Na Biblia, mpova ya Greki yina bakebangulaka mbala yankaka na “eglize” zola monisa grupe ya bantu yina mesangana samu na kusambila, kasi yazola monisa ve yinzo yina bantu kesanganinaka.

 Kanisa na kifuani yayi: Ntangu ntumua Paulo sonikinaka Baklisto ya Roma, yandi pesaka bambote na Akila mpe na nketo na yandi Prisile, mpe yandi buelaka ti: “Beno pesa mbote na eglize yina kesanganaka na yinzo na bau.” (Baroma 16:5, Contemporary English Version) Paulo zolaka tuba ve yandi vuandaka pesa bambote na yinzo yina bavuandaka sadila balukutakanu. Kutu, yandi vuandaka pesa nde bambote na yandi na bantu​—kimvuka yina vuandaka sangana na yinzo yango. a

 Na yau, na kisika ya kubokidila bisika na beto ya nsambudulu Yinzo ya Nzambi to eglize, beto kebokidilaka yau “Yinzo ya Kimfumu.”

 Nkumbu yango mebonga mpenza samu na bamfunu yayi melanda:

•   Kisika yina beto kekutakanaka kevuandaka yinzo.

•   Beto kekutakanaka samu na kusambila Yehova, Nzambi yina Biblia metubila, mpe beto kepesaka kimbangi samu na mambu yina metadila yandi.​—Nzembo 83:18; Yisaya 43:12.

•   Beto kekutakanaka diaka samu na kutubila Kimfumu ya Nzambi, Kimfumu yina mbala mingi Yesu vuandaka tubila.​—Matai 6:9, 10; 24:14; Luka 4:43.

 Beto melomba nge nge kuenda tala Yinzo ya Kimfumu yina kele penepene ya kisika yina nge kevuandaka samu nge mona nge mosi mutindu Bambangi ya Yehova kesalaka balukutakanu na bau.