ပှၤလၢအတူၢ်လိာ်ပှၤတမှံၤ ပှၤလၢအတူၢ်လိာ်ပှၤတမှံၤတဖၣ်န့ၣ်​ ဘၣ်တၢ်ဟ့ၣ်အီၤမူဒါလၢ ကမၤစၢၤနၤအဂီၢ်လီၤ. ဝံသးစူၤ ဒိကနၣ်အဝဲသ့ၣ်​ အတၢ်နဲၣ်လိလၢဘၣ်ဃးဒီး တၢ်ပာ်ကတီၢ်ကါအလီၢ်မ့ၢ်ဂ့ၤ, တၢ်နဲၣ်လိလၢ တၢ်လဲၤထီၣ်က့ၤလီၤလၢ ဘျီၣ်ဒိၣ်အပူၤမ့ၢ်ဂ့ၤ, တၢ်ဟံန့ၢ်ဆိပာ်တၢ်လီၢ်ဒီး တၢ်ဂ့ၢ်အဂၤတဖၣ်.

တၢ်ဒိးဘျၢထံ ပှၤလၢကဒိးဘျၢထံတဖၣ်​ ကဆ့ၣ်နီၤအဂီၢ်န့ၣ်​ ဘၣ်တၢ်ကတဲာ်ကတီၤန့ၢ်အဝဲသ့ၣ်​ တၢ်လီၢ်လၢခးဆ့ၣ်နီၤ လၢအအိၣ်လၢ တၢ်မဲာ်ညါကတၢၢ်. ဖဲမုၢ်ဃုနံၤဂီၤခီ တချုးလၢ တၢ်ဒိးဘျၢထံတၢ်စံၣ်တဲၤတဲလီၤတၢ် စးထီၣ်ဒံးဘၣ်န့ၣ်​ ပှၤလၢကဘျၢထံတဖၣ်​ ကြၢးဆ့ၣ်နီၤဆိပာ်လၢ တၢ်လီၢ်လၢဘၣ်တၢ်ပာ်ပနီၣ်န့ၢ်အီၤလၢ အဝဲသ့ၣ်အဂီၢ်. ကြၢးဟဲစိာ်ဝဲ ခိၣ်ဖၢၣ်​ ဒီးဟဲကူကၤတၢ်ကူတၢ်ကၤလၢ အကြၢးဝဲဘၣ်ဝဲ.

တၢ်မၤဘူၣ်တဖၣ်​ ဖဲပထီၣ်တၢ်အိၣ်ဖှိၣ်ဖးဒိၣ်အံၤအဆၢကတီၢ် ဒ်သိး ပကအိၣ်ဒီးတၢ်သးခုအဂီၢ်န့ၣ်​ တၢ်လၢာ်ဘူၣ်လၢာ်စ့ၤလၢ တၢ်ငါတၢ်လီၢ်လၢအကြၢးအဘၣ်, တၢ်ကလုၢ်ဒၢ ဒီးတၢ်အဂၤတဖၣ်အဂီၢ်အိၣ်ဝဲ. တၢ်မၤဘူၣ်လၢနထၢနုာ်အီၤန့ၣ်​ ကဘၣ်တၢ်သူအီၤလၢ တၢ်လၢာ်ဘူၣ်လၢာ်စ့ၤအံၤအဂီၢ်ဒီး ကကဲထီၣ်စ့ၢ်ကီး တၢ်မၤစၢၤလၢ ဟီၣ်ခိၣ်ဒီဘ့ၣ်တၢ်မၤအဂီၢ်လီၤ. ဒ်သိးနထံၣ်တၢ်မၤဘူၣ်တလါကညီအဂီၢ် တၢ်မၤဘူၣ်တလါတဖၣ်န့ၣ်​ ပှၤပာ်လီၤအီၤလၢ တၢ်လီၢ်ကိးပူၤဒဲးလၢဘျီၣ်ဒိၣ်အပူၤ. နကဟ့ၣ်တၢ်မၤဘူၣ်အဂီၢ် နနုာ်လီၤလၢ donate.pr418.com သ့စ့ၢ်ကီး. ပပာ်လုၢ်ပာ်ပှ့ၤ တၢ်မၤဘူၣ်ခဲလၢာ်လီၤ. ပှၤပၢဆှၢတၢ်ကမံးတံာ်စံးဘျုးနၤဒိၣ်မး ခီဖျိနဟ့ၣ်တၢ်မၤဘူၣ်လၢ တၢ်သူၣ်အိၣ်သးအိၣ်အပူၤ လၢဟီၣ်ခိၣ်ဒီဘ့ၣ်တၢ်မၤအဂီၢ်အဃိ.

