Bambangi ya Yehova kekotaka ve na mambu ya politiki samu bakezitisaka mambu yina Biblia kelongaka. Beto kepesaka ve makanisi na balukutakanu ya bantu ya politiki, beto kevoteke ve, beto kepesaka mpe ve nkumbu samu bapona beto na bavoti, to beto kesalaka ata diambu mosi ve samu na kusoba mambu na kati ya guvernema ya buala. Beto kendimaka ti Biblia mepesa bamfunu ya mbote yina beto fueti sadila ve mambu yango.

•   Beto kelandaka kifuani ya Yesu, yandi mangaka kukuma mfumu ya politiki. (Yoane 6:15) Yandi longaka banlonguki na yandi ti “bavuanda ve bantu ya yinza” mpe yandi monisaka puelele ti bafueti kota ve na mambu ya politiki.​—Yoane 17:14, 16; 18:36; Marko 12:13-17.

•   Beto kevuandaka ya kukuikama na Kimfumu ya Nzambi, yina Yesu tubilaka ntangu yandi tubaka: “Nsangu ya mbote yayi ya Kimfumu kesamunua na ntoto ya mvimba kisika bantu mevuanda.” (Matai 24:14) Lokola beto kele bamonisi ya Kimfumu ya Nzambi, mpe beto kele na kiyekua ya kusamuna kukuiza na yau, beto kekotaka ve na mambu ya politiki ya babuala, yavuanda ya buala kisika beto kezingaka.​—2 Bakorinti 5:20; Baefese 6:20.

•   Lokola beto kemangaka kukota na mambu ya politiki, beto kebangaka ve kusamuna nsangu ya mbote ya Kimfumu na bantu nionso, yavuanda bakele na yinki kimvuka ya politiki. Beto kesosaka kumonisa na bampova mpe bisalu na beto ti beto ketulaka ntima ti Kimfumu ya Nzambi nde kekuiza manisa mambu nionso ya mpasi.​—Nzembo 56:11.

•   Lokola beto kekotaka ve na matata ya politiki, beto kele na bumosi na bampangi na beto ya yinza ya mvimba. (Bakolose 3:14; 1 Petro 2:17) Kasi, bankuikizi ya mabundu yina kekotaka na mambu ya politiki kevuandaka na bumosi ve.​—1 Bakorinti 1:10.

 Kuzitisa baguvernema. Atako beto kekotaka ve na mambu ya politiki, beto kezitisaka bamfumu ya Leta ya babuala yina beto kezingaka. Yakele na guizani na Ntumu ya Biblia: “Bika ti muntu na muntu zitisa bau samu bakele bamfumu.” (Baroma 13:1, haut fleuve) Beto kezitisaka minsiku ya buala, beto kefutaka mpaku, mpe beto kesalaka mambu yina guvernema melomba samu na mambote ya bana ya buala nionso. Na kisika beto sangana na bantu yankaka samu na kusosa kubuisa baguvernema, beto kelandaka dilongi ya Biblia ya kusambila samu na “bantinu mpe bantu nionso yina kele na bakiti ya kimfumu,” mingimingi ntangu bakena kubaka banzengolo yina lendaka vuanda na bupusi na nsambudulu na beto.​—1 Timote 2:1, 2, noti na yinsi ya paje.

 Beto kendimaka diaka ti muntu na muntu fueti baka nzengolo na yandi na mambu metadila politiki. Na kifuani, beto ketulaka ve mvualangani na bavoti mpe beto kepekisaka ve bantu bakuenda pona bamfumu.

 Kumanga kukota na mambu ya politiki kele diambu ya yimpa? Ve. Bantumua mpe Baklisto yankaka ya siekle ya ntete vuandaka manga kukota na mambu ya politiki. Mukanda mosi (Beyond Good Intentions) metuba: “Atako Baklisto ya siekle ya ntete zabaka ti bavuandaka na kiyekua ya kuzitisa bamfumu ya Leta, bavuandaka ndima ve kukota na mambu ya politki.” Mutindu mosi mpe, mukanda (On the Road to Civilization) metuba ti Baklisto ya siekle ya ntete “vuandaka ndima ve biyekua ya politiki.”

 Mutindu beto kemangaka kukota na mambu ya politiki kele kivonza samu na kiyenge ya buala? Ve. Bamfumu ya Leta kebangaka ve samu na beto samu bamezaba ti beto kele bantu ya kiyenge. Beto tadila lapolo mosi ya 2001 yina nkubukulu mosi (National Academy of Sciences of Ukraine) bimisaka. Lapolo yango tubaka mutindu yayi na mutindu beto kekotaka ve na mambu ya politiki: “Bubu yayi bantu yankaka lenda yina Bambangi ya Yehova samu na nzengolo na bau; yakele samu na yau nde bamfumu ya Nazi mpe Bakoministe fundaka bau na ntama.” Atako bantu ya Union soviétique niokolaka bau, Bambangi ya Yehova “tatamanaka kuzitisa minsiku ya buala. Batatamanaka kusala na kukuikama nionso na baferme mpe na bilanga ya nene, mpe bavuandaka kivonza ve samu na guvernema ya Bakoministe.” Mutindu bamemonisa yau na nsuka ya lapolo yayi, malongi mpe mambu yina Bambangi ya Yehova kesalaka, “kele kivonza ve samu na kiyenge ya buala.”