Bambangi ya Yehova kendimaka ti bansiku mpe bansikudukusu yina kele na Biblia lenda sadisa muntu yandi baka banzengolo yina kesepedisa Nzambi mpe yina kenatina yandi mosi mambote. (Yisaya 48:17, 18) Beto ve nde mebimisaka bansiku mpe bansikudukusu yango, kasi beto kezitisaka yau. Beto tala mutindu ndambu ya bansiku mpe bansikudukusu yango kele na nguizani na diambu metadila kuzolana. a

•   Dikuela fueti zingila mvimbamvimba. (Matai 19:6) Lokola Bambangi ya Yehova kemonaka ti kuzolana kele diambu yina kenataka na dikuela, bakebakaka yau na maseki ve.

•   Kaka bantu yina lenda kuelana nde lenda zolana. Bantu yina “meyunduka na nzutu mpe na makanisi,” to bameluta ntangu yina bansatu ya kusangisa nzutu kevuandaka ngolo.​—1 Bakorinti 7:36.

•   Bantu yina kena kuzolana fueti vuanda na kimpuanza ya kukuelana. Bantu yankaka yina mevambanaka na Leta, kele na yinsua ya kukuelana ve na meso ya Nzambi, samu bansiku ya Nzambi ketubaka ti muntu lenda kufua dikuela kaka kana nkuelani na yandi mesala kinsuza.​—Matai 19:9.

•   Biblia melomba Baklisto yina kele na nsatu ya kukuela bapona kaka muntu yina kele Muklisto lokola bau. (1 Bakorinti 7:39) Bambangi ya Yehova kemonaka ti nsiku yango melomba ti bafueti kuela kaka Mbangi ya Yehova yina mebakaka deja mbotama mpe yina kezitisaka bindimeli na bau, kasi bafueti kuela ve muntu yina kesepelaka kaka na malongi na bau. (2 Bakorinti 6:14) Banda ntama, Nzambi kelombaka kaka bisadi na yandi bakuelana na bantu yina kele na kiminu mosi na bau. (Ebandeli 24:3; Malaki 2:11) Nsiku yango kesadisaka tii bubu yayi, mutindu balapolo ya bilumbu na beto memonisa yau. b

•   Bana fueti zitisa bibuti na bau. (Masese 1:8; Bakolose 3:20) Samu na bana yina kena kuzinga na yinzo ya bibuti na bau, nsiku yango metadila mpe kuzitisa nzengolo ya bibuti na bau na diambu metadila kuzolana. Bibuti lenda tuba mvula yina muana na bau lenda banda kuzolana na muntu mpe mambu yankaka yina bakebikila yandi nzila ya kusala.

•   Na kulandaka malongi yayi kele na Masonukua, Mbangi ya Yehova mosimosi keponaka kana yandi fueti zolana na muntu mpe nani yandi fueti zolana na yandi. Yakele na nguizani na nsikudukusu ya Biblia yina metuba: “Konso muntu kenata kilo na yandi yandi mosi.” (Bagalatia 6:5, noti na yinsi ya paje) Kasi, kana Bambangi ya Yehova kele na nsatu ya kuzolana, mingi kati na bau kesosaka malongi na Bambangi ya Yehova yankaka yina kele ya kuyela na kimpeve mpe yina mezaba mambu mingi.​—Masese 1:5.

•   Mambu mingi yina bantu kesalaka ntangu bakena kuzolana kevuandaka masumu ya nene. Na kifuani, Biblia melomba beto beto tina pite. Yakele kaka ve kusangisa nzutu na muntu. Yamesangisa diaka mambu nionso ya mvindu yina bantu yina kuelana ntete ve lenda sala. Na kifuani kusimbasimba kinama ya kubutila ya nketo to ya bakala, kufiba yau, to kusangisa nzutu na kinenunu. (1 Bakorinti 6:9-11) Kusala mambu yina kelamusaka nsatu ya kusangisa nzutu na muntu yina kele ve nkuelani na nge, ata kana beno mesangisa nzutu ve kele “mvindu” mpe Yehova kesepelaka na yau ve. (Bagalatia 5:19-21) Biblia mepekisa diaka masolo yina kele na “bampova ya nsoni.”.​—Bakolose 3:8.

•   Ntima to kimuntu ya kati kevunaka. (Yirimia 17:9) Yalenda nata muntu na kusala mambu yina yandi mezaba ti yakele yimbi. Samu ntima bika vuna bau, bantu yina kena kuzolana fueti manga kuvuanda na bisika yina bakevuanda kaka bau mosi samu babika kubua. Balenda mona mbote bakutanaka kisika mosi na bankundi ya mbote to kuvuanda na muntu mosi yina lenda sadisa bau samu bakubua ve. (Masese 28:26) Baklisto yina kele bampupa, yina kena kusosa bankuelani kezabaka ti kusosa muntu yango na nzila ya basite ya kusolola na bantu kele kivonza. Mingimingi kivonza ya kuzolana na muntu yina nge zaba mbote ve.​—Nzembo 26:4.