Bambangi ya Yehova kemonisaka bantu mutindu ya mbote ya kuzaba mambu yina Biblia kelongaka. Programe yango ya ndongokolo ya Biblia lenda sadisa nge na:

•   Kuvuanda na kiese na luzingu

•   Kukuma nkundi ya Nzambi

•   Kuzaba mambu yina Biblia melaka samu na bilumbu kena kuiza

Na disolo yayi, beto ketubila:

•  Yinki mutindu ndongokolo ya Biblia kesalamaka?

•  Munu fueti futa mbongo samu na kulonguka?

•  Ndongokolo yango kezingilaka ntangu yikua?

•  Yinki mutindu munu lenda lomba ndongokolo yango?

•  Munu lenda meka ntete kulonguka kitini ya ntete?

•  Kana munu mendima kulonguka Biblia, baketula munu mbamba samu munu kuma Mbangi ya Yehova?

•  Munu lenda sadila Biblia ya munu mosi?

•  Munu lenda bokidisa bantu yankaka samu bakuiza sangana na ndongokolo na munu?

•  Bosi kana melongukaka Biblia na Bambangi ya Yehova na ntama, munu lenda longuka diaka?

•  Munu lenda longuka Biblia kondua ti muntu longisa munu? Kana ee, yinki munu lenda sala?

 Muntu yina kelonguka na nge Biblia kesadisa nge nge zaba Biblia mbotembote, yazola tuba, dilongi mosimosi. Na kusadilaka mukanda Zinga mvula na mvula na kiese! na ndongokolo na nge ya Biblia, nge kezaba malembemalembe nsangu ya Biblia mpe mutindu yalenda sadisa nge. Samu na kuzaba mambu mingi, tala video yayi.

 Ve. Bambangi ya Yehova kezitisaka ntumu yina Yesu pesaka banlonguki na yandi: ‘Beno mebaka ofele, beno pesa mpe ofele.’ (Matai 10:8) Katula yau, bisadulu ya ndongokolo, yina mesangisa Biblia mpe mukanda yina kele na yintu ya diambu Zinga mvula na mvula na kiese!, kele ofele.

 Mukanda yango kele na malongi 60. Nge muntu fueti tuba mbala yikua nge kesepela kulonguka. Mbala mingi bantu yina kelongukaka Biblia kesepelaka kutadila dilongi mosi to malongi mingi konso sabala.

1.  1. Fulusa formilere yina kele na Internet. Beto kesadila mambu yina nge mesonika samu na kulomba Mbangi mosi ya Yehova kuiza solola na nge.

2.  2. Nlongisi mosi ya Biblia kekuiza solola na nge. Nlongisi na nge ya Biblia kesadisa nge nge zaba na nkufi mutindu ndongokolo ya Biblia kesalamaka mpe yandi kepesa bamvutu na biuvu na nge.

3.  3. Nge mpe nlongisi na nge beno kebongisa programe samu na kulonguka. Nlongisi lenda kuiza longuka na nge na kisika yina nge kele to yandi lenda longuka na nge na nzila ya telefone, ya apele video, ya baletre to ya bamesaje. Mbala mingi, ndongokolo ya Biblia kezingilaka wola mosi, kasi yalenda vuanda nkufi to yinda na kutadila programe na nge.

 Ee. Samu na kusala yau, fulusa formilere na Internet. Ntangu nlongisi kekuiza tala nge, zabisa yandi puelele ti nge kele na nsatu ya kubanda kulonguka samu nge zaba kana yakesepedisa nge. Yandi kesadila mua mukanda Zinga mvula na mvula na kiese! yina kele na malongi tatu ya ebandeli, samu nge zaba kana nge kesepela kulonguka.

 Ve. Bambangi ya Yehova kesepelaka kulonga bantu mambu metadila Biblia, kasi baketulaka bantu mbamba ata fioti ve samu bakota na dibundu na bau. Kutu, na luzitu nionso bakemonisaka bantu mambu yina Biblia metubila, mpe bamezaba ti muntu na muntu kele na yinsua ya kupona mambu yina yandi kendima.​—1 Petro 3:15.

 Ee, nge lenda sadila mbangudulu nionso ya Biblia yina nge zola. Kasi beto kesepelaka kusadila Biblia​—Libongoli ya Mokili ya Sika samu mbangudulu yango kele na bampova ya puelele mpe ya sikisiki. Bambangi ya Yehova kezabaka ti bantu mingi kezolaka kusadila bambangudulu ya Biblia yina bamemesanaka na yau.

 Ee. Nge lenda bokidisa bantu nionso ya dibuta na nge to bankundi na nge.

 Ee. Kutu, nge kesepela na ndongokolo na beto ya bilumbu yayi samu yakena kutubila mambu mingi ya yimpa yina bantu kena kukutana na yau bubu yayi. Yakele kitoko mingi mpe nge kesolola mingi na nlongisi na nge kuluta mutindu yavuandaka na bandongokolo na beto ya ntama.

 Ee. Atako bantu mingi yina kelongukaka Biblia kemonaka ti bakelongukaka na pete kana Mbangi mosi ya Yehova kena kusadisa bau, bantu yankaka kezolaka kubanda kulonguka bau mosi kondua ti muntu yankaka sadisa bau. Kitini Bisadulu samu na kulonguka Biblia kele na bisadulu mingi mpe na malongi mingi yina lenda sadisa nge samu na kulonguka Biblia. Tala bisadulu yina nge lenda mona na kati:

•    Bavideo ya malongi ya Biblia. Bavideo yango ya nkufi kesasilaka malongi ya ngudi ya Biblia.

•   Bamvutu na biuvu ya Biblia. Masolo yango kepesaka bamvutu na biuvu mingi yina bantu keyuvusaka samu na Biblia.

•   Mutindu bamesasila baverse ya Biblia. Sosa kuzaba mambu yina baverse ya Biblia kezolaka mpenza kutuba to nsasulu ya bampova mpe baverse ya Biblia yina mezabana mingi.