လံာ်စီဆှံ တဲဆိ​ပာ်ဝဲ​လၢ မုၣ်ကီၤလံၢ် က​မၤအၢ​မၤနး​ပှၤ ဒ်သိး​က​မၤတံာ်တာ် ပ​တၢ်​စံၣ်တဲၤ​တဲလီၤ​တၢ်မၤ​အဂီၢ်​လီၤ. (ယိၤ. ၁၅:၂၀; လီၣ်. ၁၂:၁၇) ခရံာ်ဖိ​လၢ အဘၣ်​တၢ်​မၤနး​မၤဖှီၣ်​အီၤ​လၢ အ​အိၣ်​လၢ​ထံကီၢ်​အဂၤ​တဖၣ်​န့ၣ်​ ပ​မၤစၢၤ​အီၤ​က​သ့​ဒ်လဲၣ်. ပ​ဃ့​ထုကဖၣ်​လၢ အဝဲသ့ၣ်​အဂီၢ်​သ့ဝဲ​လီၤ. “ပှၤတီ​ပှၤလိၤ အ​တၢ်​ထုကဖၣ်​ သပှၢ်​သပှၢ်​န့ၣ်, မၤန့ၢ်​တၢ်​အါမး​လီၤ.”—ယၤ. ၅:၁၆.

ပ​ဃ့​တၢ်ဂ့ၢ်​မနုၤ​သ့​လဲၣ်. ပ​ဃ့​လၢ ယဟိဝၤ​ယွၤ က​ဟ့ၣ်​ပ​ဒီပုၢ်ဝဲၢ်​တဖၣ်​ တၢ်​သူၣ်ဒူ​သးဒူ ဒီး​မၤစၢၤ​အီၤ​ဒ်သိး အ​သု​တ​ပျံၤတၢ်​တဂ့ၤ​အဂီၢ်​သ့ဝဲ​လီၤ. (ၡါ. ၄၁:၁၀-၁၃) ပ​ဃ့​ထုကဖၣ်​ ဒ်သိး​ပှၤလၢ​အ​န့ၢ်စိ​န့ၢ်ကမီၤ​တဖၣ်​ က​အဲၣ်ဒိး​ဟ့ၣ်​အခွဲး​လၢ တၢ်​စံၣ်တဲၤ​တဲလီၤ​တၢ်မၤ​ဒီး “ပ​က​အိၣ်ဂၢၢ်​အိၣ်ဘှီၣ်, ဒီး​အိၣ်ဃူ​အိၣ်ဖိး” အဂီၢ်​လီၤ.—၁ တံၤ. ၂:၁, ၂.

ဖဲ​စီၤ​ပီလူး ဒီး​စီၤ​ပ့းတရူး ဘၣ်​တၢ်​မၤနး​မၤဖှီၣ်​အီၤ​အခါ ပှၤခရံာ်ဖိ​လၢ တၢ​ယၤဖှိၣ်​အ​စိၤ​တဖၣ်​ ကိးထီၣ်​အဝဲသ့ၣ်​အ​မံၤ​ဒီး ဃ့​ဘါ​ထုကဖၣ်​တၢ်​လၢ အဝဲသ့ၣ်​အဂီၢ်​လီၤ. (မၤတၢ် ၁၂:၅; ရိ. ၁၅:၃၁, ၃၂) မုၢ်မဆါ​တနံၤ​အံၤ ပ​မ့ၢ်​တ​သ့ၣ်ညါ ပ​ဒီပုၢ်ဝဲၢ်​လၢ အဘၣ်​တၢ်​မၤနး​မၤဖှီၣ်​အီၤ ကိးဂၤ​ဒဲး​အ​မံၤ​ဒၣ်လဲာ် မ့ၢ်​ပ​ဃ့​ဘါ​ထုကဖၣ်​ လၢ​အဝဲသ့ၣ်​အဂီၢ် ခီဖျိ​ပ​ကိးထီၣ်​ အ​တၢ်​အိၣ်ဖှိၣ်, အထံ​အ​ကီၢ် မ့တမ့ၢ် အိၣ်​တၢ်​အလီၢ်​အ​မံၤ​က​သ့ဧါ.