အိၣ်မူဒ် ခရံာ်ဖိအသိး
တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—တၢ်ကွဲးလံာ်ပရၢ
ဘၣ်မနုၤအဃိ အရ့ဒိၣ်လဲၣ်– စီၤပီလူး ကွဲးဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်တဖၣ်လၢလံာ် ၁၄ ဘ့ၣ်အကျါ ပၣ်ဃုာ်ဒီး လံာ် ၁ ကရံၣ်သူးလီၤ. ဖဲပှၤတဂၤ ကွဲးလံာ်အခါ အဝဲမ့ၢ်ဟံးန့ၢ်တၢ်ဆၢကတီၢ် ဒီးဃုထၢဝဲ တၢ်ကတိၤလီၤတံၢ်လီၤဆဲးန့ၣ် ပှၤလၢအဒိးန့ၢ်ဘၣ်လံာ်တဂၤ ကအဲၣ်ဒိးဖးဝဲလံာ်အံၤ တဘျီဝံၤတဘျီလီၤ. တၢ်ကွဲးလံာ်န့ၣ် မ့ၢ်ကျဲအဂ့ၤတဘိလၢ ပကစံၣ်တဲၤတဲလီၤတၢ်ဆူ ပဘူးပတံၢ် ဒီးပှၤလၢပသ့ၣ်ညါသ့ၣ်ခိးတဖၣ် အအိၣ်လီၤ. ဒီးတၢ်ကွဲးလံာ်န့ၣ်မ့ၢ်စ့ၢ်ကီး ကျဲတဘိလၢ ပကစံၣ်တဲၤတဲလီၤဘၣ် ပှၤလၢပလဲၤထံၣ်ဒီးအီၤ တသ့ဘၣ်တဖၣ်လီၤ. အဒိ, ပှၤတဂၤဂၤ အသးကအိၣ်တၢ်မ့ၢ်တၢ်တီ ဘၣ်ဆၣ် ပလဲၤဃုအီၤလၢ အဟံၣ်တဘၣ်ဘၣ်. ပှၤတနီၤလၢအအိၣ်လၢ ပဟီၣ်ကဝီၤပူၤတဖၣ်န့ၣ် မ့ၢ်လၢအဝဲသ့ၣ်အိၣ်လၢ ဟံၣ်တၢးဖးထီတဖၣ်လၢ အိၣ်ဒီးပှၤခိးတၢ်ဖိ, ဟံၣ်လၢအိၣ်ဒီးကရၢၢ်ဖးလဲၢ် မ့တမ့ၢ် တၢ်လီၢ်လၢ ပှၤလဲၤတတုၤကြီကြီဘၣ်. အဃိ ပကထံၣ်ဘၣ်ဒီးအဝဲသ့ၣ်န့ၣ် တညီဘၣ်. ဖဲပကွဲးလံာ်ဆူ ပှၤလၢပတသ့ၣ်ညါအီၤတဖၣ် အအိၣ်အခါ ပကဘၣ်သ့ၣ်နီၣ်ထီၣ် တၢ်ဂ့ၢ်မနုၤတဖၣ်လဲၣ်.
ပမၤကသ့ဒ်လဲၣ်–
-
တဲတၢ်ဂ့ၢ်ထဲလၢ နမ့ၢ်ထံၣ်အီၤ နကတဲဘၣ်အီၤတဖၣ်တက့ၢ်. အဆိကတၢၢ်န့ၣ် ပာ်ဖျါထီၣ်နဂ့ၢ်တစဲး ဒီးတဲဘၣ်အီၤ တၢ်ဂ့ၢ်လီၤတံၢ်လီၤဆဲးလၢ ဘၣ်မနုၤအဃိ နကွဲးလံာ်ဆူအအိၣ်လဲၣ်. သံကွၢ်တၢ်သံကွၢ်တခါလၢ အဝဲကဆိကမိၣ်ထံဝဲအဂီၢ် ဒီးဒုးသ့ၣ်ညါအီၤ ပပှာ်ယဲၤသန့တက့ၢ်. ဝံၤဒီး တဲဘၣ်အီၤ ဘၣ်ဃးဒီး တၢ်မၤလိ လံာ်စီဆှံ အတၢ်ရဲၣ်တၢ်ကျဲၤ မ့တမ့ၢ် ကွဲးဖျါထီၣ် တၢ်မၤလိ အတၢ်ဂ့ၢ်ခိၣ်တီတခါလၢ အအိၣ်လၢ လံာ်လဲၢ်လၢတၢ်မၤလိအဂီၢ် တဘ့ၣ်ဂ့ၤတဘ့ၣ်ဂ့ၤ အပူၤတက့ၢ်. နဖၢနုာ် ခးက့, လံာ်ကွဲမုာ် မ့တမ့ၢ် လံာ်ဖိတဘ့ၣ်ဘ့ၣ် လၢလံာ်ဒၢအပူၤသ့လီၤ.
-
ကွဲးအီၤဖုၣ်ဖုၣ်ဖိ. နကွဲးလံာ်မ့ၢ်ထီတလၢန့ၣ် ပှၤလၢအဖးနလံာ်တဂၤ တမ့ၢ်ကအဲၣ်ဒိးဖးဝဲလၢၤဘၣ်. ကွၢ်တၢ်ကွဲးလံာ်ပရၢအဒိတက့ၢ်.
-
မ့ၢ်အကမၣ်အိၣ်ဧါ, ပှၤဖးဘၣ်အီၤညီဧါ, တၢ်ကတိၤတဖၣ်န့ၣ် မ့ၢ်ပှၤကနၣ်အီၤမုာ်ဧါ ဒီးကန့ၢ်ဂံၢ်န့ၢ်ဘါဧါန့ၣ် က့ၤသမံသမိးကွၢ်အီၤတက့ၢ်. ကျးလီၤ တၢ်ဂီၤခိၣ် လၢလၢပှဲၤပှဲၤတက့ၢ်.
