တၢ်ကတိၤတၢ်အါတလၢ– တဘၣ်ဆိကမိၣ်လၢ နကဘၣ်တဲနၢ်ပၢၢ်အီၤ တၢ်ဂ့ၢ်ကိးမံၤဒဲးတဂ့ၤ. ယ့ၣ်ၡူးသူဝဲတၢ်သံကွၢ် ဒ်သိးကမၤစၢၤပှၤဟီၣ်ခိၣ်ဖိတဖၣ် လၢကဆိကမိၣ်တၢ် ဒီးနၢ်ပၢၢ်ထီၣ်တၢ်လၢ အဝဲအဲၣ်ဒိးတဲဝဲတဖၣ်လီၤ. (မး. ၁၇:၂၄-၂၇) ပမ့ၢ်သံကွၢ်တၢ်သံကွၢ်န့ၣ် ပတၢ်မၤလိအံၤ ကလီၤသးစၢၢ်ဆၢ ဒီးကကဲထီၣ်တၢ်မၤစၢၤ ဒ်သိးပကသ့ၣ်ညါဘၣ် ပပှၤမၤလိလံာ်စီဆှံဖိ နၢ်ပၢၢ်ဝဲဒ်လဲၣ် ဒီးအတၢ်နာ်အိၣ်ဃာ်ဒ်လဲၣ်န့ၣ်လီၤ. (be 253 ¶3-4) ဖဲနသံကွၢ်တၢ်သံကွၢ်အခါ အိၣ်ဒီးတၢ်သူၣ်စူၤသးစူၤ ဒီးအိၣ်ခိးတၢ်စံးဆၢတက့ၢ်. ဒီးနပှၤမၤလိလံာ်စီဆှံဖိ စံးဆၢတၢ်မ့ၢ်ကမၣ်န့ၣ် တဘၣ်တဲပၠးအီၤ တၢ်စံးဆၢတဘျီဃီတဂ့ၤ. လၢတၢ်န့ၣ်အလီၢ် သူတၢ်သံကွၢ်တဖၣ် ဒ်သိးအဝဲသ့ၣ်ကနၢ်ပၢၢ်ထီၣ်ဝဲ တၢ်စံးဆၢလၢအဘၣ်န့ၣ်တက့ၢ်. (be 238 ¶1-2) ဖဲနတဲနၢ်ပၢၢ် နပှၤမၤလိလံာ်စီဆှံဖိလၢ တၢ်ဂ့ၢ်အသီတဖၣ်အခါ တဲအီၤကယီကယီတက့ၢ်.—be 230 ¶4.

တၢ်မၤဘံဘူတၢ်ဂ့ၢ်– တၢ်ဂ့ၢ်လၢနသ့ၣ်ညါပာ်စၢၤအီၤ ဘၣ်ဃးဒီးတၢ်မၤလိတခါစုာ်စုာ်န့ၣ် တဘၣ်တဲဖျါထီၣ်အီၤ ခဲလၢာ်ခဲဆ့တဂ့ၤ. (ယိၤ. ၁၆:၁၂) သးစၢၢ်ဆၢတၢ်ဂ့ၢ်အရ့ဒိၣ်လၢ လံာ်အဆၢပူၤတက့ၢ်. (be 226 ¶4-5) ပှၤလၢအသးစၢၢ်ဆၢတၢ်မ့ၢ်တၢ်တီတဂၤ မ့ၢ်တနၢ်ပၢၢ်တၢ်ဂ့ၢ်လၢအရ့ဒိၣ်န့ၣ် တဲနၢ်ပၢၢ်အီၤလီၤတံၢ်လီၤဆဲးတက့ၢ်. (be 235 ¶3) ဒီးအဝဲမ့ၢ်နၢ်ပၢၢ်တၢ်ဂ့ၢ်လၢအရ့ဒိၣ်န့ၣ် လဲၤကဒီးဆူအသီတဆၢတက့ၢ်.

တၢ်မၤဝံၤတၢ်မံၤ– ပတၢ်တိာ်ပာ်န့ၣ် တမ့ၢ်ထဲလၢ ပကဒုးသ့ၣ်ညါအီၤ တၢ်ဂ့ၢ်တၢ်ကျိၤတဖၣ်ဘၣ်. ပကဘၣ်သိၣ်လိအီၤဒ်သိး တၢ်ဂ့ၢ်ကနုာ်လီၤဆူအသးပူၤအဂီၢ်လီၤ. (လူၤ. ၂၄:၃၂) သူလံာ်စီဆှံအဆၢလၢအရ့ဒိၣ်တဖၣ်လၢ တၢ်မၤလိအပူၤ ဒ်သိးယွၤအကလုၢ်ကထါ အစိအကမီၤကမၤစၢၤအီၤအဂီၢ်တက့ၢ်. (၂ ကရံၣ်. ၁၀:၄; ဧ့ၤ. ၄:၁၂; be 144 ¶1-3) သူတၢ်အဒိ ယိယိဖိတက့ၢ်. (be 245 ¶2-4) တဲသကိး နပှၤမၤလိလံာ်စီဆှံဖိအတၢ်ကီတၢ်ခဲ, အတၢ်နာ်အဂ့ၢ် ဒီးတဲပၠးအီၤတၢ်မၤလိလၢ အဘၣ်ထွဲလိာ်အသးဒီးအီၤတက့ၢ်. ဒီးသံကွၢ်အီၤတၢ်သံကွၢ်ဒ်အံၤ– “တၢ်မၤလိလၢပမၤလိအီၤခဲအံၤန့ၣ် နဆိကမိၣ်ဒ်လဲၣ်.” “တၢ်ဂ့ၢ်တခါအံၤသိၣ်လိပှၤ ဘၣ်ဃးဒီးယဟိဝၤယွၤအဂ့ၢ်ဒ်လဲၣ်.” နမ့ၢ်မၤထွဲတၢ်ဟ့ၣ်ကူၣ်တဖၣ်အံၤန့ၣ် နကဒိးန့ၢ်ဘၣ် တၢ်အဘျုးဒ်လဲၣ်.”—be 238 ¶3-5; 259 ¶1.