ဘၣ်​မနုၤ​အဃိ အရ့ဒိၣ်​လဲၣ်– တၢ်​ရ့လိာ်သး​လၢ အ့ထၢၣ်နဲး​အကျိၤ​အကျဲ​တဖၣ်​ (social networks) အ​တၢ်ပီးတၢ်လီ​အါတက့ၢ်န့ၣ်​ အဘျုး​အိၣ်​လၢ​ပဂီၢ်​သ့ မ့တမ့ၢ် မၤဘၣ်ဒိ​ပှၤ​သ့​လီၤ. ခရံာ်ဖိ​တနီၤ​န့ၣ်​ ဃုထၢ​ဝဲ​လၢ တ​သူဝဲ တၢ်​ရ့လိာ်သး​လၢ အ့ထၢၣ်နဲး​အကျိၤ​အကျဲ​တဖၣ်​ဘၣ်​ မ့တမ့ၢ် ခရံာ်ဖိ​အဂၤ​တဖၣ်​ သူဝဲ​အ့ထၢၣ်နဲး​ဒ်သိး​က​ဆဲးကျိး​လိာ်အသး​ဒီး အဟံၣ်​ဖိ​ဃီဖိ​ဒီး အ​တံၤသကိး​တဖၣ်​အဂီၢ်​လီၤ. ဘၣ်ဆၣ်​ မုၣ်ကီၤလံၢ် အဲၣ်ဒိး​လၢ ပ​ကသူ​အ့ထၢၣ်နဲး​လၢ ကျဲ​လၢ​တဂ့ၤ​တဘၣ်​ ဒ်သိး ပ​မံၤဂ့ၤ​သၣ်ဂ့ၤ​ဒီး ပ​တၢ်​ရ့လိာ်သး​ဒီး​ယွၤ​က​ဟးဂီၤ​ဝဲ​အဂီၢ်​လီၤ. ဒ်​ယ့ၣ်ၡူး​အသိး ပ​က​ဘၣ်​သူ လံာ်စီဆှံ အ​တၢ်​ဟံးစု​နဲၣ်ကျဲ​တဖၣ်​ ဒ်သိး​ပ​က​သ့ၣ်ညါ​နီၤဖး တၢ်​လၢ​အ​လီၤဘၣ်ယိၣ်​တဖၣ်​ဒီး ပ​ဟးဆှဲး​အီၤ​က​န့ၢ်​အဂီၢ်​လီၤ.—လူၤ. ၄:၄, ၈, ၁၂.

တၢ်​ဘၣ်ယိၣ်​အလီၢ်​လၢ ပ​က​ဘၣ်​ဟးဆှဲး​အီၤ​တဖၣ်–

• တၢ်​သူ​တၢ်​ရ့လိာ်သး​လၢ​အ့ထၢၣ်နဲး အကျိၤ​အကျဲ​တဖၣ်​ တလၢကွံာ်​အခၢး. ပ​မ့ၢ်​သူ တၢ်​ရ့လိာ်သး​လၢ​အ့ထၢၣ်နဲး​အကျိၤ​အ​ကျဲၤ​တဖၣ်​လၢ အ​နၣ်ရံၣ်​တဖၣ်​အ​နၣ်ရံၣ်​န့ၣ်​ ပ​တၢ်​ဆၢကတီၢ်​က​လၢာ်ကွံာ်​ကလီ ဒီး​တၢ်​ဆၢကတီၢ်​လၢ ပ​ကသူ​လၢ ယဟိဝၤ​ယွၤ​အဂီၢ်​န့ၣ်​ တအိၣ်​အါအါ​လၢၤဘၣ်.

  လံာ်စီဆှံ အ​တၢ်​ဟံးစု​နဲၣ်ကျဲ​တဖၣ်– အ့း. ၅:၁၅, ၁၆; ဖံလံး. ၁:၁၀

• တၢ်​ကွၢ်​တၢ်ဂီၤ​လၢ အ​တ​ကြၢး​တဘၣ်. ပ​မ့ၢ်​ကွၢ်​တၢ်ဂီၤ​လၢ အ​တဂ့ၤ​တဘၣ်​န့ၣ်​ လၢခံ​ပ​က​ကဲထီၣ်​ ပှၤလၢ​ညီနုၢ်​ကွၢ် တၢ်ဂီၤ​ဘ့ၣ်ဆ့ မ့တမ့ၢ် ပှၤလၢ​အ​သကဲာ်ပဝး​တဂ့ၤ​တဂၤ​သ့​လီၤ. ပ​မ့ၢ်​ဖး​ပှၤလၢ​အ​စူးကွံာ်​ညိကွံာ် တၢ်နာ်​တဖၣ်​ အ​လံာ်လဲၢ်​န့ၣ်​ ပ​တၢ်စူၢ်​တၢ်နာ် လီၤမၢ်​ကွံာ်​သ့​လီၤ.

  လံာ်စီဆှံ အ​တၢ်​ဟံးစု​နဲၣ်ကျဲ​တဖၣ်– မး. ၅:၂၈; ဖံလံး. ၄:၈

• တၢ်​ပာ်ဖျါ​ထီၣ်​တၢ်ထံၣ်​ မ့တမ့ၢ် ပာ်လီၤ​တၢ်ဂီၤ​လၢ တ​ကြၢး​တဘၣ်. ပ​သး​န့ၣ်​လီန့ၢ်​ပှၤ​သ့​လီၤ. လၢတၢ်န့ၣ်​အဃိ ဘၣ်​သ့ၣ်​သ့ၣ်​ ပှၤ​တဂၤ က​အဲၣ်ဒိး ပာ်ဖျါ​ထီၣ်​အ​တၢ်ထံၣ်​ မ့တမ့ၢ် ပာ်လီၤ​တၢ်ဂီၤ​လၢ တ​ကြၢး​တဘၣ်​လီၤ. ပ​မ့ၢ်​မၤ​ဒ်​န့ၣ်​န့ၣ်​ ပ​မံၤ​ဟးဂီၤ​သ့​ဒီး ကဲထီၣ်​တၢ်​လီၤဃံၢ်​အလီၢ်​သ့ဝဲ​လီၤ.

  လံာ်စီဆှံ အ​တၢ်​ဟံးစု​နဲၣ်ကျဲ​တဖၣ်– ရိ. ၁၄:၁၃; အ့း. ၄:၂၉

ကွၢ်​တၢ်ဂီၤမူ​လၢ​အ​ခိၣ်တီ​မ့ၢ် ဖဲ​န​သူ​အ့ထၢၣ်နဲး​အခါ ဟးဆှဲး​တၢ်​ဘၣ်ယိၣ်​အလီၢ်​တဖၣ် ဒီး​တဲသကိး​က့ၤ ပ​ဟးဆှဲး တၢ်လ့ပစီ​လၢ​လာ်​တဖၣ်​ က​သ့​ဒ်လဲၣ်​န့ၣ်​တက့ၢ်-