Ee. Bambangi ya Yehova nionso kele bansamuni, to baministre​—na kati na bau yakele na bamilion ya banketo. Mutindu Biblia samunaka yau, ‘banketo mingi kepanza nsangu’ ya mbote.​—Nkunga 68:11, Bible na Kituba.

 Banketo yina kele Bambangi ya Yehova kelandaka kifuani ya banketo yina Biblia metubila. (Masese 31:10-31) Atako bakele ve na kiyekua ya kutuadisa kimvuka, bakekukipesaka na kisalu ya kusamuna. Bakelongaka diaka bana na bau bansikudukusu ya Biblia. (Masese 1:8) Na nzila ya bampova mpe mambu yina bakesalaka, banketo yina kele Bambangi ya Yehova kesalaka ngolo samu na kupesa kifuani ya mbote.​—Tito 2:3-5.