ဘၣ်​မနုၤ​အဃိ​အရ့ဒိၣ်​လဲၣ်– ယဟိဝၤ​ယွၤ မၤဝဲ​ဒ်သိး တၢ်မ့ၢ်​တၢ်တီ က​နုာ်လီၤ​လၢ “ပှၤလၢ​တၢ်​ပာ်​အီၤ​လၢ​အ​က​န့ၢ်ဘၣ်​ တၢ်မူ​လီၤထူ​လီၤယိာ်​တဖၣ်” အသး​ပူၤ​လီၤ. (မၤတၢ်. ၁၃:၄၈; ၁ ကရံၣ်​ ၃:၇) လၢ​တၢ်သးခု​ကစီၣ်​တၢ်မၤ​အ​ပူၤ ပ​မ့ၢ်​သးစၢၢ်ဆၢ ပှၤလၢ​အသး​အိၣ်​တူၢ်လိာ် တၢ်​လၢ​အဝဲသ့ၣ်​ မၤလိ​ဘၣ်​ဝဲ​တဖၣ်​န့ၣ်​ မ့ၢ်ဒၣ်​ပ​မၤ​သကိး​တၢ်​ဒီး ကစၢ်​ယွၤ​လီၤ. (၁ ကရံၣ်. ၉:၂၆) ပှၤ​မၤလိ​လံာ်စီဆှံ​ဖိ​တဖၣ်​ က​ဘၣ်​သ့ၣ်ညါ​ဝဲ​လၢ ဒ်သိး​က​ဒိးန့ၢ်​ဘၣ်​တၢ်​အုၣ်က့ၤ​ခီၣ်က့ၤ​အဂီၢ် က​ဘၣ်​ဒိး​ဘျၢထံ​လီၤ. (၁ ပ့း. ၃:၂၁) ပ​ပှၤ​မၤလိ​လံာ်စီဆှံ​ဖိ​တဖၣ်​ က​ကဲထီၣ်​ယ့ၣ်ၡူး​အပျဲၢ်​အဘီၣ်​အဂီၢ် ပ​က​ဘၣ်​မၤစၢၤ​အီၤ ခီဖျိ​သိၣ်လိ​အဝဲသ့ၣ်​လၢ က​ဘၣ်​ဆီတလဲ​အ​တၢ်အိၣ်မူ, က​ဘၣ်​စံၣ်တဲၤ​တဲလီၤ​တၢ်, က​ဘၣ်​သိၣ်လိ​တၢ် ဒီး​က​ဘၣ်​ဟ့ၣ်​လုၢ်ထီၣ်​အသး​လၢ ယဟိဝၤ​ယွၤ​အ​အိၣ်​လီၤ.—မး. ၂၈:၁၉, ၂၀.

ပ​မၤ​က​သ့​ဒ်လဲၣ်–

• ဒုး​သ့ၣ်ညါ​ပှၤ​မၤလိ​လံာ်စီဆှံ​ဖိ​လၢ တၢ်​မၤလိ​လံာ်စီဆှံ အ​တၢ်တိာ်ပာ်​မ့ၢ်​ဒ်သိး က​မၤစၢၤ​အီၤ​လၢ​က “သ့ၣ်ညါ” ယဟိဝၤ​ယွၤ ဒီး​ဒိးန့ၢ်​ဘၣ်​အ​တၢ်​ဘၣ်သး​အဂီၢ်​လီၤ.—ယိၤ. ၁၇:၃

• မၤစၢၤ​အဝဲသ့ၣ်​ ဒ်သိး​က​လဲၤထီၣ်​လဲၤထီ​လၢ နီၢ်သး​တခီ ဒီး​က​ဟးဆှဲး​ဝဲ တၢ်​သကဲာ်ပဝး​လၢ​အ​တဂ့ၤ ဒီး​တၢ်​ရ့လိာ်သး​ဒီး​တံၤသကိး​လၢ အ​တဂ့ၤ​တဖၣ်​တက့ၢ်.

• ဒုး​ဆူၣ်​ထီၣ်​အဂံၢ်​အဘါ ဒီး​ဆဲး​ဟ့ၣ်ဂံၢ်​ဟ့ၣ်ဘါ​အီၤ တချုး​လၢ​အ​ဒိး​ဘျၢထံ ဒီး​အ​ဒိး​ဘျၢထံ​ဝံၤ​အခါ​စ့ၢ်ကီး​တက့ၢ်.—မၤတၢ်. ၁၄:၂၂

ကွၢ်​တၢ်ဂီၤမူ​လၢ​အမ့ၢ် ယဟိဝၤ​ယွၤ က​မၤစၢၤ​နၤ, ဝံၤ စံးဆၢ တၢ်​သံကွၢ်​လၢ​လာ်​တဖၣ်​အံၤ​တက့ၢ်–

• ပှၤ​တဂၤ က​ဟ့ၣ်​လုၢ်ထီၣ်​အသး ဒီး​ဒိး​ဘျၢထံ​အဂီၢ် ပျံၤဝဲ​တၢ်မနုၤ​လဲၣ်.

• ဒ်သိး ပှၤ​မၤလိ​လံာ်စီဆှံ​ဖိ က​လဲၤထီၣ်​လဲၤထီ​လၢ နီၢ်သး​တခီ​အဂီၢ် တၢ်​အိၣ်ဖှိၣ်​သးပှၢ်​တဖၣ်​ မၤစၢၤဝဲ​က​သ့​ဒ်လဲၣ်.

• ယၡါယၤ ၄၁:၁၀ သိၣ်လိ​ပှၤ​ဘၣ်ဃး​ဒီး ယဟိဝၤ​ယွၤ​အဂ့ၢ်​ဒ်လဲၣ်.

• ပ​မ့ၢ်​ပှၤ​တလၢ​တ​ပှဲၤ​သနာ်က့ ဒ်သိး​ပ​မၤ​ယဟိဝၤ​ယွၤ အ​တၢ်မၤ​က​န့ၢ်​အဂီၢ် တၢ်ဂ့ၤ​တၢ်ဝါ မနုၤ​တဖၣ်​ က​မၤစၢၤ​ပှၤ​လဲၣ်.