အိၣ်မူဒ် ခရံာ်ဖိအသိး
တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—ပာ်ပတုာ် တၢ်မၤလိလံာ်စီဆှံဒီး ပှၤမၤလိလံာ်စီဆှံဖိလၢ တလဲၤထီၣ်လဲၤထီတဖၣ်
ဘၣ်မနုၤအဃိ အရ့ဒိၣ်– ဒ်သိးပှၤကန့ၢ်ဘၣ် တၢ်အုၣ်က့ၤခီၣ်က့ၤအဂီၢ် အဝဲသ့ၣ်ကဘၣ်ကိးထီၣ် ယဟိဝၤယွၤအမံၤလီၤ. (ရိ. ၁၀:၁၃, ၁၄) ဘၣ်ဆၣ် ပှၤလၢအမၤလိလံာ်စီဆှံတဖၣ်န့ၣ် တအဲၣ်ဒိးအိၣ်မူဒ် ယဟိဝၤယွၤ အတၢ်သိၣ်တၢ်သီအသိး ကိးဂၤဒဲးဘၣ်. ပသူပတၢ်ဆၢကတီၢ်လၢ အလုၢ်ဒိၣ်ပှ့ၤဒိၣ်အံၤလၢ တၢ်သးခုကစီၣ်တၢ်မၤအပူၤ ခီဖျိပမၤစၢၤ ပှၤလၢအဲၣ်ဒိး ဆီတလဲအတၢ်အိၣ်မူ ဒ်သိးကမၤတၢ်ဘၣ် ယဟိဝၤယွၤအသးလီၤ. အဃိ ဒ်တၢ်ဆၢကတီၢ် လဲၤပူၤကွံာ်ဝဲအသိး ပှၤမၤလိလံာ်စီဆှံဖိတဂၤ မ့ၢ်တလဲၤထီၣ်လဲၤထီလၢ နီၢ်သးတခီဘၣ်န့ၣ် လၢတၢ်ကူၣ်သ့အပူၤ ပပတုာ်တၢ်မၤလိလံာ်စီဆှံဒီးအီၤ ဒီးပသူပတၢ်ဆၢကတီၢ်လၢ ပကမၤစၢၤပှၤလၢ ယဟိဝၤယွၤမိၤအီၤဆူ အတၢ်ကရၢကရိအပူၤတဖၣ်လီၤ. (ယိၤ. ၆:၄၄) ဘၣ်ဆၣ် လၢခံပှၤတဂၤ မ့ၢ်မၤတၢ်ဆီတလဲတနီၤ ဒီးပာ်ဖျါထီၣ်လၢ အဝဲမ့ၢ်ပှၤလၢ “တၢ်ပာ်အီၤလၢ အကန့ၢ်ဘၣ်တၢ်မူလီၤထူလီၤယိာ်” န့ၣ်ပက့ၤစးထီၣ် တၢ်မၤလိလံာ်စီဆှံဒီးအီၤသ့လီၤ.—မၤတၢ်. ၁၃:၄၈.
ပမၤကသ့ဒ်လဲၣ်–
-
စံးပတြၢၤ ပှၤမၤလိလံာ်စီဆှံဖိလၢ အဝဲအဲၣ်ဒိးသ့ၣ်ညါ တၢ်မ့ၢ်တၢ်တီနီၢ်နီၢ်အဃိတက့ၢ်.—၁ တံၤ. ၂:၄
-
တဲပၠးအီၤလၢ အရ့ဒိၣ်လၢအဝဲ ကဘၣ်မၤထွဲဝဲဒ် တၢ်လၢအမၤလိဘၣ်ဝဲ တဖၣ်အသိးတက့ၢ်.—လူၤ. ၆:၄၆-၄၉
-
တဲသကိး ယ့ၣ်ၡူးဟ့ၣ်တၢ်အဒိလၢ ဘၣ်ဃးဒီး ပှၤဖှံတၢ်ချံအဂ့ၢ် ဒီးသံကွၢ်အီၤလၢ ဒ်သိးအဝဲကမၤထွဲဒ် တၢ်လၢအမၤလိဘၣ်ဝဲတဖၣ်အသိးအဂီၢ် တၢ်မနုၤမၤတံာ်တာ်အီၤလဲၣ်.—မး. ၁၃:၁၈-၂၃
-
လၢတၢ်ကူၣ်သ့အပူၤ တဲနၢ်ပၢၢ်အီၤလၢ ဘၣ်မနုၤအဃိ နပတုာ် တၢ်မၤလိလံာ်စီဆှံဒီးအီၤလဲၣ် န့ၣ်တက့ၢ်.
-
ဒုးသ့ၣ်ညါအီၤလၢ နကက့ၤအိၣ်သကိးအီၤ တဘျီတဘျီဒ်သိး နကဟ့ၣ်ဂံၢ်ဟ့ၣ်ဘါအီၤ ဒီးအဝဲမ့ၢ်လဲၤထီၣ်လဲၤထီန့ၣ် နကစးထီၣ်က့ၤ တၢ်မၤလိလံာ်စီဆှံဒီးအီၤတက့ၢ်.
ကွၢ်တၢ်ဂီၤမူ ဒီးစံးဆၢက့ၤ တၢ်သံကွၢ်လၢ လာ်တဖၣ်အံၤတက့ၢ်–
-
လၢတၢ်ဂီၤမူအပူၤ ပှၤမၤလိလံာ်စီဆှံဖိတဂၤ တလဲၤထီၣ်လဲၤထီဘၣ်န့ၣ် ပသ့ၣ်ညါဘၣ်ဒ်လဲၣ်.
-
ဒ်သိးပှၤမၤလိလံာ်စီဆှံဖိ ကသ့ၣ်ညါဝဲလၢ ကဘၣ်မၤတၢ်ဆီတလဲအဂီၢ် ပှၤစံၣ်တဲၤတဲလီၤတၢ်ဖိ မၤစၢၤအီၤဒ်လဲၣ်.
-
လၢခံဒ်သိးအဝဲ က့ၤမၤကဒီး တၢ်မၤလိလံာ်စီဆှံကန့ၢ်အဂီၢ် တဲတ့ၢ်ဝဲဒ်လဲၣ်.