Ee. Muntu lenda katuka na nkubukulu na beto na mitindu zole:

•   Kana yandi mosi melomba. Muntu lenda tuba to kusonika mukanda samu na kumonisa ti yandi zola diaka ve kuvuanda Mbangi ya Yehova.

•   Na nzila ya bisalu. Muntu lenda sala diambu mosi yina kena kumonisa ti yandi zola diaka ve kuvuanda Mbangi ya Yehova. (1 Petro 5:9) Na kifuani, yandi lenda banda kukutakana na dibundu yankaka mpe kumonisa nsatu na yandi ya kubikana na dibundu yango.​—1 Yoane 2:19.

 Ve, beto kesalaka mutindu yina ve. Kukikatula to kubika dibundu mesuasana na kulemba na kimpeve. Mbala mingi, bantu yina kelembaka to kebikaka kusala mambu ya nsambudulu na beto, bakebikaka ve kiminu na bau kasi bakekutanaka nde na mambu ya mpasi yina kelembisaka bau. Na kisika beto kuka bantu ya mutindu yina, beto kesalaka nionso samu na kubomba bau mpe kusadisa bau. (1 Batesaloniki 5:14; Yuda 22) Kana muntu kele na nsatu ya lusadusu, bankulutu yina ketuadisa mambu na kimvuka kesalaka ngolo samu na kupesa mpenza lusadusu ya kimpeve.​—Bagalatia 6:1; 1 Petro 5:1-3.

 Nzokande, bankulutu kevuandaka ve na yinsua ya kukanga muntu na kingolo to kutula yandi mbamba samu yandi bikana kaka Mbangi ya Yehova. Konso muntu kebakaka nzengolo na yandi na mambu metadila nsambudulu. (Yosua 24:15) Beto kendimaka ti bantu yina kesambilaka Nzambi fueti vuanda pene ya kusala yau na ntima na bau mosi.​—Nzembo 110:3; Matai 22:37.