လံာ်​လၢ​အမ့ၢ် မုၢ်မဆါ​တနံၤ​အံၤ မတၤ​တဖၣ်​မၤ​ယဟိဝၤ​ယွၤ အ​တၢ်​ဘၣ်သး​လဲၣ် န့ၣ်​မ့ၢ်​လံာ်​တဘ့ၣ်​လၢ ပ​သူ​အီၤ​လၢ တၢ်​မၤလိ​လံာ်စီဆှံ​အဂီၢ် ဖဲ​တချုး​ပ​သိၣ်လိ​ပှၤဂၤ​လံာ်စီဆှံ​အခါ မ့တမ့ၢ် ဖဲ​ပ​သိၣ်လိ​ပှၤ​လံာ်စီဆှံ ဝံၤ​အလီၢ်​ခံ​န့ၣ်​လီၤ. * တၢ်​မၤလိ ၁ တုၤလၢ ၄ န့ၣ်​မၤစၢၤ ပှၤ​မၤလိ​လံာ်စီဆှံ​ဖိ​တဖၣ်​ ဒ်သိး​က​သ့ၣ်ညါ​အါထီၣ်​ ပ​ဂ့ၢ်, တၢ်​မၤလိ ၅ တုၤ ၁၄ န့ၣ်​က​မၤစၢၤ​အဝဲသ့ၣ်​ ဒ်သိး က​သ့ၣ်ညါ​ဝဲ တၢ်​လၢ​ပ​မၤ​အီၤ​တဖၣ်, ဒီး​တၢ်​မၤလိ ၁၅ တုၤလၢ ၂၈ န့ၣ်​ပာ်ဖျါ​ထီၣ်ဝဲ ပ​တၢ်​ကရၢကရိ အ​တၢ်ဖံး​တၢ်မၤ​တဖၣ်​န့ၣ်​လီၤ. န​မ့ၢ်​တဲသကိး တၢ်​မၤလိ​တခါ​ဝံၤ​တခါ​န့ၣ်​ ဂ့ၤ​ဝဲ ဘၣ်ဆၣ်​ တၢ်​မၤလိ​လၢ ပှၤ​မၤလိ​လံာ်စီဆှံ​ဖိ သး​စဲ​ဝဲ​ဒိၣ်ကတၢၢ် မ့ၢ်​အိၣ်​န့ၣ်​ န​တဲသကိး​လၢညါ​သ့​လီၤ. တၢ်​မၤလိ​တခါ​စုာ်စုာ်​န့ၣ်​ အိၣ်​ဒၣ်ထဲ​လံာ်​ကဘျံးပၤ တ​ကပၤ​အဃိ အါတက့ၢ်န့ၣ်​ န​တဲသကိး​အီၤ ယဲၢ်​မံးနံး မ့တမ့ၢ် အ​မံးနံး​တဆံ​သ့ဝဲ​လီၤ.

• ဒုးနဲၣ်​အီၤ တၢ်​သံကွၢ်​လၢ​အမ့ၢ် တၢ်​မၤလိ​အ​ခိၣ်တီ

• န​ဖး​အီၤ​တုၤလၢ အ​ကတၢၢ် မ့တမ့ၢ် န​ဖး​အီၤ​တ​ဆၢ​ဝံၤ​တ​ဆၢ​ဒီး န​တဲသကိး​အီၤ​သ့ဝဲ​လီၤ

• တဲသကိး​တၢ်ဂ့ၢ်​လၢ န​ဖး​အီၤ ဒီး​သူ​တၢ်​သံကွၢ်​လၢ လံာ်​ကဘျံးပၤ အ​ခီၣ်ထံး​ဒီး တၢ်ဂီၤ​တက့ၢ်. ဖး​ဒီး​တဲသကိး လံာ်စီဆှံ​အဆၢ​လၢ န​အဲၣ်ဒိး​ဖး​န့ၣ်​တက့ၢ်. တဲ​နၢ်ပၢၢ်​အီၤ​လၢ လံာ်​အ​ခိၣ်တီ​ဖိ​တဖၣ်​ စံးဆၢ​တၢ်​သံကွၢ်​လၢ တၢ်​မၤလိ​အ​ခိၣ်တီ​ဒ်လဲၣ်​န့ၣ်​တက့ၢ်

• လၢ​တၢ်​မၤလိ​အ​ပူၤ တၢ်လွံၢ်နၢၣ်​လၢ​အမ့ၢ် “ဃု​သ့ၣ်ညါ​အါထီၣ်​တက့ၢ်” မ့ၢ်​အိၣ်​န့ၣ်​ ဖး​သကိး​ဒီး နပှၤ​မၤလိ​လံာ်စီဆှံ​ဖိ​ဒီး ဟ့ၣ်ဂံၢ်​ဟ့ၣ်ဘါ​အီၤ​လၢ က​မၤထွဲ​ဝဲ တၢ်ဟ့ၣ်ကူၣ်​လၢ အ​အိၣ်​ဖဲ​န့ၣ်​တက့ၢ်