Bambangi ya Yehova kezitisaka dilongi ya Biblia yina mepekisa kulandela mambu nionso yina bantu kena kufunda beto to maseki nionso. Na kifuani, kingana mosi ya Biblia metuba ti: “Muntu yina kena kusemba muntu yina kevuezaka yandi kebaka nsoni.” (Masese 9:7, 8; 26:4) Na kisika beto zonza samu na mambu yina mekondua mfunu ya mambu ya luvunu yina bakena kutuba samu na beto, beto ketulaka makanisi na beto na diambu metala kusepedisa Nzambi.​—Nzembo 119:69.

 Ya kedika, beto mezaba “yakele na ntangu ya kuvuanda niee mpe ntangu ya kutuba.” (Mosakoli 3:7) Beto kepesaka mvutu na bantu yina kevuandaka mpenza na nsatu ya kuzaba kedika, kasi beto kemangaka kukikotisa na bantembe yina mekondua mfunu. Na mutindu yango, beto kelandaka malongi mpe kifuani ya Yesu mpe ya Baklisto ya siekle ya ntete.

•   Yesu tubaka diambu mosi ve ntangu bafundaka yandi na luvunu nionso na ntuala ya Pilate. (Matai 27:11-14; 1 Petro 2:21-23) Mutindu mosi mpe, Yesu pesaka mvutu ve ntangu bafundaka yandi ti yandi kele muntu yina mekukipesaka na kunua mpe na kudia mingi. Kutu, yandi bikaka nde bisalu na yandi tuba, na nguizani na nsikudukusu yayi: “Nduenga kezabanaka na bisalu na yau.” (Matai 11:19) Kasi ntangu yalombaka ti yandi tuba, yandi tubilaka na kibakala nionso bantu yina vuandaka sambuisa yandi.​—Matai 15:1-3; Marko 3:22-30.

   Yesu longaka banlonguki na yandi babika lemba nzutu kana bamevunina bau mambu. Yandi tubaka: “Kiese na beno ntangu bantu kena kufinga beno, kuniokola beno, mpe kutubila beno mambu ya yimbi ya mutindu nionso samu na munu.” (Matai 5:11, 12) Kasi, Yesu tubaka diaka ti kana mambu yango yina bakena kufunda bau mepesa bau nzila ya kupesa kimbangi, yandi kekokisa nsilulu yina yandi lakaka bau: “Munu kepesa beno bampova mpe nduenga yina bambeni na beno nionso ata bamesangana, bakekoka ve kutelemina to kutudila ntembe.”​—Luka 21:12-15.

•   Ntumua Paulo pesaka Baklisto malongi ti bamanga bantembe yina mekondua mfunu ya bambeni, yandi monisaka ti yakele “na mfunu ve mpe yakele mpamba.”​—Tito 3:9; Baroma 16:17, 18.

•   Ntumua Petelo lombaka Baklisto bakotila bindimeli na bau kana dikoki kele. (1 Petro 3:15) Kasi yandi ndimaka ti mbala mingi yakevuandaka mbote kuluta kumonisa yau na bisalu. Yandi sonikaka: “Beno salaka mbote samu beno kangisa yinua ya bazoba, samu baketubaka kondua kuzaba.”​—1 Petro 2:12-15.