Beto kemonaka ti bantu mingi yina kele deja na mabundu bau kesepelaka kusosola masolo ya Biblia. Kasi, lokola beto mezaba ti muntu nionso kele na kimpuanza ya kundima mambu yina yandi zola, beto ketindaka ve bantu na kingolo bandima malongi na beto.

 Ntangu beto ketubilaka bantu mambu ya Nzambi, beto kesalaka nionso samu beto monisa “kimpombo” mpe “luzitu ya mpinda” na bantu yankaka, mutindu Biblia kelongaka beto. (1 Petro 3:15) Beto kezabaka ti muntu nionso ve kendima nsangu yina beto kesamunaka. (Matai 10:14) Kasi, kana beto solola ntete ve na muntu, beto lenda zaba ve kana yandi kendima nsangu na beto to yandi kendima yau ve. Beto kezabaka diaka ti mambu ya luzingu ya muntu lenda soba.

 Na kifuani, muntu lenda vuanda na mambu mingi ya kusala ntangu beto mekuenda tala yandi kilumbu mosi kasi yandi lenda sepela kusolola na beto kilumbu yankaka. Mpe bantu yankaka lenda kutana na mitungisi to na mambu ya mpasi yina lenda soba luzingu na bau; yau lenda tinda bau bakuma kusepela na nsangu ya Biblia. Yau yina, beto kevutukilaka bantu mbala mingi.