Beto Bambangi ya Yehova, beto kesepelaka kusolola mambu ya nsambudulu na bantu ya mabundu yankaka, kasi beto kesanganaka ve na bantu ya mabundu yankaka samu na kusambila. Biblia ketubaka ti Baklisto ya kedika kele “ya kusangana kifunda mosi,” mpe kima kesangisaka bau mutindu yina kele bumosi ya mambu yina bakendiminaka. (Baefese 4:16; 1 Bakorinti 1:10; Bafilipi 2:2) Yasuka kaka ve na kundima bikadulu lokola nzola, kimpombo, mpe kunlemvukila. Malongi ya dibundu na beto kekatukaka na Biblia, kiminu na beto mesimbama na malongi yango.​—Baroma 10:2, 3.

 Biblia memonisa ti kusangisa nsambudulu na mabundu yankaka kele yimbi, mpe yalenda bebisa kiminu ya Muklisto. (2 Bakorinti 6:14-17) Yau yina, Yesu mangaka banlonguki na yandi sangana na mabundu yankaka samu na nsambudulu. (Matai 12:30; Yoane 14:6) Mutindu mosi diaka, Nsiku yina Nzambi pesaka Mose pekisaka Bayisaele basangisa nsambudulu na bau na ya bantu ya makanda yankaka. (Kobima 34:11-14) Ata na manima, Bayisaele ya kukuikama mangaka lusadusu ya makanda yankaka samu yalendaka sala ti basangana na mambu ya nsambudulu na bau.​—Ezera 4:1-3.

 Ee. Mutindu mosi na ntumua Paulo, beto kesepelaka kubakusa makanisi mpe bindimeli ya “bantu mingi kuluta” na kisalu na beto ya kusamuna. (1 Bakorinti 9:19-22) Ntangu beto kesololaka na bantu, beto kesosaka kuzitisa dilongi ya Biblia ya kumonisa “luzitu ya mpinda” na bantu ya mitindu nionso.​—1 Petro 3:15.