လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ် ဒီးလံာ်စီဆှံသိၣ်လိတၢ်နီၢ်နီၢ် မ့ၢ်မနုၤလဲၣ်န့ၣ် လီၤဂာ်လိာ်အသးလီၤ. လံာ်ခံဘ့ၣ်အံၤ မ့ၢ်တၢ်မၤလိအလံာ်လၢ အသိၣ်လိပှၤတၢ်မ့ၢ်တၢ်တီအဂ့ၢ် ဒီးပှၤရဲၣ်လီၤကျဲၤလီၤပာ်စၢၤတၢ်ဂ့ၢ်တၢ်ကျိၤ ဒ်သိးသိးလီၤ. ဘၣ်ဆၣ် လံာ်လၢအမ့ၢ် လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ်န့ၣ် ပှၤသူတၢ်ကတိၤယိယိဖိ ဒီးပှၤနၢ်ပၢၢ်ဘၣ်အီၤညီလီၤ. လံာ်အံၤဘၣ်တၢ်ထုးထီၣ်အီၤလၢ ပှၤတနၢ်ပၢၢ် လံာ်စီဆှံသိၣ်လိတၢ်နီၢ်နီၢ် မ့ၢ်မနုၤလဲၣ် လီၤတံၢ်လီၤဆဲးအဂီၢ်န့ၣ်လီၤ. လၢတၢ်ပိာ်ထွဲအလီၢ် လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ် အပူၤပှၤက့ၤထၢနုာ်ဝဲ တၢ်ဂ့ၢ်လၢလံာ်အကတၢၢ်လၢ အပာ်ဖျါထီၣ်ဝဲ တၢ်ကတိၤလၢလံာ်အဆၢပူၤတနီၤ အခီပညီန့ၣ်လီၤ. လၢတၢ်မၤလိအခိၣ်တီအဖီလာ်န့ၣ် တၢ်သံကွၢ်တအိၣ်ဘၣ် ဒီးတၢ်မၤလိအကတၢၢ်န့ၣ် တၢ်လွံၢ်နၢၣ်တအိၣ်စ့ၢ်ကီးဘၣ်. လၢတၢ်န့ၣ်အလီၢ် တၢ်မၤလိအကတၢၢ်န့ၣ် ပၣ်ဃုာ်ဒီး တၢ်ကွၢ်ကဒါက့ၤလၢ အပာ်ဖျါထီၣ်ဝဲ လံာ်စီဆှံအတၢ်မ့ၢ်တၢ်တီလၢ လံာ်အဆၢပူၤလီၤ. ဒ်လံာ်လၢအမ့ၢ် လံာ်စီဆှံသိၣ်လိတၢ်နီၢ်နီၢ် မ့ၢ်မနုၤလဲၣ် အသိး လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ် န့ၣ်နနီၤလီၤအီၤသ့ ကိးဆၢကိးကတီၢ်ဒဲးလီၤ. ပသူလံာ်အံၤဒီး ပမၤလိလံာ်စီဆှံဒီးပှၤဂၤကသ့ဒ်လဲၣ်.

တၢ်ကွၢ်ကဒါက့ၤ– အါတက့ၢ်န့ၣ် ဖဲပမၤလိလံာ်စီဆှံဒီးပှၤဂၤအခါ ပမၢပှၤမၤလိတၢ်ဖိဖးလံာ်အဆၢလၢ လံာ်စီဆှံသိၣ်လိတၢ်နီၢ်နီၢ် မ့ၢ်မနုၤလဲၣ်အပူၤ ဒီးပသံကွၢ်အီၤတၢ်သံကွၢ်လီၤ. ဘၣ်သ့ၣ်သ့ၣ် နပှၤမၤလိလံာ်စီဆှံဖိတနီၤနီၤန့ၣ် တနၢ်ပၢၢ်ဝဲကျိာ်တခါအံၤဂ့ၤဂ့ၤ မ့တမ့ၢ် ဖးဝဲတဘၣ်ဂ့ၤဂ့ၤဘၣ်. မ့မ့ၢ်ဒ်န့ၣ်န့ၣ် နသူတၢ်ကွၢ်ကဒါက့ၤလၢ လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ် အပူၤဒီး မၤလိလံာ်စီဆှံဒီးအီၤသ့လီၤ. မ့ၢ်ဝံၤန့ၣ် နဟ့ၣ်ဂံၢ်ဟ့ၣ်ဘါအီၤလၢ အဝဲကက့ၤဖးဝဲလံာ်အဆၢလၢ အနီၢ်ကစၢ်ဒၣ်ဝဲသ့န့ၣ်လီၤ. ဒီးဖဲနသိၣ်လိအီၤ တၢ်မ့ၢ်တၢ်တီတခါစုာ်စုာ်န့ၣ် ကဘၣ်ယံာ်ဝဲ ၁၅ မံးနံးဃၣ်ဃၣ်လီၤ. လၢတၢ်ကွၢ်ကဒါက့ၤအပူၤ တတဲဖျါထီၣ်ဝဲတၢ်ဂ့ၢ်ခဲလၢာ် ဒ်လံာ်အဆၢတဖၣ်ဘၣ်. လၢတၢ်န့ၣ်အဃိ နကဘၣ်ကတဲာ်ကတီၤပာ်နသးဂ့ၤဂ့ၤဒီး ဆိကမိၣ်ထံနပှၤမၤလိလံာ်စီဆှံဖိ အတၢ်လိၣ်ဘၣ်န့ၣ်လီၤ. ဒီးနမ့ၢ်သူလံာ်အဆၢတဖၣ်ဒီး သိၣ်လိလံာ်စီဆှံန့ၣ် နသူတၢ်ကွၢ်ကဒါက့ၤလၢ နကက့ၤသမံသမိးကွၢ် တၢ်ဂ့ၢ်လၢအရ့ဒိၣ်တဖၣ်သ့ဝဲလီၤ.

တၢ်ဂ့ၢ်လၢလံာ်အကတၢၢ်– တၢ်ကတိၤတနီၤလၢ လံာ်အကတၢၢ်န့ၣ် ဘၣ်တၢ်ရဲၣ်လီၤကျဲၤလီၤအီၤဒ် အဟဲအိၣ်ဖျါထီၣ်လၢ လံာ်အဆၢပူၤအသိးလီၤ. ပှၤသိၣ်လိတၢ်ဖိတဂၤ ဖဲအသိၣ်လိဝဲ လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ် အဆၢကတီၢ် ကတဲသကိးဝဲတၢ်ဂ့ၢ်လၢ လံာ်အကတၢၢ်ဧါ, တတဲဧါန့ၣ် ကွၢ်လၢအနီၣ်ကစၢ်လီၤ.