးစၢး သုးဘူးနသးဆူ ပၢ်လၢအပှဲၤဒီးတၢ်အဲၣ် တဂၤအံၤအအိၣ် ခီဖျိလၢ တၢ်ဃ့ထုကဖၣ်, တၢ်မၤလိလံာ်စီဆှံ, ထီၣ်တၢ်အိၣ်ဖှိၣ်ဒီး ပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ လၢတၢ်သူၣ်ဆူၣ်သးဆူၣ်အပူၤတက့ၢ်.

‘ဆၢကတီၢ်အိၣ်ထဲတစိၢ်ဖိ’ အဃိမုၣ်ကီၤလံၢ်ဂုာ်ကျဲးစၢးသူဝဲ ကျဲအါဘိ ဒ်သိးယွၤအခ့အပှၤခဲလၢာ် အတၢ်သးတီဒီးယဟိဝၤယွၤ ကဟးဂီၤကွံာ်ဝဲအဂီၢ်လီၤ. (လီၣ်. ၁၂:⁠၁၂) နမ့ၢ်သုးဘူးနသးဆူ ကစၢ်ယဟိဝၤယွၤအအိၣ်န့ၣ် မုၣ်ကီၤလံၢ် မၤနၢၤနၤတသ့နီတဘျီဘၣ်. (စံး. ၁၆:⁠၈) သ့ၣ်နီၣ်ထီၣ်လၢ ပအဲၣ်သုဒိၣ်မး ဒီးပပာ်လုၢ်ပာ်ပှ့ၤ သုတၢ်ဆီၣ်ထွဲမၤစၢၤ ယွၤအဘီအမုၢ် လၢမုၢ်နံၤခံကတၢၢ်အံၤ အတီၢ်ပူၤန့ၣ်လီၤ.

သုဒီပုၢ်ဝဲၢ်တဖၣ်,

ယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ်