Ee. Yavuanda yinki kisika beto kizingaka, Bambangi ya Yehova nionso kesalaka ngolo samu na kuvuanda lokola bamisionere. Beto ketubilaka bindimeli na beto mbala na mbala na bantu yina beto kekutanaka na bau.—Matai 28:19, 20.

 Katula yau, Bambangi ya Yehova yankaka kekuendaka samu na ntangu ya nkufi to ya yinda na bisika yankaka ya buala na bau yina bantu kuwa ntete ve nsangu ya mbote ya Biblia. Bambangi ya Yehova yankaka kekuendaka vuanda na buala ya kinzenza samu na kusala diaka mingi na kisalu ya kusamuna. Bakevuandaka na kiese mutindu bakepesaka maboko na kukokisama ya mbikudulu yayi ya Yesu: “Beno kevuanda Bambangi na munu . . . na kisika meluta mpenza ntama na ntoto.”—Misala 1:8.

 Na mvula 1943, beto zibulaka ekole mosi yina kepesaka formasion mosi ya sikisiki na ndambu ya bamisionere na beto. Banda ntangu yango, Bambangi ya Yehova kuluta 8 000 mekotaka na ekole yango, yina mezabana na nkumbu ya Ekole ya Watchtower ya malongi ya Biblia ya Gilead.