အိၣ်မူဒ် ခရံာ်ဖိအသိး
ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်ဝံၤအလီၢ်ခံ ပမၤစၢၤတၢ် ကသ့ဒ်လဲၣ်
ဆၢကတီၢ်ခဲအံၤန့ၣ် န့ဆၢၣ်တၢ်ဘၣ်ဒိဘၣ်ထံး ကဲထီၣ်အသး အါထီၣ်မၣ်အါထီၣ်. ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်အသးအခါ ဒ်သိးပှၤကမၤစၢၤ ပှၤလၢအဘၣ်ကီဘၣ်ခဲအဂီၢ် ပှၤဘၣ်ရဲၣ်လီၤကျဲၤလီၤတၢ်ဂ့ၤဂ့ၤ ဒီးမၤသကိးတၢ် ဃူဃူဖိးဖိး. အဃိ ပှၤပၢဆှၢတၢ်ကမံးတံာ်န့ၣ် ဒုးအိၣ်ထီၣ်ဝဲ န့ဆၢၣ်တၢ်ဘၣ်ဒိဘၣ်ထံး ဝဲၤကျိၤ လၢဝဲၤတြၢ်ကိးဖျၢၣ်ဒဲး.
ဒီပုၢ်ဝဲၢ်လၢ အမၤတၢ်လၢ န့ဆၢၣ်တၢ်ဘၣ်ဒိဘၣ်ထံး ဝဲၤကျိၤ မ့ၢ်သ့ၣ်ညါဝဲလၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်အသး တမံၤမံၤန့ၣ် ဒ်သိး အဝဲသ့ၣ် ကသ့ၣ်ညါဝဲ ဒီပုၢ်ဝဲၢ်မုၣ်ခွါဖဲန့ၣ်တဖၣ် အတၢ်လိၣ်ဘၣ်အဂီၢ် အဝဲသ့ၣ် ကဆဲးကျိးဒီး တၢ်အိၣ်ဖှိၣ်သးပှၢ်လၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်အလီၢ်တဘျီဃီ. တၢ်ဘၣ်ဒိဘၣ်ထံး မ့ၢ်ကဲထီၣ်အသး အါတလၢ တုၤလၢဒီပုၢ်ဝဲၢ်ဖဲန့ၣ်တဖၣ် မၤစၢၤလိာ်သးလၢ အနီၢ်ကစၢ်တသ့ဘၣ်န့ၣ် ဝဲၤတြၢ်ကမၢ ဒီပုၢ်ဝဲၢ်ခွါတနီၤ ရဲၣ်ကျဲၤတၢ်လၢ ကမၤစၢၤ ဒီပုၢ်ဝဲၢ်တဖၣ်အဂီၢ်. ဒီးဒီပုၢ်ဝဲၢ်ခွါတဖၣ်အံၤ ကသံကွၢ်ဝဲ ဒီပုၢ်ဝဲၢ်အဂၤတဖၣ် လၢကလဲၤမၤစၢၤတၢ် မ့တမ့ၢ် ကဟ့ၣ်ဝဲ တၢ်ဖိတၢ်လံၤလၢ အလိၣ်ဘၣ်တဖၣ် မ့တမ့ၢ်ဘၣ်န့ၣ် အဝဲသ့ၣ် ကလဲၤပှ့ၤဝဲ တၢ်ဖိတၢ်လံၤလၢ ဒီပုၢ်ဝဲၢ်တဖၣ် လိၣ်ဘၣ်ဝဲ.
ပမၤဒ်အံၤအဃိ ကကဲဘျုးဝဲဒိၣ်မး. ဒီပုၢ်ဝဲၢ်တဖၣ် မ့ၢ်တအိၣ်ခီး တၢ်ဟံးစုနဲၣ်ကျဲဘၣ် ဒီးမ့ၢ်လဲၤဝၣ်လီၤမၤစၢၤတၢ် လၢအနီၢ်ကစၢ် ဒီးလၢခံမၣ် ဒီပုၢ်ဝဲၢ်လၢအရဲၣ်ကျဲၤတၢ်တဖၣ် မ့ၢ်ဟဲမၤစၢၤတၢ်န့ၣ် တၢ်မၤကကဲထီၣ်အသးခံဘျီ, မ့တမ့ၢ် တၢ်ဂ့ၢ်ကဘံဘူ ဒီးတၢ်မၤဘူၣ် ဒီးတၢ်ဖိတၢ်လံၤတဖၣ် ကဲထီၣ်တၢ်ကလီကလီသ့.
