Bantu yina beto ketangaka lokola Bambangi ya Yehova kele kaka bantu yina kesamunaka nsangu ya Kimfumu ya Nzambi konso ngonda. (Matai 24:14) Yamesangisa bantu yina mebakaka mbotama, mpe bantu yina mebakaka mbotama ve, kasi bamekokisaka mambu yina kelombamaka samu na kukuenda na kisalu ya kusamuna.

 Ve. Kupesa makabu kele na mfunu ve samu muntu kuma Mbangi ya Yehova to samu bapesa yandi kiyekua mosi na nkubukulu na beto. (Misala 8:18-20) Kutu, makabu mingi kepesamaka kondua ti muntu yina mepesa yau zabana. Konso Mbangi ya Yehova kepesaka ntangu, ngolo, mpe bima na yandi na kisalu na beto na yinza ya mvimba na kutadila nsatu mpe makoki na yandi.​—2 Bakorinti 9:7.

 Konso ngonda, Bambangi ya Yehova kepesaka lapolo ya kisalu ya kusamuna na kimvuka yina bakele. Bakepesaka yau na luzolo na bau mosi.

 Kimvuka kebongisaka lapolo yango mpe ketindaka yau na biro ya filiale. Na manima, filiale ketindaka balapolo yango nionso ya buala to ya terituare na bau na biro ya nene.

 Na nsuka ya konso mvula ya kisalu, a ntalu ya Bambangi ya Yehova ya konso buala kezabanaka. Bakesangisaka bantalu yango nionso samu na kuzaba ntalu ya Bambangi ya Yehova na yinza ya mvimba. Lapolo ya konso buala mpe mambu yina bampangi kutanaka na yau na kisalu ya kusamuna kebimaka na kitini “Na ntoto ya mvimba” na site internet na beto jw.org. Balapolo yango kekindisaka beto, mutindu kaka balapolo ya mutindu yayi kindisaka Baklisto ya siekle ya ntete.​—Misala 2:41; 4:4; 15:3.

 Atako beto ketangaka bantu ya mutindu yina ve na ntalu ya Bambangi ya Yehova, beto keyambaka bau na bimvuka na beto. Mingi kati na bau kekuizaka na Mbambukulu ya lufua ya Klisto, na yau beto kezabaka ntalu na bau na sikisiki nionso, samu ntalu yango kesuasanaka na ntalu ya Bambangi ya Yehova. Na 2023, bantu 20,461,767 kutakanaka na Mbambukulu ya lufua ya Klisto.

 Bantu mingi yina kekuizaka ve na balukutakanu na beto kebakaka mambote na programe na beto ya ndongokolo ya Biblia ya ofele na bayinzo na bau. Na mvula 2023, beto longukaka Biblia na bantu 7,281,212 konso ngonda. Bandongokolo yankaka salamaka na bantu mingi na mbala mosi.

 Mbala mingi, babiro ya guvernema keyuvusaka bantu kana bakele bantu ya yinki dibundu samu na kuzaba ntalu ntangu bakena sala recensement. Na kifuani, Biro mosi ya recensement na Etats-Unis metuba ti baankete yina basalaka vuandaka samu na “kusosa kuzaba kana bantu yina bayuvusaka vuandaka bantu ya dibundu mosi plina,” mpe bamebuela na kutubaka ti ntalu pesamaka “na kulanda makanisi ya bantu kasi ve mutindu mambu kele mpenza.” Nzokande, samu na kutanga muntu Mbangi ya Yehova yandi fueti samunaka mpe yandi fueti pesaka lapolo na yandi, kasi yandi yandi fueti sukaka ve na kukibokidila Mbangi ya Yehova.