Ve. Beto Bambangi ya Yehova beto kendimaka ti Nzambi salaka bima nionso. Kasi beto kendimaka ve ti Nzambi semaka yinza na bilumbu 6 ya bawola 24. Samu na yinki? Samu makanisi ya bantu mingi yina ketubaka ti Nzambi semaka yinza na bilumbu 6 ya bawola 24 kele ve na nguizani na yina Biblia metuba. Beto tadila bifuani zole yayi melanda:

1.   Ntangu yina bilumbu 6 ya nsemono salaka. Bantu yankaka yina ketubaka ti Nzambi semaka yinza na bilumbu 6 kendimaka ti bilumbu 6 ya nsemono kele mpenza bilumbu ya bawola 24. Nzokande na Biblia mpova “kilumbu” lenda monisa kilokola mosi ya yinda mpenza.​—Ebandeli 2:4; Nzembo 90:4.

2.   Bamvula yina ntoto mezingila. Bantu yankaka yina ketubaka ti Nzambi semaka yinza na bilumbu 6 kelongaka ti ntoto mezingila kaka mua mafunda ya bamvula. Kasi, Biblia metuba ti ntoto mpe luyalanganu vuandaka deja tekila bilumbu 6 ya nsemono banda. (Ebandeli 1:1) Samu na mfunu yango, Bambangi ya Yehova kemangaka ve makanisi ya bantu ya siansi yina kemonisaka ti mbala yankaka ntoto mezingila bamiliare ya bamvula.

 Atako beto Bambangi ya Yehova beto kendimaka ti bima nionso salamaka, kasi beto kemangaka ve sianse. Beto kendimaka ti sianse ya kedika mpe Biblia kele na nguizani.