Beto kesadilaka ntangu nionso Biblia samu yau nde mesimba bindimeli na beto, yau yina beto kebongisaka bindimeli na beto ntangu mbakusulu na beto ya Masonukua mebuelama. a

 Kusala mutindu yina kele na nguizani na nsikudukusu ya Biblia yina kele na Masese 4:18: “Nzila ya bantu ya lunungu kele lokola ntemo ya kukia ya sunka yina kena kubuelama kulezima tii muini kekuma ngolo.” Mutindu kaka kukia ya sunka kebuelamaka fiotifioti, Nzambi diaka kepesaka nzayilu na yandi fiotifioti mpe na ntangu yina yandi mezola. (1 Petro 1:10-12) Mutindu Biblia samunaka yau, yandi mesala ti diambu yango kuenda nsualunsualu “na ntangu yayi ya nsuka.”​—Danyele 12:4.

 Bansobolo yango yina metadila mbakusulu na beto fueti kamuisa nge ve mpe yafueti bangisa nge ve. Na bantangu yankaka bisadi ya Nzambi ya ntama diaka vuandaka na makanisi mpe bivuvu yina bonga ve, yina yalombaka babongisa.

•   Mose kukibimisaka yandi mosi lokola mvuluzi ya dikanda ya Yisaele bamvula 40 na ntuala ya ntangu yina Yehova tulaka.​—Bisalu 7:23-25, 30, 35.

•   Bantumua vuandaka bakusa ve bambikudulu yina tubilaka lufua mpe mfutumukunu ya Masiya.​—Yisaya 53:8-12; Matai 16:21-23.

•   Baklisto yankaka ya siekle ya ntete vuandaka na makanisi ya yimbi samu na ntangu ya kukuiza ya “kilumbu ya Yehova.”​—2 Batesaloniki 2:1, 2.

 Nzambi sadisaka bau samu babongisa makanisi na bau, mpe beto kesambilaka samu yandi tatamana kusala mutindu yina samu na beto.​—Yakobo 1:5.