Beto Bambangi ya Yehova, beto kesalaka ngolo samu na kulanda malongi ya Buklisto yina Yesu longaka mpe yina bantumua na yandi sadilaka. Disolo yayi metubila na nkufi bindimeli na beto ya ngudi.

1.   Nzambi. Beto kesambilaka Nzambi ya kedika kaka mosi yina kele Nkua-Ngolo-Nionso, yina kele Mvangi, mpe yina nkumbu na yandi kele Yehova. (Nzembo 83:18; Emoniseli 4:11) Yandi kele Nzambi ya Abrahami, Mose, mpe Yesu.​—Kobima 3:6; 32:11; Yoane 20:17.

2.   Biblia. Beto kendimaka ti Biblia kele nsangu yina sonamaka na lutuadusu ya mpeve ya Nzambi, mpe nsangu yango kele samu na bantu. (Yoane 17:17; 2 Timote 3:16) Bindimeli na beto mesimbama na mikanda 66 nionso ya Biblia, yina mesangisa “Testama ya ntama” mpe “Testama ya yimpa.” Jason D. BeDuhn, yina kele profesere sasilaka diambu yango mbote ntangu yandi sonikaka ti Bambangi ya Yehova kebakaka “malongi mpe mambu yina bakesalaka na Biblia, bakesosaka malongi ya Biblia kondua kusosa kukanisa ntete kunungisa makanisi na bau mosi.” a

    Atako beto kendiminaka Biblia ya mvimba, beto kele ve bantu yina ketubaka ti Nzambi salaka bima nionso na bilumbu 6 ya bawola 24. Beto kendimaka ti bitini yankaka ya Biblia mesonamaka na bampova ya kifuani mpe beto fueti bakila yau ve na mutindu ya kedika.​—Emoniseli 1:1.

3.   Yesu. Beto kelandaka malongi mpe kifuani ya Yesu Klisto, mpe beto kezitisaka yandi lokola Mvuluzi na beto mpe lokola Muana ya Nzambi. (Matai 20:28; Misala 5:31) Na yau, beto kele Baklisto. (Misala 11:26) Nzokande, beto kelongukaka na Biblia ti Yesu kele ve Nzambi Nkua-Ngolo-Nionso mpe dilongi ya butatu (Trinité) simbama ve na Masonukua.​—Yoane 14:28.

4.   Kimfumu ya Nzambi. Yakele mpenza guvernema yina kele na dizulu, kasi yakele ve kima mosi yina kele na kati ya bantima ya Baklisto. Kimfumu yango kebaka kisika ya baguvernema ya bantu mpe yakekokisa lukanu ya Nzambi samu na ntoto. (Danyele 2:44; Matai 6:9, 10) Yakekokisa mambu yango ntama mingi ve, samu bambikudulu ya Biblia kena kumonisa ti beto kena kuzinga na “bilumbu ya nsuka.”​—2 Timote 3:1-5; Matai 24:3-14.

    Yesu kele Ntinu ya Kimfumu ya Nzambi na dizulu. Yandi bandaka kuyala na mvula 1914.​—Emoniseli 11:15.

5.   Luvuluzu. Beto kele na dikoki ya kukatuka na kinanga ya disumu mpe ya lufua na nzila ya nkudulu ya nkayilu ya Yesu. (Matai 20:28; Misala 4:12) Samu na kubakila nkayilu yango mambote, bantu fueti vuanda kaka ve na kiminu na Yesu kasi bafueti soba diaka bikadulu na luzingu na bau mpe kubaka mbotama. (Matai 28:19, 20; Yoane 3:16; Misala 3:19, 20) Ndiatulu ya muntu nde kemonisaka kana kiminu na yandi kele ya moyo. (Yakobo 2:24, 26) Kasi, beto kebakaka ve luvuluzu na bangolo na beto na mosi—beto kebakaka yau na nzila ya “ntima kiadi ya Nzambi.”​—Bagalatia 2:16, 21.

6.   Dizulu. Yehova Nzambi, Yesu Klisto, mpe bambasi ya kukuikama kevuandaka na dizulu. b (Nzembo 103:19-21; Misala 7:55) Kaka ntalu fioti ya bantu​—144 000​—nde kefutumuka samu na kuzinga na dizulu mpe kuyala kintuadi na Yesu na Kimfumu ya Nzambi.​—Danyele 7:27; 2 Timote 2:12; Emoniseli 5:9, 10; 14:1, 3.

7.   Ntoto. Nzambi salaka ntoto samu yavuanda kisika yina bantu kezinga samu na mvimbamvimba. (Nzembo 104:5; 115:16; Mosakoli 1:4) Nzambi kesakumuna bantu yina kezitisaka yandi na kupesaka bau mavimpi ya kukoka mpe luzingu ya mvula na mvula na paradiso na ntoto.​—Nzembo 37:11, 34.

8.   Mambu ya yimbi mpe bampasi. Yabandaka ntangu mosi ya bambasi ya Nzambi tombokilaka Nzambi. (Yoane 8:44) Na manima ya butomboki ya mbasi yango, bakumaka kubokidila yandi “Satana” mpe “Diabulu.” Yandi vunaka bakala ya ntete mpe nketo ya ntete samu balanda yandi, mpe yanataka mambu mingi ya mpasi samu na bana ya bankuelani yango ya ntete. (Ebandeli 3:1-6; Baroma 5:12) Samu na kumanisa ntembe yina Satana bimisaka, Nzambi mebika nzila na mambu ya yimbi mpe bampasi, kasi Yandi kebikila yau ve nzila samu na mvimbamvimba.

9.   Lufua. Bantu yina mekufua ketatamanaka ve kuzinga. (Nzembo 146:4; Mosakoli 9:5, 10) Bakeniokuamaka mpe ve na bilungi ya tiya.

