Ve. Nkubukulu na beto kesalaka ve liste ya bafilme, ya mikanda, to ya miyimbu yina konso muntu kati na beto fueti manga. Samu na yinki?

Biblia kekindisaka ti konso muntu fueti sadila “makoki [na yandi] ya kusuasikisa” samu na kubakusa mambu yina kele mbote mpe mambu yina kele yimbi.—Baebre 5:14.

Biblia mepesa bansikudukusu ya mfunu yina Muklisto lenda sadila ntangu yandi kena kupona bansaka ya kulutisila ntangu. a Na mambu nionso ya luzingu na beto, lukanu na beto kevuandaka ya “kutatamana kusosa kuzaba mbote kima yina lendaka ndimama na Mfumu.”​—Baefese 5:10.

Biblia kelongaka ti bamfumu ya mabuta kele na mua kimfumu na mabuta na bau, na yau balenda pekisa bantu ya mabuta na bau bandutusulu ya ntangu yankaka. (1 Bakorinti 11:3; Baefese 6:1-4) Nzokande, katula na dibuta, muntu mosi ve kele na yinsua ya kubaka nzengolo to kutuba ti bafilme, miyimbu, yayi to yina mebonga to yabonga ve samu na Bambangi ya Yehova, to artiste yayi to yina bonga to bonga ve samu na Bambangi ya Yehova.—Bagalatia 6:5.