Ve. Bambangi ya Yehova kemangaka ve kubaka vaccin. Beto kemonaka diambu ya kubaka vaccin kele nzengolo yina metadila muntu mosimosi mpe konso Muklisto fueti baka nzengolo yango yandi mosi. Bambangi ya Yehova mingi kendimaka kubaka vaccin.

 Beto kesosaka lusadusu ya munganga yina meluta mbote mpenza mpe beto kebakaka na valere mutindu siansi kena kuenda na ntuala na diambu metadila lusadusu ya munganga samu na kutina bivonza yina kekatukaka na maladi ya yimbi. Beto kele na butondi samu na mutindu minganga kena kukipesa mpe bakena kusala kisalu ya ngolo samu na kusadisa bantu bavuanda na mavimpi ya mbote mingimingi na ntangu yayi ya mpasi.

 Bambangi ya Yehova kevuandaka na nguizani ya mbote na minganga. Na kifuani, banda maladi ya yimbi ya COVID-19 muanganaka na yinza ya mvimba, Bambangi ya Yehova kena kutatamana kubambula bantu na bankama ya bandinga na site ya Internet na bau samu bakukitanina na maladi yango, mpe bakena kukindisa bantu bandima malako yina bamfumu ya Leta kena kupesa. Yamesangisa mambu lokola kuvuanda ntama na bantu yankaka, kuzitisa nsiku na diambu metadila kusangana kisika mosi na bantu mingi, kuvambula bantu yankaka, kusukula maboko, mpe kuvuata maske, lokola yakele malako ya ntetentete yina bamfumu ya Leta kena kupesa samu na kukitanina na maladi yango.​—Baroma 13:1, 2.

 Banda ntama, mikanda ya Bambangi ya Yehova kebulaka nsoso na bansikudukusu yayi melanda:

•   Banzengolo na mambu metadila mavimpi metadila muntu yandi mosi.​—Bagalatia 6:5.

   “[Zulunalo yayi] kena kulomba ve bantu babaka mutindu mosi ya bilongo to mutindu mosi ya lusadusu ya munganga na kisika yankaka, mpe yakena kupesa ve malongi na mambu metadila lusadusu ya munganga. Yakena kutubila kaka mambu mutindu yakele mpe yakebikaka muntu yina kena kutanga yau yandi baka banzengolo na yandi yandi mosi.”​—Réveillez-vous ! ya 8 février 1987.

   “Diambu metadila kundima to kumanga kubaka vaccin samu na nge mpe samu na bantu ya dibuta na nge, kele nzengolo yina nge mosi to bantu ya dibuta na nge fueti baka.”—Réveillez-vous ! 8 août 1993.

•   Beto kesosaka lusadusu ya munganga samu beto kebakaka luzingu na valere mingi.​—Misala 17:28.

   “Bambangi ya Yehova kesosaka lusadusu ya munganga ntangu bakele na mitungisi ya mavimpi. Bakezolaka luzingu mpe bakesalaka nionso yina balenda na mutindu yina mefuana mpe na nguizani na Biblia samu batatamana kuzinga.”​—Tour de Garde, ya 1 octobre 1975.

   “Bambangi ya Yehova kendimaka na kiese nionso bilongo mpe lusadusu ya munganga. Bakezolaka kuvuanda na mavimpi ya mbote mpe na luzingu ya yinda. Ya kedika, mutindu mosi na Luka Muklisto mosi ya siekle ya ntete, Bambangi ya Yehova mingi yankaka kele minganga. . . . Kondua ntembe Bambangi ya Yehova kele na butondi mingi na kisalu ya ngolo mpe na kukipesa ya minganga. Bakevuandaka na butondi ntangu bantu yango kesadisaka bau samu bakukimona mbote.”​—Tour de Garde, ya 1 février 2011.