ပ​က​ဘၣ်​ တူၢ်လိာ်မုာ် မတၤ​တဖၣ်​လဲၣ်. ပှၤ​ကိးဂၤ​ဒဲး​လၢ ဟဲထီၣ်​ပ​တၢ်​အိၣ်ဖှိၣ်, ပှၤ​အသီ​မ့ၢ်ဂ့ၤ, ပှၤလၢ​အ​ဟဲထီၣ်​ ပ​တၢ်​အိၣ်ဖှိၣ်​ ယံာ်တ့ၢ်​မး​လံ မ့ၢ်ဂ့ၤ​လီၤ. (ရိ. ၁၅:၇; ဧ့ၤ. ၁၃:၂) အဒိ, ဘၣ်​သ့ၣ်​သ့ၣ်​ ပ​ဒီပုၢ်ဝဲၢ်​လၢ​အ​ဟဲဟး​အိၣ်သကိး​လၢ ထံဂၤ​ကီၢ်ဂၤ မ့တမ့ၢ် ခရံာ်ဖိ​လၢ အ​ပတုာ် အ​တၢ်​ဟး​စံၣ်တဲၤ​တဲလီၤ​တၢ်​တဂၤ ဒီး​တ​ထီၣ်​တၢ်​အိၣ်ဖှိၣ်​ယံာ်​လံ​န့ၣ်​ ဟဲ​က့ၤထီၣ်ဝဲ တၢ်​အိၣ်ဖှိၣ်​ အဆိ​ကတၢၢ်​တဘျီ​လီၤ. ဆိကမိၣ်​ကွၢ်​လၢ န​အိၣ်​လၢ အဝဲသ့ၣ်​အလီၢ်​ဒီး ပှၤ​မ့ၢ်​တူၢ်လိာ်မုာ်​နၤ​န့ၣ်​ န​သး​က​မၤ​သး​ဒ်လဲၣ်. န​က​သးခု​ဒိၣ်မး တမ့ၢ်​ဘၣ်​ဧါ. (မး. ၇:၁၂) လၢတၢ်န့ၣ်​အဃိ န​လဲၤ​ဆူ ဘီမုၢ်ဘျီၣ်ဒိၣ်​ဆိ​ဆိ ဒီး​န​ဟံးစုကွၢ်မဲာ်​ပှၤဂၤ တချုး​လၢ တၢ်​အိၣ်ဖှိၣ်​စးထီၣ်​ ဒီး​တၢ်​အိၣ်ဖှိၣ်​ဝံၤ​အလီၢ်​ခံ က​သ့ဧါ. ပ​မ့ၢ်​မၤ​ဒ်အံၤ​န့ၣ်​ ပှၤအဂၤ​က​တူၢ်ဘၣ်​ တၢ်​ကဟုကယာ်, တၢ်အဲၣ်​တၢ်ကွံ ဒီး​က​ကဲထီၣ်​ တၢ်​စံးထီၣ်​ပတြၢၤ​လၢ ယဟိဝၤ​ယွၤ​အဂီၢ်​လီၤ. (မး. ၅:၁၆) ဘၣ်​သ့ၣ်​သ့ၣ်​ ပ​ဟး​တဲသကိး​တၢ်​ဒီး ပှၤ​ကိးဂၤ​ဒဲး​တချုး​ဘၣ်. သနာ်က့ ပဝဲ​ခဲလၢာ် ပ​မ့ၢ်​ဂုာ်ကျဲးစၢး တူၢ်လိာ်မုာ်​ပှၤဂၤ​တဖၣ်​န့ၣ်​ ပှၤ​ကိးဂၤ​ဒဲး ဟဲထီၣ်​တၢ်​အိၣ်ဖှိၣ်​ရိဖှိၣ်​ က​မုာ်ဝဲ​လီၤ. *

တၢ်​တူၢ်လိာ်​တမှံၤ​န့ၣ်​ ပ​တ​ကြၢး ပာ်ဖျါ​ထီၣ်​အီၤ ထဲ​လၢ​တၢ်​ဆၢကတီၢ်​လီၤဆီ ဒ်သိး​ဒီး တၢ်​သ့ၣ်နီၣ်ထီၣ်​က့ၤ ယ့ၣ်ၡူး​အ​တၢ်သံ​အမူး​အခါ​န့ၣ်​ဘၣ်. ပ​က​ဘၣ်​ပာ်ဖျါ​ထီၣ်​အီၤ ကိး​ဆၢကတီၢ်​ဒဲး​လီၤ. ဖဲ​ပှၤ​အသီ​လၢ ဟဲထီၣ်​တၢ်​အိၣ်ဖှိၣ်​ရိဖှိၣ်​တဖၣ်​ တူၢ်ဘၣ်​ဝဲ ခရံာ်ဖိ​အ​တၢ်အဲၣ်​အခါ အဝဲသ့ၣ်​ က​အဲၣ်ဒိး​သုးဘူး​အသး​ဆူ ယဟိဝၤ​ယွၤ​အ​အိၣ်ဒီး က​အဲၣ်ဒိး​ပၣ်ဃုာ်​လၢ ပှၤ​ဘူၣ်ထီၣ်​ဘါထီၣ်​တၢ် အမ့ၢ်​အတီ​အကျါ​လီၤ.—ယိၤ. ၁၃:၃၅.