တၢ်​ဟီထီၣ်ကွံာ်​ပှၤလၢ တၢ်​အိၣ်ဖှိၣ်​အ​ပူၤ​န့ၣ်​ ဒီသဒၢ​ဝဲ တၢ်​အိၣ်ဖှိၣ်​ ဒီး​မ့ၢ်​ဝဲ​တၢ်​သိၣ်ဃီၣ်​ ပှၤလၢ​အ​မၤ​တၢ်ကမၣ်​လၢ တ​ပီၢ်ယၢ်​​လီၤ​က့ၤ​အသး​တဖၣ်​အဂီၢ်​န့ၣ်​လီၤ. (၁ ကရံၣ်. ၅:၆, ၁၁) ဖဲ​ပ​တူၢ်လိာ်​ဒီး​ဆီၣ်ထွဲ ယဟိဝၤ​ယွၤ အ​တၢ်​သိၣ်ဃီၣ်​အခါ မ့ၢ်ဒၣ်​ပ​ပာ်ဖျါ​ထီၣ်​တၢ်အဲၣ်​လီၤ. ဖဲ​ပှၤ​တဂၤ ​ဘၣ်​တၢ်​ဟီထီၣ်ကွံာ်​အီၤ​အခါ အဘူး​အတံၢ်, တၢ်​စံၣ်ညီၣ်​ကမံးတံာ် ဃုာ်ဒီး​ပှၤအဂၤ​တဖၣ်​ အသး​ဘၣ်ဒိ​ဒိၣ်မး​လီၤ. အဃိ​မ့ၢ်​တၢ်​ပာ်ဖျါ​ထီၣ်​ တၢ်အဲၣ်​လၢ​ကျဲ​ဒ်လဲၣ်.

တၢ်​လၢ​အရ့ဒိၣ်​န့ၣ်​ မ့ၢ်ဒၣ်​ပ​ပာ်ဖျါ​ထီၣ်​လၢ ပ​အဲၣ်​ယဟိဝၤ​ယွၤ အ​တၢ်​မံၤဂ့ၤ​သၣ်ဂ့ၤ ဒီး​အ​တၢ်ဘျၢ​လၢ​ဘၣ်ဃး​ဒီး တၢ်​စီဆှံ​န့ၣ်​လီၤ. (၁ ပ့း. ၁:၁၄-၁၆) ဒီး​မ့ၢ်​စ့ၢ်ကီး ပ​ပာ်ဖျါ​ထီၣ်​ တၢ်အဲၣ်​လၢ ပှၤလၢ​အ​မၤ​ကမၣ်​တၢ်​တဂၤ​န့ၣ်​လီၤ. ခီဖျိ​လၢ တၢ်​သိၣ်ဃီၣ်​လၢ​အဆူၣ်​အဃိ အ​ဝဲ​အသး​က​ဘၣ်ဒိ​ဖးဒိၣ်​သနာ်က့​က “သၣ်ထီၣ်​​ဝဲ​လၢ​တၢ်တီ​တၢ်လိၤ​အ​တၤသၣ်​လၢ အ​ဘၣ်ဃး​ဒီး​တၢ်မုာ်​တၢ်ဖိး​လီၤ.” (ဧ့ၤ. ၁၂:၅, ၆, ၁၁) ပ​မ့ၢ်​ရ့​ဒီး ပှၤလၢ​အဘၣ်​ တၢ်​ဟီထီၣ်ကွံာ်​အီၤ မ့တမ့ၢ် ပှၤလၢ​အ​ပတုာ်​တၢ်​ရ့လိာ်သး​ဒီး​ပှၤလၢ အသး​ဒၣ်​ဝဲ​တဖၣ်​န့ၣ်​မ့ၢ်ဒၣ်​ ပထီဒါ ယဟိဝၤ​ယွၤ အ​တၢ်​သိၣ်ဃီၣ်​လီၤ. သ့ၣ်နီၣ်​ထီၣ်​လၢ ယဟိဝၤ​ယွၤ​န့ၣ်​သိၣ်ဃီၣ်​တၢ် “ဒ်​တၢ်တီ​တၢ်လိၤ​အသိး” လီၤ. ( ယံး. ၃၀:၁၁) ဖဲ​ပ​တူၢ်လိာ်​ဒီး​ဆီၣ်ထွဲ ယဟိဝၤ​ယွၤ အ​တၢ်​သိၣ်ဃီၣ်​ ဒီး​ဆဲး​မၤ​နီၢ်သး တၢ်ဖံး​တၢ်မၤ​တဖၣ်​အခါ ပ​မုၢ်လၢ်​လၢ ပှၤလၢ​အဘၣ်​ တၢ်​ဟီထီၣ်ကွံာ်​အီၤ​တဂၤ ဟဲက့ၤ​ကဒါက့ၤ​လၢ ပ​ပၢ်​လၢ​အိၣ်ဒီး​တၢ်​သးကညီၤ​တဂၤ​အ​အိၣ်​သ့​လီၤ.—ၡါ. ၁:၁၆-၁၈; ၅၅:၇.

ကွၢ်​တၢ်ဂီၤမူ​လၢ အ​ခိၣ်တီ​မ့ၢ်ဝဲ ဆဲး​အိၣ်ဒီး တၢ်သးတီ​လၢ​လၢပှဲၤပှဲၤ ဒီး​စံးဆၢ​က့ၤ တၢ်​သံကွၢ်​လၢ လာ်​တဖၣ်​အံၤ

• ခရံာ်ဖိ​မိၢ်ပၢ်တဖၣ်​န့ၣ်​ ဖဲ​အဖိ​တဂၤ​ဟးထီၣ်​လၢ တၢ်မ့ၢ်​တၢ်တီ​အ​ပူၤ​အခါ အဝဲသ့ၣ်​ တူၢ်​ဘၣ်​​ဝဲ​ဒ်လဲၣ်.

• တၢ်​အိၣ်ဖှိၣ်​ဖိ​တဖၣ်​ မၤစၢၤဝဲ ဟံၣ်ဖိ​ဃီဖိ​လၢ အိၣ်ဒီး​တၢ်သးတီ​တဖၣ်​ က​သ့​ဒ်လဲၣ်.

• ပ​က​​ဘၣ်​တီ​ဒီး ယဟိဝၤ​ယွၤ​အါန့ၢ် ပ​ဟံၣ်ဖိ​ဃီဖိ​န့ၣ်​ လံာ်စီဆှံ အ​တၢ်ကွဲးနီၣ်​ကွဲးဃါ မနုၤ​ပာ်ဖျါ​ထီၣ်​ဝဲ​လဲၣ်.

• ပ​တီ​ဒီး ယဟိဝၤ​ယွၤ​ဒိၣ်န့ၢ် ပ​တီ​ဒီး​ပ​ဟံၣ်ဖိ​ဃီဖိ​တဖၣ်​န့ၣ်​ ပ​ပာ်ဖျါ​ထီၣ်​က​သ့​ဒ်လဲၣ်.