Makanisi ya bantu: Bambangi ya Yehova kendimaka ve mayele ya minganga mpe bakekuendaka ve na opital.

 Diambu ya kedika: Beto kesosaka bilongo ya mbote samu na beto mosi mpe samu na bantu ya dibuta na beto. Kana beto mebela, beto kekuendaka na mingaga yina mezaba mbote kisalu mpe yina kesalaka operasion kondua kuvutula menga. Beto kesepelaka mingi na mutindu minganga mezaba kisalu na bau. Kutu, mayele yina minganga kesadilaka bubu samu na kupesa Bambangi ya Yehova tretema kondua kuvutula menga, bamekuma kusadila yau samu na kupesa bantu yankaka tretema. Na babuala mingi, konso muntu yina kele maladi lenda pona kumanga bavutula yandi menga samu yandi baka ve bamaladi yina bantu kebakaka na nzila ya menga, kuvutula muntu menga yina nzutu na yandi memanga, mpe banzimbala yina minganga lenda sala.

Makanisi ya bantu: Bambangi ya Yehova ketubaka ti kiminu nde kevukisa muntu kana yandi kena kubela.

 Diambu ya kedika: Beto kesalaka ve bimangu samu na kuvukisa muntu.

Makanisi ya bantu: Kubaka lusadusu ya minganga kondu ti bavutula menga kevuandaka ntalu mingi.

 Diambu ya kedika: Bilongo ya minganga yina kepekisaka bavutula menga kele na mbongo mingi ve. a

Makanisi ya bantu: Mingi ya Bambangi ya Yehova, ata mpe bana, kena kufua mvula na mvula samu bakemangaka bavutula bau menga.

 Diambu ya kedika: Diambu yango kele mpenza ya kedika ve. Minganga mingi yina kesalaka baoperasion ya nene, kesalaka mbala mingi kisalu ya ngolo kondua kuvutula menga, na kifuani operasion ya ntima, operasion ya bivisi, mpe kutula muntu kitini yankaka na nzutu. b Bantu ya maladi, ata mpe bana, yina bakevutulaka bau ve menga, kevuanda mpenza, kuluta bantu yina kendima bavula bau menga. c Yavuanda yinki mutindu, muntu mosi ve lenda tuba mpenza ti muntu ya maladi kekufua samu yandi memanga bavutula yandi menga to yandi kevuanda na luzingu samu yandi mendima yau.

 Yakele diambu metadila mambu yina beto kendiminaka, kasi yametadila ve mayele ya munganga. Yavuanda na Luwawanu ya ntama to na Luwawanu ya Yimpa, Biblia melomba beto puelele ti beto manga menga. (Ebandeli 9:4; Balevi 17:10; Kolimbola Mibeko 12:23; Misala 15:28, 29) Diaka, na meso ya Nzambi menga kemonisaka luzingu. (Balevi 17:14) Na yau, beto kemangaka menga samu na kuzitisa Nzambi, kasi diaka samu na kupesa yandi luzitu lokola yandi kele Mvangi ya luzingu na beto.

 Na ntangu mosi, minganga mingi vuandaka mona ti kusadila mayele yankaka na kisika ya kuvutula menga kele kulutisa ndilu to kutu kukivonda, kasi mambu mesoba na bamvula yayi mekatuka luta. Na kifuani, na 2004, disolo mosi yina bimaka na zulunalo ya mambu metadila kisalu ya minganga tubaka ti “mayele mingi yina bakena kusadila bubu yayi samu na kusadisa Bambangi ya Yehova kekuma samu na bantu nionso na bamvula kena kuiza.” d Disolo mosi yina bimaka na zulunalo mosi (Heart, Lung and Circulation) na 2010 tubaka ti “‘kusala operasion kondua kuvutula menga’ fueti suka kaka ve na Bambangi ya Yehova, beto fueti sala mutindu yina na baoperasion nionso beto kesalaka.”

 Bubu yayi, mafunda ya minganga na yinza ya mvimba kesadilaka mayele ya kutanina menga samu basala baoperasion ya nene kondua kuvutula menga. Ata na babuala ya kimputu, minganga kena kusadila mayele ya mutindu yina na kisika ya kuvutula menga, mpe bantu mingi yina kele ve Bambangi ya Yehova kena kulomba yau. Minganga lenda sala mbote baoperasiona ya nene kondua kuvutula menga