တၢ်​သိၣ်ဃီၣ်​န့ၣ်​ အဲၣ်​ဒီး​စံး​ဝဲ တၢ်သိၣ်လိ​နဲၣ်လိ ဒီး​တၢ်သိၣ်လိ​မၤယုၤ တကးဒံးဘၣ်​ ပၣ်ဃုာ်​စ့ၢ်ကီး​ဒီး တၢ်​ဘှီ​​ဘၣ်​တၢ်​ကမၣ်​န့ၣ်​လီၤ. ယဟိဝၤ​ယွၤ သိၣ်ဃီၣ်​ပှၤ​အဃိ ပ​ဘူၣ်ထီၣ်​ဘါထီၣ်​အီၤ​လၢ ကျဲ​လၢ​အ​ဝဲ​တူၢ်လိာ်​ဝဲ​သ့ န့ၢ်​ဝဲ​လီၤ. (ရိ. ၁၂:၁; ဧ့ၤ. ၁၂:၁၀, ၁၁) တဘျီ​တခီၣ်​ ဖဲပှၤ​သိၣ်ဃီၣ်​ပှၤ​အခါ ကကီ​လၢ ပ​က​တူၢ်လိာ်​အီၤ​အဂီၢ် သနာ်က့ တၢ်​သိၣ်ဃီၣ်​န့ၣ်​ ဒုး​ကဲထီၣ်​ပှၤလၢ ပှၤတီ​ပှၤလိၤ ဒီး​ဒုးအိၣ်​ထီၣ်​ တၢ်ဆိၣ်ဂ့ၤ​တဖၣ်​လီၤ. (ကတိၤ. ၁၀:၇) ပှၤလၢ​အ​သိၣ်ဃီၣ်​တၢ် ဒီး​ပှၤလၢ​အ​ဘၣ်​တၢ်​သိၣ်ဃီၣ်​ ခံဂၤလၢာ် ကြၢး​သ့ၣ်နီၣ်​ဝဲ တၢ်မနုၤ​လဲၣ်.

ပှၤလၢ​အ​သိၣ်ဃီၣ်​တၢ်. ဒ်​ယဟိဝၤ​ယွၤ​အသိး တၢ်​အိၣ်ဖှိၣ်​သးပှၢ်, မိၢ်ပၢ် ဒီး​ပှၤ​အဂၤ​တဖၣ်​န့ၣ်​ က​​ဘၣ်​သိၣ်ဃီၣ်​တၢ်​လၢ တၢ်အဲၣ်​တၢ်ကွံ ဒီး​တၢ်​သးကညီၤ​အ​ပူၤ​လီၤ. (ယံး. ၄၆:၂၈) တၢ်​သိၣ်ဃီၣ်​လၢ အဆူၣ်​ဒၣ်လဲာ် ကြၢး​​ဘၣ်​တၢ်ဟ့ၣ်​အီၤ ဒ်​ကျဲ​လၢ​အ​လီၤပလိာ်​ဒီး တၢ်အိၣ်သး ဒီး​လၢ​တၢ်အဲၣ်​တၢ်ကွံ​အ​ပူၤ​လီၤ.—တံ. ၁:၁၃.

ပှၤလၢ​အဘၣ်​ တၢ်​သိၣ်ဃီၣ်. ပှၤ​မ့ၢ်​သိၣ်ဃီၣ်​ပှၤ ဒ်လဲၣ်​ဂ့ၤ ဒ်လဲၣ်​ဂ့ၤ ပ​တ​ကြၢး​ဂ့ၢ်လိာ်​အီၤ​ဘၣ်​ ပ​ကြၢး​မၤထွဲ​အီၤ တဘျီဃီ​လီၤ. (ကတိၤ. ၃:၁၁, ၁၂) ပ​မ့ၢ်​ပှၤ​တလၢပှဲၤ​တဖၣ်​အဃိ ပ​ဝဲ​ခဲလၢာ် ပ​လိၣ်ဘၣ်​ တၢ်သိၣ်​ဃီၣ်​လၢ ကျဲ​အ​ကလုာ်​ကလုာ်​လီၤ. ​ဘၣ်​သ့ၣ်​သ့ၣ်​ ပ​က​ဒိးန့ၢ်​ဘၣ်​ တၢ်​သိၣ်ဃီၣ်​ ခီဖျိ​ပ​ဖး​လံာ်စီဆှံ မ့တမ့ၢ် တၢ်​လၢ​ပ​နၢ်ဟူ​​ဘၣ်​လၢ တၢ်​အိၣ်ဖှိၣ်​အ​ပူၤ​န့ၣ်​လီၤ. တဘျီ​တခီၣ်​ ပှၤ​တနီၤ က​လိၣ်ဘၣ်​ တၢ်​စံၣ်ညီၣ်​ကမံးတံာ် အ​တၢ်​သိၣ်ဃီၣ်​လီၤ. ပ​မ့ၢ်​တူၢ်လိာ် တၢ်သိၣ်​ဃီၣ်​ ဒီး​မၤထွဲ​အီၤ​န့ၣ်​ ပ​တၢ်​အိၣ်မူ​က​ဂ့ၤထီၣ်​ ဒီး​ပ​က​အိၣ်မူ​ဘၣ်​ လီၤထူ​လီၤယိာ်​လီၤ.—ကတိၤ. ၁၀:၁၇.

ကွၢ်​တၢ်ဂီၤမူ လၢ​အမ့ၢ် “ယဟိဝၤ​ယွၤ သိၣ်ဃီၣ်​ပှၤလၢ အ​အဲၣ်​ဝဲ​တဖၣ်” ဒီး​စံးဆၢ တၢ်​သံကွၢ်​တဖၣ်​အံၤ-

• ဒီပုၢ်ဝဲၢ်​ခဲနိ အ​နီၢ်ဆံး​ခါ အ​တၢ်​အိၣ်မူ​မၤ​အသး​ဒ်လဲၣ်, ဒီး​အ​တၢ်​အိၣ်မူ ဆီတလဲ​အသး​ဒ်လဲၣ်.

• ယဟိဝၤ​ယွၤ သိၣ်ဃီၣ်​အီၤ​လၢ တၢ်အဲၣ်​တၢ်ကွံ​အ​ပူၤ​ဒ်လဲၣ်.

• ပ​ဒိးန့ၢ်​ဘၣ်​ တၢ်​မၤလိ​မနုၤ​လၢ အ​ဝဲ​အ​တၢ်​လဲၤခီဖျိ​လဲၣ်.