Bambangi ya Yehova kesalaka ve feti ya mbutukulu samu bamezaba ti bafeti ya mutindu yina kesepedisaka ve Nzambi. Atako Biblia pekisa ve na puelele feti ya mbutukulu, yakesadisaka beto beto tadila mambu yankaka yina metadila feti yango mpe beto bakusa mutindu Nzambi ketadilaka yau. Beto tubila mambu 4 ya feti yango mpe mambu yina Biblia metuba samu na yau.

1.   Feti ya mbutukulu mekatukaka na bapayen. Mukanda mosi (Funk & Wagnalls Standard Dictionary of Folklore, Mythology, and Legend) metuba ti bavuandaka sadila muntu feti ya mbutukulu samu bavuandaka kanisa ti kilumbu yango “bampeve ya yimbi mpe bandoki lenda sala muntu yango yimbi” mpe bavuandaka tuba ti “kana bankundi kele vana mpe bamezodila yandi luzingu ya mbote yakesala ti yandi vuanda na lutanunu.” Mukanda yankaka (The Lore of Birthdays) metuba ti na ntangu ya ntama, kukanisa kilumbu yina muntu butukaka “vuandaka sadisa mingi mpenza samu na kuzaba na nzila ya bambuetete mambu yina kekumina muntu yango (horoscope), na lusadusu ya mayele ya kitombe ya astroloji.” Mukanda yango mebuela ti “bantu vuandaka kanisa ti babuji yina bakesadilaka na feti ya mbutukulu kevuandaka na kilendo mosi ya maji yina kepesaka bantu mambu yina bakele na yau nsatu.”

    Nzokande, Biblia mepekisa bisalu ya maji, kusamuna mambu yina kele ya kusuama, bisalu ya bampeve ya yimbi, to “mambu ya mutindu yina.” (Kolimbola Mibeko 18:14; Bagalatia 5:19-21) Kutu, mosi ya bamfunu yina Nzambi pesaka bantu ya Babiloni ya ntama kitumbu kele samu bavuandaka sala mambu ya astroloji, mayele yina bakesadilaka samu na kuzaba mambu ya kusuama. (Yisaya 47:11-15) Bambangi ya Yehova kesosaka ve kuzaba kisika bafeti nionso mekatukaka; kasi, kana makanisi ya Biblia kele puelele na diambu mosi, bakezitisaka yau.

2.   Baklisto ya siekle ya ntete vuandaka sala ve feti ya mbutukulu. Mukanda mosi (World Book Encyclopedia) metuba ti “bavuandaka mona ti kusadila muntu mosi feti ya mbutukulu vuandaka mumeseno ya bapayen.” Biblia memonisa ti bantumua mpe bantu yankaka yina Yesu longaka kele bifuani yina Baklisto nionso fueti landa.​—2 Batesaloniki 3:6.

3.   Nkinzi kaka mosi yina Baklisto mebakaka ntumu ya kusala kele lufua ya Yesu, kasi mbutukulu na yandi ve. (Luka 22:17-20) Yakele diambu ya kukamua ve samu Biblia metuba ti “kilumbu ya lufua meluta kilumbu ya kubutuka.” (Mosakoli 7:1) Tii na nsuka ya luzingu na yandi awa na ntoto, Yesu kukisadilaka nkumbu ya mbote na meso ya Nzambi, na yau kilumbu ya lufua na yandi vuandaka na mfunu mingi kuluta kilumbu ya kubutuka na yandi.​—Baebre 1:4.

4.   Biblia metubila ata kisika mosi ve yina kisadi mosi ya Nzambi salaka feti ya mbutukulu. Yakele ve samu Biblia zimbakanaka, samu yametubila bafeti zole ya mbutukulu yina bantu yina vuandaka sadila Yehova ve salaka. Nzokande, Biblia metubila bafeti yango na mutindu mosi ya mbote ve.​—Ebandeli 40:20-22; Marko 6:21-29.

 Mutindu mosi na bibuti nionso, Bambangi ya Yehova kemonisinaka bana na bau nzola na mvula ya mvimba, bakepesaka bau bakado, bakesekanaka na bau, mpe bakesanganaka kintuadi na bankundi bau. Bakesosaka kulanda kifuani ya kukoka ya Nzambi, yina kepesaka bana na yandi bima ya mbote. (Matai 7:11) Bana ya Bambangi ya Yehova kemonaka ve ti bakekonduaka kima mosi ya mfunu mutindu bakesalaka ve feti ya mbutukulu. Tala mambu bametuba:

•   “Kiese kevuandaka mingi kana bamekabila nge kima na ntangu yina nge vuandaka vingila yau ve.”​—Tammy, yina kele na bamvula 12.

•   “Atako bibuti na munu kekabilaka munu ve bima na kilumbu ya mbutukulu na munu, kasi bakesumbilaka munu bima na maluaku yankaka. Munu kezolaka plina mpe yakesepedisaka munu mingi.”​—Gregory, yina kele na bamvula 11.

•   “Kulutisa mua miniti 10 kintuadi, kudia mua bagato, kuyimbila mua miyimbu, yau nde feti? Beno kuiza na yinzo na beto samu beno mona mutindu feti kevuandaka!”​—Eric, yina kele na bamvula 6.