Ve, Bambangi ya Yehova kele ve binzambinzambi. Kutu, beto kele Baklisto, beto kesalaka ngolo samu na kulanda kifuani yina Yesu Klisto bikaka mpe beto kesadilaka malongi na yandi na luzingu na beto.

 Konso muntu kesasilaka mpova “binzambinzambi” na mutindu na yandi. Kasi, totala bansasulu zole yina bantu kepesaka samu na mpova yango mpe beto kemona samu na yinki bansasulu yango tadila beto ve.

•   Bantu yankaka kekanisaka ti binzambinzambi kele dibundu mosi yina mebima bosi to yina kemangaka kulanda mutindu mabundu yankaka kesalaka. Bambangi ya Yehova mebimisaka ve dibundu ya yimpa. Kasi, nsambudulu na beto kelandaka yina Baklisto ya ntete vuandaka sala, yina kifuani mpe malongi na bau mesonama na Biblia. (2 Timote 3:16, 17) Beto kendimaka ti mambu nionso yina metadila nsambudulu fueti simbama na Biblia ya nlongo, kasi ve na kulandaka mutindu dibundu yankaka kesalaka.

•   Bantu yankaka kekanisaka ti binzambinzambi kele dibundu mosi ya yimbi yina ntuadisi na yau kele nde muntu. Bambangi ya Yehova kemonaka ve muntu mosi lokola mfumu na bau. Kasi, beto kezitisaka mambu yina Yesu tubilaka banlonguki na yandi ntangu yandi tubaka: “Ntuadisi na beno kele kaka mosi, Klisto.”​—Matai 23:10.

 Beto Bambangi ya Yehova beto kele ve dibundu yina kesalaka bantu yimbi, kasi dibundu na beto kenatinaka beto mpe bantu yankaka mambote. Na kifuani, kisalu na beto ya kusamuna mesadisa bantu mingi samu bakatuka na kinanga, na kifuani ya kunua nsunga to ya malavu. Katula yau, na yinza ya mvimba beto kesalaka bakalasi samu na kusadisa mafunda ya bantu balonguka kutanga mpe kusonika. Mpe beto kepesaka na nsualu lusadusu na bantu yina mekutana na kivonza. Beto kesalaka ngolo samu bantu sepela na bikadulu na beto, mutindu kaka Yesu lombaka banlonguki na yandi basala.​—Matai 5:13-16.