အိၣ်မူဒ် ခရံာ်ဖိအသိး
မ့ၢ်နထံၣ် ကစၢ်ယွၤအတၢ်ဂ့ၤတၢ်ဝါတဖၣ်ဧါ
ဖဲနကွၢ်ကီ ဖီဃံလၤလၢ အိၣ်ဒီးအလွဲၢ်အကလုာ်ကလုာ်, မူခိၣ်လၢအပှဲၤဝဲဒီးဆၣ် ဒီးထံလီၤဆူလၢ အသီၣ်ဝူၤဝူၤတဖၣ်အခါ မ့ၢ်နထံၣ် တၢ်ဘၣ်တ့ကစၢ် အစုတၢ်မၤန့ၣ်ဧါ. တၢ်ဘၣ်တ့လၢ အိၣ်ဝးတရံးပှၤတဖၣ် ပာ်ဖျါထီၣ်ဝဲ ယဟိဝၤယွၤ အတၢ်ဂ့ၤတၢ်ဝါလၢ ပထံၣ်အီၤတသ့ဘၣ်တဖၣ်န့ၣ်လီၤ. (ရိ. ၁:၂၀) ဖဲပဟံးန့ၢ် တၢ်ဆၢကတီၢ် ဒီးဆိကမိၣ်ထံ တၢ်လၢပထံၣ်အီၤလၢ ပမဲာ်တဖၣ်အခါ ပကသ့ၣ်ညါဘၣ် ကစၢ်ယွၤ အစိအကမီၤ, အတၢ်အဲၣ်, အတၢ်ကူၣ်သ့, အတၢ်တီတၢ်လိၤ ဒီးအတၢ်သူၣ်အိၣ်သးအိၣ်န့ၣ်လီၤ.—စံး. ၁၀၄:၂၄.
တနံၤဘၣ်တနံၤ ယဟိဝၤယွၤ အတၢ်ဘၣ်တ့လၢ နပာ်သူၣ်ပာ်သးအီၤတနီၤန့ၣ် မ့ၢ်မနုၤလဲၣ်. နမ့ၢ်အိၣ်လၢဝ့ၢ်ပူၤသနာ်က့ နကထံၣ်ဘၣ် ထိၣ်ဖိလံၣ်ဖိ မ့တမ့ၢ် သ့ၣ်ထူၣ်တဖၣ်လီၤ. ပမ့ၢ်ဃုသ့ၣ်ညါအါထီၣ် ယဟိဝၤယွၤ အတၢ်ဘၣ်တ့တဖၣ်န့ၣ် ကမၤစၢၤပှၤဒ်သိး ပတၢ်သူၣ်ကိၢ်သးဂီၤကစှၤလီၤ, ပကသးစၢၢ်ဆၢ တၢ်လၢအရ့ဒိၣ်တဖၣ် တကးဒံးဘၣ် ပတၢ်နာ် ဘၣ်ဃးဒီး ယဟိဝၤယွၤ အတၢ်သ့တၢ်ဘၣ်လၢ ကအံးထွဲကွၢ်ထွဲပှၤန့ၣ် ကအါထီၣ်ဝဲလီၤ. (မး. ၆:၂၅-၃၂) နမ့ၢ်အိၣ်ဒီးနဖိန့ၣ် မၤစၢၤအဝဲသ့ၣ် ဒ်သိးကထံၣ်သ့ၣ်ညါထီၣ် ယဟိဝၤယွၤ အတၢ်ဂ့ၤတၢ်ဝါလၢ ပထိၣ်သတြီၤအီၤဒီး တၢ်အဂၤတသ့ဘၣ်န့ၣ်တက့ၢ်. ဒ်ပတၢ်စံးဘျုးစံးဖှိၣ် ကစၢ်ယွၤအတၢ်ဘၣ်တ့လၢ ပထံၣ်အီၤလၢပဃၢၤတဖၣ် ဒံးယံာ်ဒံးအါထီၣ်အသိး ပတၢ်ရ့လိာ်သးဒီး ပတၢ်ဘၣ်တ့ကစၢ်စ့ၢ်ကီး ဒံးယံာ်ဒံးဂ့ၤထီၣ်ဝဲလီၤ.—စံး. ၈:၃,၄.
ကွၢ်တၢ်ဂီၤမူလၢ အခီၣ်တီမ့ၢ်ဝဲ တၢ်ဘၣ်တ့လၢ အလီၤကမၢကမၣ် မၤလၤကပီၤ ကစၢ်ယွၤ—တၢ်ကပီၤ ဒီးတၢ်အလွဲၢ်, ဝံၤစံးဆၢတၢ်သံကွၢ်လၢ လာ်တဖၣ်အံၤ–
-
ကသံၣ်ခဲၣ်ကမူၣ်တဖၣ် ဒုးအိၣ်ထီၣ် တၢ်အလွဲၢ်တဖၣ်ဒ်လဲၣ်.
-
တၢ်အလွဲၢ်အကလုာ်ကလုာ် ဟဲကဲထီၣ်ဝဲသ့ဒ်လဲၣ်.
-
လၢမူခိၣ်န့ၣ် ဘၣ်မနုၤအဃိ ပထံၣ်ဘၣ် တၢ်အလွဲၢ်အကလုာ်ကလုာ်လဲၣ်.
-
လၢနဟံၣ်ကပၤန့ၣ် နထံၣ်ဘၣ် တၢ်ဘၣ်တ့လၢ အလွဲၢ်လီၤဆီ မနုၤတဖၣ်လဲၣ်.
-
ဘၣ်မနုၤအဃိ ပကဘၣ်ဟံးန့ၢ် တၢ်ဆၢကတီၢ်ဒီး သမံသမိးကွၢ် န့ဆၢၣ်အတၢ်ဃံတၢ်လၤတဖၣ်လဲၣ်.