အိၣ်မူဒ် ခရံာ်ဖိအသိး
ကျဲသၢဘိလၢ ပကသန့ၤပသးလၢ ယဟိဝၤယွၤအဂီၢ်
စီၤဒၤဝံး သန့ၤအသးလၢ ယဟိဝၤယွၤအဃိ မၤနၢၤဝဲ စီၤကၤလယးလီၤ. (၁ မူၤ. ၁၇:၄၅) ယဟိဝၤယွၤ အဲၣ်ဒိးပာ်ဖျါထီၣ် အတၢ်စိတၢ်ကမီၤလၢ အခ့အပှၤတဖၣ် အဘျုးအဂီၢ်. (၂ ကွဲး. ၁၆:၉) ပကသန့ၤပသးလၢ ပနီၢ်ကစၢ်အတၢ်လဲၤခီဖျိ ဒီးတၢ်သ့တၢ်ဘၣ်အလီၢ် ပသန့ၤပသးလၢ တၢ်မၤစၢၤလၢ ယဟိဝၤယွၤ ကတဲာ်ကတီၤန့ၢ်ပှၤ ကသ့ဒ်လဲၣ်. ကျဲသၢဘိအံၤ ကမၤစၢၤပှၤ–
-
ဃ့ဘါထုကဖၣ်ထီဘိ. ဖဲနမၤဘၣ်တၢ်ကမၣ်အခါ ဃ့ပျၢ်နတၢ်ကမၣ်, တကးဒံးဘၣ် ဖဲနထံၣ်ဘၣ်ဒီး တၢ်လ့ပစီလၢ နကမၤကမၣ်တၢ်အခါ ဒ်သိးနကအိၣ်ဒီး တၢ်ဂံၢ်တၢ်ဘါလၢ နတြီဆၢက့ၤအီၤကန့ၢ်အဂီၢ် ဃ့ဘါထုကဖၣ်တက့ၢ်. (မး. ၆:၁၂, ၁၃) တဘၣ်ဃ့ဘါထုကဖၣ်ထဲလၢ ယဟိဝၤယွၤ ကဆိၣ်ဂ့ၤ နတၢ်ဆၢတဲာ်လၢ နမၤအီၤဝံၤတဖၣ်အဂီၢ်တဂ့ၤ. ဃ့ဘါထုကဖၣ်စ့ၢ်ကီးလၢ ယဟိဝၤယွၤ ကဟံးစုနဲၣ်ကျဲနၤ ဒီးဟ့ၣ်နၤတၢ်ကူၣ်သ့ တချုးဖဲနမၤတၢ်ဆၢတဲာ်အခါတက့ၢ်.—ယၤ. ၁:၅
-
ဖးဒီးမၤလိလံာ်စီဆှံထီဘိ. ဖးလံာ်စီဆှံကိးနံၤဒဲးတက့ၢ်. (စံး. ၁:၂) ဆိကမိၣ်ထံ ဘၣ်ဃးဒီး ပှၤအဒိအတဲာ်လၢ အအိၣ်လၢလံာ်စီဆှံအပူၤ ဒီးမၤထွဲတၢ်လၢ နမၤလိဘၣ်တဖၣ်တက့ၢ်. (ယၤ. ၁:၂၃-၂၅) လၢတၢ်စံၣ်တဲၤတဲလီၤ တၢ်မၤအပူၤန့ၣ် တဘၣ်သန့ၤနသးလၢ နနီၢ်ကစၢ်အတၢ်လဲၤခီဖျိ လၢအပူၤကွံာ်တဖၣ်တဂ့ၤ လၢတၢ်န့ၣ်အလီၢ် ကတဲာ်ကတီၤလၢ တၢ်စံၣ်တဲၤတဲလီၤတၢ်မၤအဂီၢ်တက့ၢ်. ဒ်သိးနကဒိးန့ၢ်ဘၣ် တၢ်အဘျုးလၢလၢပှဲၤပှဲၤလၢ တၢ်အိၣ်ဖှိၣ်ပူၤအဂီၢ် ကတဲာ်ကတီၤလၢ တၢ်အိၣ်ဖှိၣ်အဂီၢ်ဂ့ၤဂ့ၤတက့ၢ်.
-
ပာ်ဖှိၣ်မၤသကိးတၢ်ဒီး ယဟိဝၤယွၤ အတၢ်ကရၢကရိ. တၢ်ဟံးစုနဲၣ်ကျဲအသီလၢ အဟဲလၢ တၢ်ကရၢကရိအအိၣ်န့ၣ် မၤထွဲအီၤလၢအဆိအချ့တက့ၢ်. (၄ မိၤ. ၉:၁၇) ဒိကနၣ် တၢ်အိၣ်ဖှိၣ်သးပှၢ်တဖၣ် အတၢ်ဟ့ၣ်ကူၣ်ဟ့ၣ်ဖး ဒီးအတၢ်ဟံးစုနဲၣ်ကျဲတက့ၢ်.—ဧ့ၤ. ၁၃:၁၇
ကွၢ်တၢ်ဂီၤမူလၢအမ့ၢ် တၢ်မၤအၢမၤနးတဖၣ်န့ၣ် ပတလိၣ်ပျံၤအီၤဘၣ် ဒီးစံးဆၢတၢ်သံကွၢ်တဖၣ်အံၤ–
• တၢ်ပျံၤတၢ်ဖုးလၢ ဒီပုၢ်ဝဲၢ်မုၣ်ခွါတဖၣ် လဲၤခီဖျိဘၣ်ဝဲန့ၣ် မ့ၢ်မနုၤလဲၣ်.
• ဒ်သိးအဝဲသ့ၣ် လဲၤခီဖျိဝဲ တၢ်ပျံၤတၢ်ဖုးတဖၣ်ကန့ၢ်အဂီၢ် တၢ်မနုၤမၤစၢၤအဝဲသ့ၣ်လဲၣ်.