Ve. Bambangi ya Yehova kele Baklisto, kasi beto kekukimonaka ve ti beto kele baprotestan. Samu na yinki?

 Dibundu ya Protestan kele “dibundu yina meteleminaka dibundu ya Katoliki.” Atako beto Bambangi ya Yehova beto kendimaka ve malongi ya dibundu ya Katoliki, beto kekukimonaka ve ti beto kele Baprotestan samu na bamfunu yayi melanda:

1.   Malongi mingi ya baprotestan wizana ve na mambu yina Biblia kelongaka. Na kifuani, Biblia kelongaka ti “Nzambi kele kaka mosi,” kasi butatu ve. (1 Timote 2:5; Yoane 14:28) Mpe yametuba diaka puelele ti kitumbu yina Nzambi kepesaka bantu kele lufua ya mvimbamvimba, kasi bilungi ya tiya ve.​—Nzembo 37:9; 2 Batesaloniki 1:9.

2.   Beto keteleminaka ve to beto kesosaka ve kubongisa dibundu ya Katoliki to mabundu yankaka. Kutu, beto kesamunaka kaka nsangu ya mbote ya Kimfumu ya Nzambi, mpe beto kesosaka kusadisa bantu bandimina nsangu yango. (Matai 24:14; 28:19, 20) Nsatu na beto kevuandaka ve ya kubongisa mabundu yankaka; beto kesosaka nde kulonga kedika yina metadila Nzambi mpe Mpova na yandi Biblia na bantu yina kele na ntima yina mebonga.​—Bakolose 1:9, 10; 2 Timote 2:24, 25.