Ve, Bambangi ya Yehova kepesaka ve dime; mbongo beto kesadilaka bisalu na beto kekatukaka na makabu yina bantu kepesaka na luzolo na bau mosi. Dime kele yinki, mpe samu na yinki Bambangi ya Yehova kepesaka ve dime?

 Nsiku ya kupesa dime, to mosi ya bandambu kumi ya bima yina muntu kele na yau vuandaka na kati ya Bansiku ya Mose yina Nzambi pesaka na dikanda ya Yisaele ya ntama. Kasi, Biblia memonisa puelele ti Bansiku yango​—na kati na yau “ntumu ya kukongola . . . mosi ya bandambu kumi”​—tala ve Baklisto.​—Baebre 7:5, 18; Bakolose 2:13, 14.

 Na kisika ya kupesa dime to minkayilu samu yamelombama plina, Bambangi ya Yehova kelandaka kifuani ya Baklisto ya ntete mpe bakepesaka maboko na kisalu ya kusamuna na mitindu zole: na kusamunaka mpe kulonga kondua ti bafuta bau mpe na kupesaka makabu na luzolo ya mbote.

 Na mutindu yango beto kelandaka ntumu yina Biblia mepesa Baklisto: “Muntu na muntu sala mutindu yandi mekana na ntima na yandi, na kuvunguta ve to na kutindikama ve, samu Nzambi kezolaka muntu yina kepesaka na kiese.”​—2 Bakorinto 9:7.