တၢ်ကူစါယါဘျါဆိဝဲၤကျိၤ ဝံသးစူၤ သ့ၣ်နီၣ်ထီၣ်လၢ ဝဲၤကျိၤအံၤမ့ၢ်ထဲဒၣ်​ တၢ်ကဲထီၣ်သးသတူၢ်ကလာ်အဂီၢ်.

တၢ်ဟါမၢ် ဒီးတၢ်ထံၣ်က့ၤဝဲၤကျိၤ တၢ်လၢသုထၢန့ၢ်တဖၣ်န့ၣ်​ လဲၤဆှၢအီၤဆူ တၢ်ဟါမၢ်ဒီး တၢ်ထံၣ်က့ၤဝဲၤကျိၤ. သုတၢ်မ့ၢ်ဟါမၢ်တမံၤမံၤန့ၣ်​ လဲၤလၢဝဲၤကျိၤအံၤအအိၣ်ဒီး တဲဘၣ်အီၤသုတၢ်ဖိတၢ်လံၤလၢ အဟါမၢ်. ဖိသၣ်လၢအလီၤဖးဒီး အမိအပါ ဒီးလဲၤတဘၣ်က့ၤတဘၣ်တဖၣ်န့ၣ်​ ပကြၢးဆှၢအဝဲသ့ၣ်ဆူ ဝဲၤကျိၤအံၤ. ဘၣ်ဆၣ်ဝဲၤကျိၤအံၤ ပှၤတကြၢးပာ်အီၤဒ် တၢ်ကွၢ်ဖိသၣ်ဝဲၤကျိၤဘၣ်. ဝံသးစူၤပာ်သုဖိလၢ သုကပၤဒီးကွၢ်ထွဲအီၤ.

တၢ်လီၢ်တၢ်ကျဲ ဝံသးစူၤ ဆိမိၣ်န့ၢ်တၢ်လၢ ပှၤဂၤအဂီၢ်. သ့ၣ်နီၣ်ထီၣ်လၢ နဟံန့ၢ်ဆိပာ်တၢ်လီၢ်သ့ထဲဒၣ်​ ပှၤလၢအဒိးကါတခိၣ်ဃီဒီးနၤ, အိၣ်ဟံၣ်တဖျၢၣ်ဃီဒီးနၤ မ့တမ့ၢ် ပှၤလၢအမၤလိလံာ်စီဆှံဒီးနၤတဖၣ်အဂီၢ်လီၤ. ဝံသးစူၤ တဘၣ်ပာ်နတၢ်ဖိတၢ်လံၤလၢ လီၢ်ဆ့ၣ်နီၤလၢ နကပၤတဖၣ်အဖီခိၣ်တဂ့ၤ. နမ့ၢ်တမၤဒ်န့ၣ်ဘၣ်န့ၣ်​ ပှၤဂၤကသ့ၣ်ညါဝဲလၢ အဝဲသ့ၣ်​ ဟံန့ၢ်လီၢ်ဆ့ၣ်နီၤတဖၣ်အံၤသ့.

မုာ်သးမၤကလီဝဲၤကျိၤ နမ့ၢ်အဲၣ်ဒိးမၤစၢၤ တၢ်မၤလၢဘၣ်ဃးဒီးတၢ်အိၣ်ဖှိၣ်ဖးဒိၣ်န့ၣ်​ ဝံသးစူၤလဲၤဆှၢတၢ်ကစီၣ်လၢ မုာ်သးမၤကလီဝဲၤကျိၤတက့ၢ်.