Mbala mingi bafeti ya makuela ya Bambangi ya Yehova kevuandaka ve na mambu ngolongolo mpe yakevuanda ntangu mosi ya lokumu. Yakevuandaka na diskur mosi ya nkufi yina mesimbama na Biblia. Na manima ya diskur yango, mbala yankaka beto kesalaka mua nkinzi mosi ya fioti, to feti mosi ya dikuela samu na kudia mpe kunua. a Na ebandeli ya kisalu na yandi ya kusamuna, Yesu diaka kuendaka na feti ya mutindu yina na mbanza ya Kana.—Yoane 2:1-11.

•  Yinki mutindu mambu kesalamaka na nkinzi yango?

•  Wapi kesalaminaka bafeti ya makuela ya Bambangi ya Yehova?

•  Banani lenda kuenda na bafeti yango?

•  Yinki mutindu nge fueti vuata samu na kukuenda na bafeti yango?

•  Bantu kenataka bakado ya makuela?

•  Bantu kenangunaka bavere ya malavu samu na kuzodila bankuelani luzingu ya yinda?

•  Bantu kelozilaka bankuelani loso to bima yankaka ya mpembe?

•  Malavu mpe bima ya kudia kevuanda?

•  Miziki mpe makinu kevuanda?

•  Bambangi ya Yehova kesalaka feti ya aniversere ya dikuela na bau?

 Diambu ya mfunu ya nkinzi ya dikuela kele diskur ya dikuela. Diskur yango kezingilaka kana baminiti 30, mpe Mbangi ya Yehova mosi nde kesalaka diskur yango. Diskur yango ya kusimba ntima mpe ya kukindisa, kemonisaka mutindu Biblia lenda sadisa bankuelani bavuanda na dikuela yina kezingila, ya nzola, mpe ya kiese.—Baefese 5:33.

 Na babuala mingi, guvernema kepesaka Bambangi ya Yehova yinsua ya kukuedisa bantu. Kana yakele mutindu yina, na nsuka ya diskur yango ya dikuela, bankuelani kesalaka ndefi ya dikuela mpe bakevuatasanaka babagi na misapi. Na manima, Mbangi ya Yehova yina salaka diskur yango ketubaka ti nketo mpe bakala yango mekuma bankuelani na kutadila minsiku.

 Na babuala yankaka, nsiku kelombaka ti bantu bakuelana na biro ya Leta yina ketadilaka dikuela. Bankuelani yango kekuendaka na biro ya Leta mua ntangu fioti tekila balanda diskur ya dikuela. Kana basalaka ve ndefi ya dikuela na biro ya Leta yina ketadilaka dikuela, balenda sala ndefi yango na nsuka ya diskur ya dikuela. Kana basalaka deja ndefi na bau, balenda pona kuvutukila yau, kasi na mbala yayi bakesala ndefi yango na bampova yina kemonisa ti basalaka yau deja. Diskur ya dikuela kemanisaka na kisambu samu na kulomba Nzambi yandi sakumuna bankuelani yango ya yimpa.

 Bambangi ya Yehova mingi keponaka kusala diskur ya dikuela na bau na Yinzo ya Kimfumu kana dikoki kele. b Kana bankuelani kesala feti na manima ya diskur, bakeponaka kisika yankaka samu na yau.

 Kana feti ya dikuela mesalamina na Yinzo ya Kimfumu, mbala mingi yakevuandaka samu na muntu nionso; yazola tuba yavuanda nge kele Mbangi ya Yehova to ve nge lenda kuiza. Kasi, kana bankuelani kesala feti na bau ya dikuela na manima ya diskur, bau mosi kepona bantu yina bakebokidisa na feti na bau.

 Atako yakelombaka ve kuvuata kaka mutindu mosi samu muntu kuenda na feti ya dikuela na Yinzo ya Kimfumu, Bambangi ya Yehova kesalaka ngolo na kulanda bansikudukusu ya Biblia ya kuvuata na mutindu yina mebonga mpe na mutindu ya lokumu. Bakesepelaka kana bantu yankaka mevuata mpe mutindu yina. (1 Timote 2:9) Ya kedika, bansikudukusu yango kesaduluaka mpe na kisika ya feti ya dikuela, kana bakuelani mepona kusala yau.

 Biblia kekindisaka beto beto kabudilaka bantu yankaka. (Nzembo 37:21) Bambangi ya Yehova kesepelaka kupesa mpe kubaka bakado ya dikuela. (Luka 6:38) Kasi, bakelombaka bakado yango ve mpe baketubaka ve bankumbu ya bantu yina mepesa yau. (Matai 6:3, 4; 2 Bakorinti 9:7; 1 Petro 3:8) Mimeseno yango kele ve na nguinzani na malongi ya Biblia, yalenda sala ti bantu yina mekuiza na feti bakukimona mbote ve.

 Ve. Bambangi ya Yehova kenangunaka ve bavere ya malavu samu na lokumu ya bankuelani, samu mumeseno yango mekatuka na mimeseno ya mabundu ya luvunu. c Bambangi ya Yehova ketubilaka bankuelani ya yimpa ti bazola ti bavuanda na dikuela ya kiese, kasi bakesalaka yau ve na nzila ya kunanguna vere ya malavu.

 Ve. Na bisika yankaka, bakelozilaka bankuelani loso to bima yankaka yina mekokana na yau. Bakekanisaka ti yau nde kenatina bankuelani yango mambu ya mbote, ya kiese mpe luzingu ya yinda. Kasi Bambangi ya Yehova kemangaka mimeseno yango samu yamekatuka na biyambayamba. Yamesangisa mambu lokola kuzodila muntu “menga ya mbote,” samu yakele ve na nguizani na bansikudukusu ya Biblia.—Yisaya 65:11.

 Malavu mpe bima ya kudia kevuandaka ve na feti ya makuela na Yinzo ya Kimfumu. Bankuelani yankaka keponaka kisika yina bakesadila nkinzi ya dikuela na bau samu na kudia mpe kunua malavu. (Mosakoli 9:7) Kana bamepona kupesa bantu malavu, bakekukindimisaka ti yakevuanda ve na mutindu ya kulutisa ndilu, mpe kaka bantu yina kele na mvula yina mefuana samu na kunua malavu na kutadila minsiku ya buala na bau nde fueti kunua.—Luka 21:34; Baroma 13:1, 13.

 Kana bakuelani kesala nkinzi ya feti ya dikuela na bau, balenda pona miziki mpe makinu yina kevuanda na feti yango. (Mosakoli 3:4) Bakepona miziki yina kele mbote, kutu miziki yango ketadila bankuelani bau mosi mpe mimeseno ya Buala na bau. Mbala mingi feti ya dikuela yina kesalamaka na Yinzo ya Kimfumu kevuandaka mpe na miziki yina yintu ya diambu na yau mekatuka na Biblia.

 Lokola bansikudukusu ya Biblia mendima to mepekisa ve kusala feti ya aniversere ya dikuela, Bambangi ya Yehova yina mekuelanaka keponaka kusala to ve feti na bau ya aniversere. Kana bamepona kusala yau, bakesalaka yau bau mosi to kintuadi na bankundi mpe bantu ya dibuta na bau.