ဖဲ​လါအ့ဖြ့ၣ် ၁၁ သီ, မုၢ်ခံနံၤ​န့ၣ်​ ခရံာ်ဖိ​လၢ​အ​ပတုာ်​အ​တၢ်​ဟး စံၣ်တဲၤ​တဲလီၤ​တၢ်​အါဂၤ​န့ၣ်​ က​ဟဲထီၣ်​ တၢ်​သ့ၣ်နီၣ်ထီၣ်​က့ၤ ယ့ၣ်ၡူး​အ​တၢ်သံ​အမူး​လီၤ. အဝဲသ့ၣ်​စးထီၣ်​ဃ့ၢ်​လၢ သးသမူ​အ​တၢ်​ဃ့ၢ်ပြၢ​တၢ်​အ​ပူၤ ဘၣ်ဆၣ်​ ခီဖျိ​လၢ တၢ်ဂ့ၢ်​အါမံၤ​အဃိ အဝဲသ့ၣ်​ အိၣ်​ပတုာ်ဝဲ​လီၤ. တၢ်ဂ့ၢ်​လၢ​အ​မၤ​စၢ်လီၤ အဝဲသ့ၣ်​အဂံၢ်​အဘါ​န့ၣ်​ ဘၣ်​တၢ်​ပာ်ဖျါ​ထီၣ်​အီၤ​ဖဲ လံာ်​လၢ​အမ့ၢ် ဟဲက့ၤ​ဆူ ယဟိဝၤ​ယွၤ​အ​အိၣ် လီၤ. (ဧ့ၤ. ၁၂:၁) ဘၣ်ဆၣ်​ အဝဲသ့ၣ်​တဖၣ်​န့ၣ်​ အလုၢ်​ဒိၣ်​ပှ့ၤဒိၣ်​ဒံး လၢ​ယဟိဝၤ​ယွၤ​အဂီၢ်​လီၤ. မ့ၢ်​လၢ​ကစၢ်​ယွၤ ပှ့ၤက့ၤ​အဝဲသ့ၣ်​လၢ အ​ဖိခွါ​အသွံၣ်​အဃိ​လီၤ. (မၤတၢ်. ၂၀:၂၈, ခ့ခါစှီၤကျိာ်; ၁ ပ့း. ၁:၁၈, ၁၉) ဒ်သိး​အဝဲသ့ၣ်​ က​ဟဲက့ၤ​ဆူ တၢ်​အိၣ်ဖှိၣ်​ပူၤ​အဂီၢ် ပ​မၤစၢၤ​က​သ့​ဒ်လဲၣ်.

ဒ်​ပှၤကွၢ်သိ​လၢ​အဂ့ၤ​တဂၤ ဃု​က့ၤ​အသိ​လၢ အ​ဟးဖျိး​ကျဲ​တဖၣ်​အသိး တၢ်​အိၣ်ဖှိၣ်​သးပှၢ်​တဖၣ်​ ဃုဝဲ​ခရံာ်ဖိ​လၢ​အ​ပတုာ်​အ​တၢ်​ဟး စံၣ်တဲၤ​တဲလီၤ​တၢ်​တဖၣ်​ ဒီး​မၤစၢၤ​အဝဲသ့ၣ်​လီၤ. (လူၤ. ၁၅:၄-၇) တၢ်​အိၣ်ဖှိၣ်​သးပှၢ်​တဖၣ်​အံၤ ပာ်ဖျါ​ထီၣ်ဝဲ ယဟိဝၤ​ယွၤ အ​တၢ်အဲၣ်, တၢ်​ကဟုကယာ်​လီၤ. (ယံး. ၂၃:၃, ၄) တမ့ၢ်​ထဲ တၢ်​အိၣ်ဖှိၣ်​သးပှၢ်​တဖၣ်​ဘၣ်, ပဝဲ​ကိးဂၤ​ဒဲး ပ​ဟ့ၣ်ဂံၢ်​ဟ့ၣ်ဘါ ပှၤ​သ့ၣ်​တဖၣ်​အံၤ​သ့ဝဲ​လီၤ. ပ​မ့ၢ်​ဂုာ်ကျဲးစၢး ပာ်ဖျါ​ထီၣ်​ တၢ်​သးကညီၤ​ဒီး တၢ်​ဒိသူၣ်​ဒိသး​န့ၣ်​ ယဟိဝၤ​ယွၤ က​ဘၣ်သူၣ်​ဘၣ်သး​ဝဲ​ဒီး က​ကဲဘျုး​အါမး​လီၤ. (ကတိၤ. ၁၉:၁၇; မၤတၢ်. ၂၀:၃၅) အဃိ ဆိကမိၣ်​ကွၢ်​လၢ န​က​ဟ့ၣ်ဂံၢ်​ဟ့ၣ်ဘါ မတၤ​တဂၤ​လဲၣ်, မ့ၢ်ဝံၤ​ဒီး မၤ​အီၤ​လၢ အဆိ​အချ့​တက့ၢ်.

ကွၢ်​တၢ်ဂီၤမူ​လၢ​အမ့ၢ် ဟ့ၣ်ဂံၢ်​ဟ့ၣ်ဘါ ပှၤလၢ​အ​ပတုာ် အ​တၢ်​ဟး​စံၣ်တဲၤ​တဲလီၤ​တၢ် ဒီး​သံကွၢ်​တၢ်​သံကွၢ် လၢ​လာ်အံၤ​တက့ၢ်–

• ဖဲ အဲဘံၤ ထံၣ်ဝဲ ယဟိဝၤ​ပှၤအုၣ်​အသး​လၢ တ​သ့ၣ်ညါ​ဝဲ​တဂၤ​အခါ အဆိ​ကတၢၢ် အဝဲ​မၤဝဲ​ဒ်လဲၣ်.

• ပ​မ့ၢ်​ဆိကမိၣ်​လၢ ပ​က​မၤစၢၤ ပှၤ​ပတုာ်​ဟး အ​တၢ်​စံၣ်တဲၤ​တဲလီၤ​တၢ်​တဂၤ​န့ၣ်​ ဘၣ်​မနုၤ​အဃိ ပ​ကြၢး​သံကွၢ်​ဆိ တၢ်​အိၣ်ဖှိၣ်​သးပှၢ်​တဖၣ်​လဲၣ်.

• ဖဲ အဲဘံၤ တချုး​လဲၤ​ဟး​အိၣ်သကိး လီရၤ ခံ​ဘျီတဘျီ​အခါ အဝဲ​ကတဲာ်​ကတီၤ​ဆိ​ပာ်အသး​ဒ်လဲၣ်.

• ဖဲ အဲဘံၤ ဂုာ်ကျဲးစၢး​ဝဲ​ဒ်သိး က​ဟ့ၣ်ဂံၢ်​ဟ့ၣ်ဘါ​ဝဲ လီရၤ အခါ ပာ်ဖျါ​ထီၣ်ဝဲ တၢ်​သူၣ်စူၤ​သးစူၤ, တၢ်​ဝံသးစူၤ​ဒီး တၢ်အဲၣ်​တၢ်ကွံ​ဒ်လဲၣ်.

• ယ့ၣ်ၡူး​ဟ့ၣ်​တၢ်အဒိ​လၢ လူၤကၣ်​ ၁၅:၈-၁၀ အ​ပူၤ​န့ၣ်​ ပ​မၤလိ​န့ၢ် တၢ်မနုၤ​လဲၣ်.

• တၢ်​ဂုာ်ကျဲးစၢး မၤစၢၤ​သကိး လီရၤ န့ၣ်​အဘျုး​အိၣ်​ဒ်လဲၣ်.