Ee. Beto kele Baklisto samu na bamfunu yayi melanda:

•   Beto kesalaka ngolo samu na kulanda mbotembote malongi mpe bikadulu ya Yesu Klisto.—1 Petro 2:21.

•   Beto kendimaka ti samu na kuvuka, yakelombaka kundimina Yesu samu “luvuluzu kekatukaka na muntu yankaka ve, samu nkumbu yankaka kele ve na yinsi ya dizulu, yina mepesama na kati ya bantu, yina beto fueti vuka na nzila na yau.”—Misala 4:12.

•   Bantu yina kekumaka Bambangi ya Yehova kebakaka mbotama na nkumbu ya Yesu.—Matai 28:18, 19.

•   Beto kesambilaka Nzambi na nkumbu ya Yesu.—Yoane 15:16.

•   Beto kendimaka ti Yesu kele Mfumu, to muntu yina meponamaka samu na kuvuanda na kimfumu na zulu ya konso muntu.—1 Bakorinti 11:3.

 Kasi, na mambu mingi, beto kevuandaka mpenza ya kusuasana na mabundu yankaka yina bakebokilaka mabundu ya Buklisto. Na kifuani, beto kendimaka ti Biblia kelongaka ti Yesu kele Muana ya Nzambi; kasi yandi kele ve nzambi mosi na kati ya banzambi tatu na kati ya butatu (Trinité). (Marko 12:29) Beto kendimaka ti muela kekufuaka; ata na kisika mosi ve Biblia memonisa ti Nzambi keniokolaka bantu na bilungi ya tiya mvula na mvula; beto ketubaka mpe ve ti bantu yina ketuadisaka mabundu fueti vuanda na batitre mosi ya lokumu yina kena kumonisa ti bameluta bantu yankaka.—Mosakoli 9:5; Ezekiele 18:4; Matai 23:8-10.