Bambangi ya Yehova kevuandaka na Biblia ya bau mosi?

KUWA NA

Bambangi ya Yehova kesadilaka bambangudulu mingi ya Biblia na bandongokolo na bau. Kasi, beto kesepelaka mingi kusadila Biblia—Libongoli ya Mokili ya Sika kana yakele na ndinga mosi plina, samu yamesadila nkumbu ya Nzambi, yakele ya sikisiki, mpe yakele puelele.

Yamesadila nkumbu ya Nzambi. Bambangudi yankaka ya Biblia pesaka ve nkumbu ya Nzambi lokumu. Na kifuani, mbangudulu mosi ya Biblia tangaka bankumbu ya bantu 70 yina pesaka maboko samu na kubimisa yau. Kasi, yatanga ve nkumbu ya Mfumu ya Biblia—Yehova Nzambi!

Kasi, Biblia—Libongoli ya Mokili ya Sika mevutula nkumbu ya Nzambi na bisika mingi yina nkumbu yango vuandaka na masonukua ya ntetentete, atako yatanga ve bankumbu ya bantu yina bimisaka yau.
Busikisiki. Bambangudulu nionso ve mebangula Biblia mutindu yasonamaka na ebandeli. Na kifuani, mbangudulu mosi mebangula Matai 7:13 mutindu yayi: “Beno kota na porte ya fioti, mpamba ve porte ya bilungi kele nene, mpe nzila yina kenataka bantu kuna kele mpasi ve.” Nzokande, masonukua ya ntetentete mesadila mpova “kubebisama,” kasi “bilungi” ve. Mbala yankaka bambangudi yango kotisaka mpova “bilungi” samu bakanisaka ti bantu ya yimbi keniokuamaka mvimbambima na bilungi ya tiya. Kasi Biblia ketubaka mutindu yina ve. Na yau, Biblia—Libongoli ya Mokili ya Sika mebangula yau mutindu yayi: “Beno kota na porte ya fioti; mpamba ve nzila ya nene mpe yina kele ya kuzibuka nde kenataka na kubebisama.”
Yakele puelele. Mbangudulu ya mbote fueti vuanda kaka ve sikisiki kasi yafueti vuanda mpe puelele, pete samu na kubakusa. Beto tala kifuani. Na Baroma 12:11, ntumua Paulo mesadila bampova yina memonisa mbotembote “na mpeve yina kena kutoka.” Lokola na Kikongo ya Leta mpova yango wizana mpenza mbote ve, Biblia—Libongoli ya Mokili ya Sika mebangula verse yango na mutindu yina kele mpenza pete samu na kubakusa. Yametuba ti Baklisto fueti “pela na mpeve.”

Katula kusadila nkumbu ya Nzambi, mutindu yakele na busikisiki, mpe mutindu yakele puelele, yakele diaka na diambu yankaka yina mesuasikisa Biblia—Libongoli ya Mokili ya Sika na Babiblia yankaka: Yakekabuluaka ofele. Yau mesala ti bamilion ya bantu vuanda na dikoki ya kutanga yau na bandinga ya buala na bau—ata bantu yina kele ve na dikoki ya kusumba Biblia.