စီၤ​မိၤၡ့ အ​တၢ်သိၣ်​တၢ်သီ​တဲဝဲ​လၢ ပှၤ​တဂၤ​လၢ အဲၣ်ဒိး​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​န့ၣ်​ က​ဘၣ်​မၤဝဲ လံာ်​အုၣ်သး​လၢ အ​လီၤပလိာ်​ဒီး​တၢ်သိၣ်​တၢ်သီ​န့ၣ်​လီၤ. တၢ်သိၣ်​တၢ်သီ​အံၤ အ​တၢ်တိာ်ပာ်​မ့ၢ်ဝဲ ဒ်သိး​ပှၤ​သု​တ​မၤ​ကတၢၢ်​ကွံာ်ဝဲ တၢ်​ဆီဟံၣ်​ဆီဃီ လၢ​အဆိ​အချ့​တဂ့ၤ​အဂီၢ်​လီၤ. ဘၣ်ဆၣ်​ လၢ​ယ့ၣ်ၡူး​အ​စိၤ​န့ၣ်​ တၢ်ဘူၣ်​တၢ်ဘါ​ခိၣ်နၢ်​တဖၣ်​ ဒုးအိၣ်​ထီၣ်​ကျဲ​လၢ ပှၤ​က​မၤ​ကတၢၢ်​ကွံာ် တၢ်​ဆီဟံၣ်​ဆီဃီ ညီ​ညီ​ဖိ​လီၤ. ဖဲ​န့ၣ်​အဆၢ​ကတီၢ် ပှၤ​ပိာ်ခွါ​တဖၣ်​ မၤ​ကတၢၢ်​ကွံာ်ဝဲ အ​တၢ်​ဆီဟံၣ်​ဆီဃီ​သ့​လၢ တၢ်ဂ့ၢ်​ကိးမံၤဒဲး​အဃိ​လီၤ. (nwtsty တၢ်မၤနီၣ်​တဖၣ်​လၢ မၢ်. ၁၀:၄, ၁၁) ယ့ၣ်ၡူး​တဲဝဲ​လၢ ယဟိဝၤ​ယွၤ ဒုးအိၣ်​ထီၣ်​ တၢ်​ဆီဟံၣ်​ဆီဃီ ဒီး​ပာ်ဂၢၢ်​ပာ်ကျၢၤ​ဝဲ​လီၤ. (မၢ်. ၁၀:၂-၁၂) မါ​ဒီး​ဝၤ​န့ၣ်​ကဲထီၣ်​တၢ် “တသွံၣ်ဃီ​တညၣ်ဃီ” ဒီး​က​ဘၣ်​အိၣ်ဆိး​ဝဲ​တပူၤဃီ တစိၤသး​န့ၣ်​လီၤ. ဒ်​လံာ်​မးသဲ ပာ်ဖျါ​ဝဲ​အသိး ပှၤ​မၤ​ကတၢၢ်​ကွံာ် တၢ်​ဆီဟံၣ်​ဆီဃီ​သ့​ထဲ​လၢ ‘တၢ်​အဲၣ်ဘၢ​မါ​အဲၣ်ဘၢ​ဝၤ’ အဃိ​လီၤ.—မး. ၁၉:၉.

မုၢ်မဆါ​တနံၤ​အံၤ ဘၣ်ဃး​ဒီး တၢ်​ဆီဟံၣ်​ဆီဃီ​န့ၣ်​ ပှၤ​အါဂၤ တအိၣ်​ဒီး​တၢ်ထံၣ်​ ဒ်​ယ့ၣ်ၡူး​အသိး​ဘၣ်. အဝဲသ့ၣ်​အိၣ်ဒီး​တၢ်ထံၣ်​ဒ် ပှၤ​ဖၤရံၤၡဲ​တဖၣ်​အသိး​လီၤ. ဖဲ​အဝဲသ့ၣ်​ ထံၣ်ဘၣ်​တၢ်ကီ​တၢ်ခဲ​အခါ မၤ​ကတၢၢ်​ကွံာ်ဝဲ အ​တၢ်​ဆီဟံၣ်​ဆီဃီ​လၢ အဆိ​အချ့​လီၤ. မ့မ့ၢ်​ခရံာ်ဖိ နီၢ်​ဒီမါဝၤ​တဖၣ်​န့ၣ်​နၢ်ပၢၢ်​ဝဲ​လၢ အ​တၢ်​ဆီဟံၣ်​ဆီဃီ အ​တၢ်​အၢၣ်လီၤ​အီလီၤ​တခါ​အံၤ မ့ၢ်​တၢ်​လၢ​အရ့ဒိၣ်​ဒီး ဂုာ်ကျဲးစၢး​မၤထွဲ​ဝဲ လံာ်စီဆှံ​အ​တၢ်​ဟံးစု​နဲၣ်ကျဲ​တဖၣ်​ ဒ်သိး​က​လဲၤခီဖျိ​ဝဲ တၢ်ကီ​တၢ်ခဲ​တဖၣ်​အဂီၢ်​လီၤ. ကွၢ်​တၢ်ဂီၤမူ​လၢ အ​ခိၣ်တီ​မ့ၢ် တၢ်အဲၣ်​ ဒီး​တၢ်​ယူးယီၣ်​ပာ်ကဲ​န့ၣ်​ မၤဃူမၤဖိး ဟံၣ်ဖိ​ဃီဖိ, ဝံၤ​အလီၢ်​ခံ စံးဆၢ​တၢ်​သံကွၢ်​လၢ လာ်​တဖၣ်​အံၤ​တက့ၢ်.

• န​မၤထွဲ ကတိၤဒိ ၁၅:၁ လၢ​န​တၢ်​ဆီဟံၣ်​ဆီဃီ​အ​ပူၤ က​သ့​ဒ်လဲၣ်, ဒီး​ဘၣ်​မနုၤ​အဃိ အရ့ဒိၣ်​လဲၣ်.

• န​မ့ၢ်​မၤထွဲ ကတိၤဒိ ၁၉:၁၁ န့ၣ်​န​ဟးဆှဲး တၢ်ကီ​တၢ်ခဲ​တဖၣ်​က​သ့​ဒ်လဲၣ်.

• သု​နီၢ်​ဒီမါဝၤ​တဖၣ်​ မ့ၢ်​အိၣ်ဒီး​တၢ်ကီ​တၢ်ခဲ သနာ်က့ သု​က​ဆိကမိၣ်​ထီၣ်​လၢ ‘မ့ၢ်​ယ​ကြၢး မၤ​ကတၢၢ်​ကွံာ် ယ​တၢ်​ဆီဟံၣ်​ဆီဃီ​ဧါ’ အလီၢ်​န့ၣ်​ သု​ကြၢး​ဆိကမိၣ်​ တၢ်​သံကွၢ်​မနုၤ​တဖၣ်​လဲၣ်.

• န​မ့ၢ်​မၤထွဲ မးသဲ ၇:၁၂ န့ၣ်​ အ​က​မၤစၢၤ​နၤ​ဒ်သိး န​က​ကဲထီၣ်​မါ မ့တမ့ၢ် ဝၤ​လၢ​အဂ့ၤ​တဂၤ​န့ၣ်​ က​သ့​ဒ်လဲၣ်.