တၢ်မ့ၢ်​တၢ်တီ​အချံ​အ​တဖၣ်​လၢ ပ​သူၣ်​လီၤ​အီၤ​န့ၣ် ပ​အဲၣ်ဒိး​လူ​အီၤ​လၢ​ထံ​လီၤ. (၁ ကရံၣ်. ၃:၆) ဖဲ​ပ​ထံၣ်ဘၣ် ပှၤ​တဂၤဂၤ​လၢ အ​ပာ်ဖျါ​ထီၣ်​တၢ်​သးအိၣ်​အခါ ပ​ကြၢး​သံကွၢ်​အီၤ တၢ်​သံကွၢ်​တဖျၢၣ် လၢ​ပ​က​ဟဲက့ၤ တဲသကိး​ဒီး​အီၤ လၢခံတဘျီ​အဂီၢ်​န့ၣ်​လီၤ. ပ​မ့ၢ်​မၤ​ဒ်​န့ၣ်​န့ၣ် ပ​ဒုးအိၣ်​ထီၣ် အဝဲ​အ​တၢ်​ဆိကမိၣ်​ဒီး ကညီ​ဝဲ​လၢ​ပ​က​က့ၤ​အိၣ်သကိး​အီၤ​အဂီၢ်​န့ၣ်​လီၤ. ဖဲ​ပ​က့ၤ​အိၣ်သကိး​အီၤ​အခါ ပ​တဲ​အီၤ​သ့​လၢ ပ​ဟဲက့ၤ​အိၣ်သကိး​က့ၤ​နၤ​လၢ ပ​က​စံးဆၢ​က့ၤ​တၢ်​သံကွၢ်​လၢ အ​ပူၤကွံာ်​တနွံ​န့ၣ်​လီၤ.

• ဖဲ​န​ကတဲာ်​ကတီၤ​တၢ်ဂ့ၢ်​လၢ တချုး​လၢ​န​က​ဟး​စံၣ်တဲၤ​တဲလီၤ​တၢ် တ​ဟံၣ်​ဘၣ်​တ​ဟံၣ်​အခါ ကတဲာ်​ကတီၤ​ဃုာ်ဒီး တၢ်​သံကွၢ်​လၢ န​က​ပာ်တ့ၢ်​န့ၢ်​ဟံၣ်​ကစၢ် လၢ​န​က​က့ၤ​စံးဆၢ​က့ၤ​အီၤ လၢခံ​တနွံ​အဂီၢ်​န့ၣ်​တက့ၢ်. န​ဃုထံၣ်န့ၢ်​တၢ်​သံကွၢ်​လၢ လံာ်​လၢ​န​က​နီၤလီၤ​အီၤ​အ​ပူၤ သ့ဝဲ​လီၤ. မ့တမ့ၢ် န​ဃုထၢ​တၢ်​သံကွၢ်​ဒီး အ​တၢ်​စံးဆၢ​လၢ တၢ်​မၤလိ​အ​လံာ်​တဘ့ၣ်ဘ့ၣ်​အ​ပူၤ​သ့​လီၤ.

• ဖဲ​န​တဲတၢ်​ဒီး​ပှၤလၢ အသး​အိၣ်​တၢ်မ့ၢ်​တၢ်တီ​တဂၤဂၤ​အခါ ဒုး​သ့ၣ်ညါ​အီၤ​လၢ န​အဲၣ်ဒိး​ဟဲက့ၤ​အိၣ်သကိး​အီၤ​လၢခံတဘျီ ဒီး​သံကွၢ်​အီၤ​တၢ်​သံကွၢ်​လၢ န​ကတဲာ်​ကတီၤ​ပာ်​န့ၣ်​တက့ၢ်. မ့ၢ်​သ့​န့ၣ် ဃ့​တၢ်ဂ့ၢ်​တၢ်ကျိၤ​ဒ်သိး န​ဆဲးကျိး​ဒီး​အီၤ​က​သ့​အဂီၢ်​တက့ၢ်.

• န​မ့ၢ်​ဒုး​သ့ၣ်ညါ​အီၤ တၢ်​ဆၢကတီၢ်​လီၤတံၢ်​လီၤဆဲး​လၢ န​က​ဟဲက့ၤ​အိၣ်သကိး​အီၤ​အဂီၢ်​န့ၣ် တီ​ဒီး​န​တၢ်ကတိၤ​လၢ န​က​က့ၤ​အိၣ်သကိး​အီၤ​တက့ၢ်.—မး. ၅:၃၇.