    Na nzila ya mfutumukunu, Nzambi kefutumuna bamiliare ya bantu yina mekufuaka. (Misala 24:15) Kasi, bantu yina kemanga kulanda banzila ya Nzambi na manima ya kufutumuka bakebebisama samu na mvimbamvimba, kondua kivuvu ya kufutumuka diaka.​—Emoniseli 20:14, 15.

10.   Dibuta. Beto kezitisaka nsiku yina Nzambi pesaka na ebandeli samu na dikuela ti bakala mosi fueti kuela nketo mosi; mpe kaka ekobo nde lenda sala ti bankuelani kufua dikuela na bau. (Matai 19:4-9) Beto kendimisamaka ti malongi yango ya Biblia kesadisaka mabuta samu yavuanda na kiese.​—Baefese 5:22–6:1.

11.   Nsambudulu na beto. Beto kesambilaka ve dikuluzu to kidimbu mosi mpe bafoto yankaka. (Kolimbola Mibeko 4:15-19; 1 Yoane 5:21) Mambu ya mfunu yina mesimba nsambudulu na beto kele:

    •   Kusambila Nzambi.​—Bafilipi 4:6.

    •   Kutanga mpe kulonguka Biblia.​—Nzembo 1:1-3.

    •   Kuyindula na mpinda na zulu ya mambu yina beto metanga na Biblia.​—Nzembo 77:12.

    •   Kusangana kintuadi samu na kusambila, kulonguka Biblia, kuyimbila, kutubila kiminu na beto, mpe kukindisa bampangi na beto Baklisto mpe bantu yankaka.​—Bakolose 3:16; Baebre 10:23-25.

    •   Kusamuna “nsangu ya mbote ya Kimfumu ya Nzambi.”​—Matai 24:14.

    •   Kusadisa bantu yina kena kuniokuama.​—Yakobo 2:14-17.

    •   Kutunga mpe kutanina Bayinzo na beto ya Kimfumu mpe bayinzo yankaka yina beto kesadilaka samu na kulonga bantu Biblia na yinza ya mvimba.​—Nzembo 127:1.

    •   Kusadisa bantu yina mekutana na bisumbula yina kebimaka yau mosi.​—Misala 11:27-30.

12.   Nkubukulu na beto. Beto mebongisama na bimvuka, mpe mua grupe ya bankulutu nde ketuadisaka konso kimvuka. Kasi, bankulutu yango kevuandaka ve lokola bamfumu ya dibundu mpe bakefutaka bau ve mbongo. (Matai 10:8; 23:8) Beto kelombaka ve dime mpe beto kelombaka ve minkayilu na balukutakanu na beto. (2 Bakorinti 9:7) Bisalu na beto nionso kesalamaka na nzila ya makabu yina bantu kepesaka kondua kutubila bankumbu na bau.

     Kimvuka ya Ntuadisi, kele mua grupe ya Baklisto yina kele ya kuyela na kimpeve yina kesalaka na biro na beto ya nene samu na kutuadisa Bambangi ya Yehova na yinza ya mvimba.​—Matai 24:45.

13.   Bumosi na beto. Beto kevuandaka na bumosi na bindimeli na beto na yinza ya mvimba. (1 Bakorinti 1:10) Beto kesalaka diaka ngolo samu beto vuanda ve na bukabuani na mambu ya dikanda, ya nkanda, to ya kimvuama mpe kimputu. (Misala 10:34, 35; Yakobo 2:4) Kasi, bumosi na beto kepekisaka ve muntu na muntu na kubaka banzengolo na yandi. Konso Mbangi ya Yehova kebakaka banzengolo na nguizani na kikansasa na yandi yina melongua na Biblia.​—Baroma 14:1-4; Baebre 5:14.

14.   Ndiatulu na beto. Beto kesalaka ngolo samu na kumonisa nzola ya kedika na bisalu na beto nionso. (Yoane 13:34, 35) Beto kemangaka kusala mambu yina kesepedisaka ve Nzambi, na kifuani kusadila menga na mutindu ya yimbi to kuvutula muntu menga. (Misala 15:28, 29; Bagalatia 5:19-21) Beto kele bantu ya kiyenge mpe beto kekotaka ve na bamvita. (Matai 5:9; Yisaya 2:4) Beto kezitisaka bamfumu ya Leta ya buala yina beto kevuandaka mpe beto kezitisaka bansiku ya Leta kana yakena kutinda beto ve na kubuka bansiku ya Nzambi.​—Matai 22:21; Misala 5:29.

15.   Nguizani na beto na bantu yankaka. Yesu tubaka ti: “Nge fueti zola finangani na nge lokola nge mosi.” Yandi tubaka diaka ti Baklisto “kele bantu ya yinza ve.” (Matai 22:39; Yoane 17:16) Na yau beto kesosaka ‘kusadila bantu nionso mambu yina kele mbote.’ Atako plina, beto kekotaka ve na mambu ya politiki mpe beto kesanganaka ve na mabundu yankaka. (Bagalatia 6:10; 2 Bakorinti 6:14) Kasi, beto kezitisaka banzengolo ya bantu yankaka na mambu yango.​—Baroma 14:12.

 Kana nge kele na biuvu yankaka na diambu metadila bindimeli ya Bambangi ya Yehova, nge lenda tanga mambu yankaka yina metadila beto na site na beto, nge lenda kuenda sala viziti na mosi ya babiro na beto, kukuenda na mosi ya Bayinzo ya Kimfumu na beto yina kele pene na kisika nge kevuandaka, to kusolola na Mbangi ya Yehova mosi yina kele na kisika nge kevuandaka.