ထံၣ်တမှံ​ကွၢ်​လၢ န​အိၣ်မူ​ဘၣ်​ဖဲ ယ့ၣ်ၡူး​အ​စိၤ​ဒီး န​အိၣ်​လၢ​ကၤလံၤလါ​န့ၣ်​တက့ၢ်. န​လဲၤ​လၢ​ဝ့ၢ်​ယရူၤၡလ့ၣ်​ ဒ်သိး​န​က​လဲၤ​မၤ ဘူၣ်​ဒဲ​အဂီၢ်​လီၤ. ဝ့ၢ်​အံၤ​ပှဲၤဝဲ​ဒီး ပှၤလၢ​အ​ဘူၣ်ထီၣ်​ဘါထီၣ်​ယွၤ ဒီး​အဝဲသ့ၣ်​ဟဲ​လၢ တၢ်လီၢ်​အယံၤ​တဖၣ်​လီၤ. ဒီး​န​အဲၣ်ဒိး​ဟ့ၣ်​လုၢ်ထီၣ်​တၢ်​လၢ ယဟိဝၤ​ယွၤ​အ​အိၣ်​လီၤ. အဃိ​န​မိၤ​ထီၣ်​ န​မဲာ်တဲးလဲး, န​စးထီၣ်​လဲၤတၢ်, န​လဲၤ​ဖၠး​ပှၤ​ဂီၤ​မုၢ်​တဖၣ်​ ဒီး​ဝ့ၢ်​အကျဲ​ဆံး​ဆံး​ဖိ​တဖၣ်​ဝံၤ န​လဲၤ​လၢ တၢ်လုၢ်ဟံၣ်​လီၤ. ဖဲ​န​လဲၤ​တုၤလၢ တၢ်လုၢ်ဟံၣ်​အခါ န​ထံၣ်ဘၣ်​ပှၤအဂၤ​တဖၣ်​လၢ အ​အဲၣ်ဒိး​ဟ့ၣ်​လုၢ်ထီၣ်​တၢ်​လီၤ. ဒီး​လၢခံကတၢၢ်​န့ၣ်​ တၢ်​ဆၢကတီၢ်​ဘၣ်​လၢ န​က​ဘၣ်​ဟ့ၣ်လီၤ န​မဲာ်တဲးလဲး​လၢ ပှၤလုၢ်တၢ်​အ​ဒိၣ်​အစုပူၤ​လီၤ. ဖဲ​န့ၣ်​အဆၢ​ကတီၢ် န​သ့ၣ်နီၣ်​ထီၣ်​လၢ ဒီပုၢ်ဝဲၢ်​တဂၤ တ​ဘၣ်လိာ်ဖိးဒ့​ဒီး​နၤ​ဘၣ်. ဒီး​အဝဲ​ကအိၣ်​လၢ ပှၤ​ဂီၢ်မုၢ်​အကျါ​ဧါ, ကအိၣ်​လၢ ဝ့ၢ်​ပူၤ လၢ​တၢ်လီၢ်​ဖဲလဲၣ်​န့ၣ်​ န​တ​သ့ၣ်ညါ​ဘၣ်. ယ့ၣ်ၡူး​တဲဝဲ​လၢ န​ကြၢး​မၤ​တၢ်မနုၤ​လဲၣ်. (ဖး မးသဲ ၅:၂၄ တက့ၢ်.) ဒ်​ယ့ၣ်ၡူး​စံး​ဝဲ​အသိး န​မ့ၢ်​တ​ဘၣ်လိာ်ဖိးဒ့​ဒီး ဒီပုၢ်ဝဲၢ်​တဂၤ​န့ၣ်​ နၤ​ဒီး​န​ဒီပုၢ်ဝဲၢ် မၤဃူမၤဖိး​လိာ်သး​က​သ့​ဒ်လဲၣ်. တၢ်​စံးဆၢ​လၢ​လာ်အံၤ​အကျါ မၤ​ပနီၣ်​ဃာ်​တၢ်​စံးဆၢ​လၢ​အဘၣ်​တက့ၢ်.

န​ကြၢး . . .

• လဲၤ​တဲတၢ်​ဒီး​န​ဒီပုၢ်ဝဲၢ် ထဲဒၣ်​ဖဲ န​ဆိကမိၣ်​လၢ န​မၤ​ကမၣ်​အီၤ​နီၢ်နီၢ်​အဃိ

• လဲၤ​တဲတၢ်​ဒီး​န​ဒီပုၢ်ဝဲၢ်​ခီဖျိ န​အဲၣ်ဒိး​ဂုာ်ကျဲးစၢး မၤ​ဘှီ​ဘၣ်​ထီၣ်​ အ​တၢ်​ဆိကမိၣ်, မ့ၢ်​လၢ​အဝဲ​အသး​ဘၣ်ဒိ​ညီ ဒီး​အဝဲ အ​တၢ်ကမၣ်​တ​ပူၤ​အဃိ

• ဖဲ​ဒီပုၢ်ဝဲၢ် တဲ​ဖျါထီၣ်​အ​တၢ်ဂ့ၢ်​အခါ ဒိကနၣ်​န့ၢ်​အီၤ​လၢ တၢ်သးစူၤ​အ​ပူၤ​ဒီး န​မ့ၢ်​တ​နၢ်ပၢၢ် လီၤတံၢ်​လီၤဆဲး​သနာ်က့ လၢ​တၢ်​တ​ပာ်သူၣ်​ပာ်သး​အ​ပူၤ န​မၤဘၣ်ဒိ​အသး​အဃိ ဃ့​ဝံသးစူၤ​အီၤ

န​ဒီပုၢ်ဝဲၢ်​ကြၢး . . .

• တဲဘၣ်​ ဒီပုၢ်ဝဲၢ်​အဂၤ​တဖၣ်​လၢ န​မၤ​ကမၣ်​အီၤ​ဒ်လဲၣ်

• ပာ်ဒ့ၣ်​ပာ်ကမၣ်​နၤ, တဲ​က့ၤဝဲ တၢ်ဂ့ၢ်​ဆံး​ဆံး​ဖိ​ခဲလၢာ်​လၢ ဘၣ်ဃး​ဒီး​သု​တၢ်ဂ့ၢ်ကီ ဒီး​မၢ​န​အၢၣ်လီၤ​န​တၢ်ကမၣ်

• တူၢ်လိာ်ဝဲ န​တၢ်ဆီၣ်​လီၤသး, န​တၢ်​သူၣ်ဒူ​သးဒူ လၢ​န​လဲၤ​ဆူ​အ​အိၣ်ဒီး ပျၢ်​ကွံာ်​န​တၢ်ကမၣ်​ လၢာ်​လၢာ်​ဆ့ဆ့

မုၢ်မဆါ​တနံၤ​အံၤ ဖဲ​ပ​ဘူၣ်ထီၣ်​ဘါထီၣ်​ ယဟိဝၤ​ယွၤ​အခါ တ​လိၣ်​လၢ​ပ​လုၢ်ထီၣ်​ ဆၣ်ဖိ​ကီၢ်ဖိ​ဘၣ်. ဘၣ်ဆၣ်​ ပ​တၢ်​ရ့လိာ်သး​ဒီး ဒီပုၢ်ဝဲၢ်​တဖၣ်​ ဘၣ်ထွဲ​လိာ်အသး​ဒီး ပ​တၢ်​ဘူၣ်ထီၣ်​ဘါထီၣ်​ယွၤ​န့ၣ်​ ယ့ၣ်ၡူး​သိၣ်လိ​ပှၤ​ဒ်လဲၣ်.