Mutindu yavuandaka na kimvuka ya Buklisto na siekle ya ntete, Bambangi ya Yehova kevuandaka na bamfumu ve na kati na bau. Bambangi ya Yehova nionso yina mebakaka mbotama kele bantu yina mendimama na Nzambi mpe bakekukipesaka na kisalu ya kusamuna nsangu ya mbote mpe ya kulonga bantu. Kimvuka mosimosi ya Bambangi ya Yehova kevuandaka na bantu kana 100. Babakala yina kele ya kuyela na kimpeve kesalaka lokola “bankulutu,” to baketuadisaka mambu. (Tito 1:5) Kasi, bakefutamaka ve samu na bisalu yango.