Ee. Bambangi ya Yehova kendimaka ti Biblia na mvimba na yau kele ya ‘kupemama na Nzambi mpe yakele na mfunu.’ (2 Timote 3:16) Yamesangisa Testama ya ntama mpe Tesatama ya yimpa, mutindu bantu mingi kebokidilaka yau. Mbala mingi, Bambangi ya Yehova kebokidilaka bitini yango ya Biblia Masonukua ya Ebreo mpe Masonukua ya Greki ya Buklisto. Na mutindu yango, beto kemangaka ti bantu kanisa ti bitini yankaka ya Biblia kevuandaka diaka ve na mfunu.

 Na lusadusu ya mpeve ya Nzambi, ntumua Paulo yina vuandaka Muklisto sonikaka: “Mambu nionso yina mesonamaka ntama yasonamaka samu na kulonga beto.” (Baroma 15:4) Na yau, Masonukua ya Ebreo kele na mambu ya mfunu mpenza samu na beto. Na kifuani, yametubila masolo ya mfunu mpe malongi ya mbote.

•   Masolo ya mfunu. Masonukua ya Ebreo metubila mutindu Nzambi salaka yinza mpe mutindu bantu kubuaka na disumu. Kana beto zabaka ve mambu yango, beto zolaka baka ve bamvutu na biuvu lokola: Wapi beto katukaka? Samu na yinki bantu kekufuaka? (Ebandeli 2:7, 17) Katula yau, Masonukua ya Ebreo metubila mambu yina Yehova Nzambi sadilaka bisadi na yandi yina vuandaka na kiese mpe yina kutanaka na mambu ya mpasi lokola beto.​—Yakobo 5:17.

•   Malongi ya mbote. Mukanda ya Masese mpe Mosakoli, yina kele na kati ya Masonukua ya Ebreo, kele na malongi ya nduenga samu na luzingu. Yamepesa malongi samu na mutindu ya kuvuanda na dibuta ya kiese (Masese 15:17), mutindu ya kuvuanda na bukatikati na diambu metadila kisalu (Masese 10:4; Mosakoli 4:6), mpe mutindu bantuenia lenda sadila kintuenia na bau na mutindu ya mbote (Mosakoli 11:9–12:1).

 Katula yau, beto lenda baka mambote mingi kana beto kena kulonguka Bansiku ya Mose mutindu yamesonama na Torah (mikanda tanu ya ntete ya Biblia). Atako Bansiku yango tadila ve Baklisto, kasi yakele na bansikudukusu ya mfunu yina lenda sadisa beto samu na kuvuanda na luzingu ya kiese.—Balevi 19:18; Kolimbola Mibeko 6:5-7.