ကျိၣ်စ့ကလၢာ်ထဲလဲၣ် ဒီးပှၤကလိၣ်ဘၣ် ပှၤမၤစၢၤတၢ် ပှဲၤဂၤလဲၣ်န့ၣ် ဒီပုၢ်ဝဲၢ်လၢ ဝဲၤတြၢ်ဟ့ၣ်လီၤအီၤမူဒါတဖၣ် တယာ်ဝဲသ့. ဒီးအဝဲသ့ၣ် ကတဲသကီးတၢ်ဒီး လီၢ်ကဝီၤ အပှၤဘၣ်မူဘၣ်ဒါတဖၣ်, မ့ၢ်လၢ လီၢ်ကဝီၤ အပှၤဘၣ်မူဘၣ်ဒါတဖၣ်န့ၣ် မၤစၢၤပှၤဒ်သိး တၢ်မၤကဝံၤချ့ချ့အဂီၢ်သ့. အဃိ ဒီပုၢ်ဝဲၢ်လၢ အတီခိၣ်ရိၤမဲတၢ်တဖၣ် မ့ၢ်တဃ့နၤတၢ်မၤစၢၤဘၣ်န့ၣ် တဘၣ်ထၢဆိတၢ်မၤဘူၣ်, ဆှၢလီၤတၢ်ဖိတၢ်လံၤ လၢပှၤလိၣ်ဘၣ် မ့တမ့ၢ် လဲၤမၤစၢၤတၢ်လၢ နနီၢ်ကစၢ်တဂ့ၤ.
မ့ၢ်လၢပအဲၣ် ပဒီပုၢ်ဝဲၢ်အဃိ ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်သးအခါ ပအဲၣ်ဒိးလဲၤမၤစၢၤ အဝဲသ့ၣ်. (ဧ့ၤ ၁၃:၁၆) ပမၤစၢၤအဝဲသ့ၣ် ကသ့ဒ်လဲၣ်. ပမၤစၢၤသ့ခီဖျိ ပဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ် ဒီးပှၤလၢ အလဲၤမၤစၢၤအဝဲသ့ၣ်အဂီၢ်သ့. တကးဒံးဘၣ် ပဟ့ၣ်လီၤတိၢ်မၤဘူၣ်လၢ တၢ်ဖံးတၢ်မၤလၢ ဟီၣ်ခိၣ်ဒီဘ့ၣ်အဂီၢ်သ့. ပှၤပၢဆှၢတၢ်ကမံးတံာ်န့ၣ် အဝဲသ့ၣ် ဟံးစုနဲၣ်ကျဲဝဲ ဝဲၤတြၢ်အဃိ ပနာ်သ့သပှၢ်ကတၢၢ်လၢ ဝဲၤတြၢ်တဖၣ် သူဝဲတၢ်မၤဘူၣ်လၢ အဂ့ၤကတၢၢ်သ့. နမ့ၢ်အဲၣ်ဒိး လဲၤမၤစၢၤတၢ်လၢ နနီၢ်ကစၢ်န့ၣ် နမၤပှဲၤ လံာ်လၢ ပှၤကလဲၤမၤစၢၤ လီၢ်ကဝီၤတၢ်သူၣ်ထီၣ်ဘှီထီၣ်တၢ်မၤ (DC-50) သ့.
ကွၢ်တၢ်ဂီၤမူလၢအမ့ၢ် ထံဒိၣ်ထီၣ်လၢ ကီၢ်ဘြၣ်စ့ ဒီးတၢ်ဟးဂီၤအါမး ဒီးစံးဆၢတၢ်သံကွၢ်လၢ တၢ်ဖီလာ်တဖၣ်အံၤ–
ဖဲ ၂၀၂၀ ထံဒိၣ်ထီၣ်လၢ ကီၢ်ဘြၣ်စ့ဝံၤအလီၢ်ခံ ဘၣ်ဃးဒီး ယဟိဝၤပှၤအုၣ်အသးတဖၣ် လဲၤမၤစၢၤတၢ်န့ၣ် နဘၣ်သူၣ်ဘၣ်သး တၢ်ဂ့ၢ်ဖဲလဲၣ်တခါလဲၣ်.
